(ស្វាយរៀង)៖ នគរបាលព្រហ្មទណ្ឌស្រុកស្វាយជ្រំ សហការជាមួយកម្លាំងប៉ុស្តិ៍នគរបាលរដ្ឋបាលដូនស នៅថ្ងៃទី៥ ខែមីនា ឆ្នាំ២០២៦ បានធ្វើលិខិតកោះហៅក្រុមក្មេងទំនើង៥នាក់ ដែលបានថតរូបភាពកាន់ដែកបំពង់ទីប (ដងឆ័ត្រ) ដុំថ្ម ខ្សែក្រវ៉ាត់ និងជំពាមកៅស៊ូ បង្ហោះតាមហ្វេសប៊ុកឈ្មោះ «Ah Fhh lh (Pk)» ដែលធ្វើឲ្យប៉ះពល់ដល់សណ្តាប់ធ្នាប់ និងសន្តិសុខសង្គម។

លោក សោម សុភ័ណ្ឌ អធិការនគរបាលស្រុកស្វាយជ្រំ បានឲ្យដឹងថា ក្មេងទំនើងទាំង៥នាក់ ដែលសមត្ថកិច្ចកោះហៅមកសាកសួររួមមាន៖

*ទី១៖ ឈ្មោះ នី រ៉ានុត អាយុ១៦ឆ្នាំ មុខរបរសិស្ស
*ទី២៖ ឈ្មោះ ណាង ណុប អាយុ១៦ឆ្នាំ មុខរបរសិស្ស
*ទី៣៖ ឈ្មោះ ប៉ែន ដា អាយុ១៧ឆ្នាំ មុខរបរកម្មករសំណង់
*ទី៤៖ ឈ្មោះ នឹម ពៅ អាយុ១៦ឆ្នាំ មុខរបរសិស្ស។ អ្ន​កទាំង៤នាក់ មានទីលំនៅភូមិគួយ ឃុំដូនស ស្រុកស្វាយជ្រំ
*ទី៥៖ ឈ្មោះ ធុន វិរៈ អាយុ១៧ឆ្នាំ មុខរបរសិស្ស មានទីលំនៅភូមិដូនស ឃុំដូនស ស្រុកស្វាយជ្រំ។

លោកអធិការនគរបាលស្រុក បានបញ្ជាក់ថា នៅចំពោះមុខសមត្ថកិច្ច ក្រុមក្មេងទំនើងទាំង៥នាក់ បានឆ្លើយសារភាពថា កាលពីថ្ងៃទី៤ ខែមីនា ឆ្នាំ២០២៦ វេលាម៉ោង ២១៖៤០នាទី ពួកគេបានបបួលគ្នាដើរលេងនៅភូមិគួយ ឃុំដូនស។

ពេលនាំគ្នាដើរលេងនោះ ឈ្មោះ ប៉ែន ដា ជាអ្នកកាន់ដែកបំពង់ទីប (ដងឆ័ត្រ) ឈ្មោះ ធុន វិរៈ ជាអ្នកកាន់ជំពាមកៅស៊ូ ឈ្មោះ នឹម ពៅ កាន់ថ្ម ឈ្មោះ ណាង ណុប កាន់ជំពាមកៅស៊ូ និងកាន់ខ្សែក្រវ៉ាត់។ ថតរូបភាពរួចហើយ ឈ្មោះ នី រ៉ានុត ជាអ្នកបង្ហោះតាមហ្វេសប៊ុកធ្វើឲ្យប៉ះពល់ដល់សណ្តាប់ធ្នាប់ និងសន្តិសុខសង្គម។

លោកបានបន្តថា ពេលបានស្តាប់ចម្លើយសារភាពរបស់ក្មេងទំនើងរួចហើយ លោកអធិការនគរបាលស្រុកស្វាយជ្រំ បានរាយការណ៍ជូនលោកឧត្តមសេនីយ៍ទោស្នងការ និងបានសុំយោបល់លោក ខាំ សុផារី ព្រះរាជអាជ្ញាអមសាលា ដំបូងខេត្តស្វាយរៀង។ លោកព្រះរាជអាជ្ញា បានឲ្យសមត្ថកិច្ចធ្វើកិច្ចសន្សាអប់រំដល់ក្រុមក្មេងទំនើង និងឲ្យអាណាព្យាបាលធ្វើលិខិតធានាយកទៅផ្ទះវិញដើម្បីអប់រំបន្តកុំឲ្យធ្វើអ្វីខុស និងផ្លូវច្បាប់ទៀត៕