(ស្ទឹងត្រែង)៖ លោក ស៊្រន សំឫទ្ធី អភិបាលរងខេត្តស្ទឹងត្រែង បានដឹកនាំក្រុមការងារទទួលស្វាគមន៍ក្រុមសមាគមស៊ីក្លូកម្ពុជា ក្នុងយុទ្ធនាការជិះស៊ីក្លូផ្សព្វផ្សាយទេសចរណ៍ចេញពីរាជធានីភ្នំពេញ​ ឆ្ពោះមកកាន់ក្រុងស្ទឹងត្រែង ដែលមានចម្ងាយរហូត ៣៧០គីឡូម៉ែត្រ។

ការទទួលស្វាគមន៍នៅទីលានតេជោធិបតី ជាមួយប្រជាពលរដ្ឋ សិស្សានុសិស្សដល់ក្រុមស៊ីក្លូកម្ពុជា បានមកដល់ក្រុងស្ទឹងត្រែង នាព្រឹកថ្ងៃទី៦ ខែមីនា ឆ្នាំ២០២៦ ដើម្បីជាការជំរុញ និងលើកទឹកចិត្តដល់បងៗ អ៊ុំ ពូ ជាម្ចាស់ស៊ីក្លូ ក្នុងដំណើរដ៏វែងឆ្ងាយពីភ្នំពេញ មកដល់ខេត្តស្ទឹងត្រែង មានរយៈពេល៦ថ្ងៃ គឺគិតចាប់ពីថ្ងៃទី១ រហូតដល់ថ្ងៃទី៦ ខែមីនា ឆ្នាំ២០២៦នេះ។

ការផ្សព្វផ្សាយទេសចរណ៍ នៃព្រឹត្តិការណ៍ទេសចរណ៍ បានរៀបចំដោយក្រសួងទេសចរណ៍ សហការជាមួយរដ្ឋបាលខេត្តស្ទឹងត្រែង ដើម្បីបង្ហាញពីសក្តានុពល វិស័យទេសចរណ៍នៅកម្ពុជា និងនៅខេត្តស្ទឹងត្រែង ជាទេសចរណ៍ធម្មជាតិដ៏សម្បូណ៌បែប ជាពិសេសនៅតាមដងទន្លេមេគង្គ ពោពេញដោយព្រៃលិចទឹក និងជាតំបន់រ៉ាមសារ មេគង្គលើ។

លោក ស៊្រន សំឫទ្ធី បានថ្លែងថា ការមកទទួលស្វាគមន៍ដល់ក្រុមស៊ីក្លូកម្ពុជា ក៏បានពាំនាំការសួរសុខទុក្ខពីសំណាក់លោក សរ សុពុត្រា អភិបាលខេត្តស្ទឹងត្រែង ហើយការរៀបចំពិធីនេះឡើងដើម្បីវិស័យទេសចរណ៍ ជំរុញការអភិរក្សស៊ីក្លូ នៅកម្ពុជា និងជំរុញការផ្សព្វផ្សាយបរិស្ថាន អបអរសាទរទិវាជាតិទីក្រុងស្អាតឆ្នាំ២០២៦ ក្រោមប្រធានបទ «សាមគ្គី ដើម្បីទីក្រុងស្អាត»។

សូមបញ្ជាក់ថា នៅថ្ងៃទី៧ ខែមីនា ឆ្នាំ២០២៧ ខេត្តស្ទឹងត្រែង នឹងរៀបចំព្រឹត្តិការណ៍ទេសចរណ៍ ក្រោមប្រធានបទ «ស្ទឹងត្រែងលើសពីទន្លេ លើសពីធម្មតា និងព្យុះហយាត្រា បង្ហាញសម្រស់ក្រុងស្ទឹងត្រែង» ជាដំណើរ ៣ ៥០០ម៉ែត្រ ដើម្បីអបរអរទិវាទីក្រុងស្អាតលើកទី១៤ ឆ្នាំ២០២៦ និងដំណើរទស្សនាទេសចរណ៍ ទេសចរណ៍ផ្សារភ្ជាប់ទឹកដី ជំរុញចលនាទេសចរក្នុងស្រុក ស្រឡាញ់ជាតិ ត្រូវស្គាល់ទឹកដី ផ្តើមចេញពីថ្នាក់ដឹកនាំ មន្រ្តីរាជការទៅកាន់តំបន់ទេសភាព ព្រៃលិចទឹក កោះទន្សាយ រ៉ាមសារមេគង្គលើ (សហគមន៍អេកូទេសចរណ៍បុរីអូរស្វាយ)៕