(កំពង់ធំ)៖ ប្រធានសមាគមអតីតយុទ្ធជន និងនិវត្តិជនកម្ពុជាស្រុកស្ទោង បានលើកឡើងថា ការការឧបត្ថម្ភគាំពារថវិកាបេឡាមរណសង្គ្រោះ ជាការគិតគូរយកចិត្តទុកដាក់ខ្ពស់បំផុតពីសំណាក់សម្ដេចតេជោ ហ៊ុន សែន។

លោក សាយ គឹមឡម បានលើកឡើងដូច្នេះក្នុងឱកាសដែលលោក និងសហការី អញ្ជើញជួបសំណេះសំណាលសួរសុខទុក្ខរំលែកទុក្ខក្រុមគ្រួសារអតីតយុទ្ធជន និងនិវត្តន៍ជនពីរគ្រួសារនៅក្នុងឃុំម្សាក្រងនិងឃុំកំពង់ចិនជើង កាលពីព្រឹកថ្ងៃទី៦ ខែមីនា ឆ្នាំ២០២៦។

លោកបានសង្កត់ធ្ងន់ថា ជានិច្ចជាកាលសម្ដេចតេជោ ហ៊ុន សែន ជាប្រធានសមាគមអតីតយុទ្ធជនកម្ពុជា តែងតែឧបត្ថម្ភថវិកាបេឡាមរណៈសង្គ្រោះ ដែលជាការតបស្នងសងគុណ មិនអាចកាត់ថ្លៃបានដល់អតីតយុទ្ធជន និងនិវត្តជនគ្រប់រូបព្រមទាំងក្រុមគ្រួសារដែលបានលះបង់ និងពលីសព្វបែបយ៉ាងទាំងសាច់ស្រស់ឈាមស្រស់ ដើម្បីបុព្វហេតុជាតិមាតុភូមិសុខសន្តិភាព និងការពារបូរណភាពទឹកដីសុវណ្ណភូមិ នៃយើងពីសង្គ្រាមឈ្លានពានក៏ដូចជា អសន្តិសុខណាមួយឲ្យមានសុវត្ថិភាពបំផុត។

ជាមួយគ្នានេះលោក សាយ គឹមឡម បានជម្រាបអំពីបច្ចុប្បន្នភាព នៃការឈ្លានពានរបស់ថៃ មកលើកម្ពុជា និងបានអំពាវនាវពលរដ្ឋនៅក្នុងមូលដ្ឋានត្រូវមានការជឿជាក់ខ្ពស់បំផុត ដល់ប្រមុខរាជរដ្ឋាភិបាលនៃកម្ពុជា ក្នុងការដោះស្រាយបញ្ហានេះដែលប្រើប្រាស់គ្រប់មធ្យោបាយទាំងផ្លូវច្បាប់ និងការទូតដើម្បីធានានូវសុខសន្តិភាព ជាពិសេសបូរណភាពទឹកដី នៃយើងមិនឱ្យបាត់បង់ទៅសត្រូវណាមួយឡើយ។

លើសពីនេះលោកបានណែនាំអាជ្ញាធរឃុំម្សាក្រង ឃុំកំពង់ចិនជើង ត្រូវពិនិត្យតាមដាន និងយកចិត្តទុកដាក់ខ្ពស់ដល់សុខទុក្ខសុខុមាលភាពជីវភាព អតីតយុទ្ធជន និងក្រុមគ្រួសារនិងពលរដ្ឋទូទៅ ឱ្យបានហ្មត់ចត់បំផុត ជាពិសេសពុកម៉ែបងប្អូនដែលងាយរកហានិភ័យ ហើយត្រូវធ្វើរបាយការណ៍ទៅអាជ្ញាធរពាក់ព័ន្ធ ជាពិសេសទៅរដ្ឋាភិបាលស្រុកស្ទោងក្នុងករណីចាំបាច់បំផុត ដើម្បីធានានូវការជួយ និងសង្គ្រោះក្នុងស្ថានភាពណាមួយ ឱ្យបានទាន់ពេលវេលានិងមានប្រសិទ្ធភាពខ្ពស់។

សូមបញ្ជាក់ថា គ្រួសារសមាគមអតីតយុទ្ធជន និងនិវត្តិជនដែលទទួលបានថវិកាបេឡាមរណៈសង្គ្រោះនៅក្នុងឱកាសនេះគឺឈ្មោះ ថុន រួន នៅក្នុងឃុំម្សាក្រង និងឈ្មោះ ធា យី នៅក្នុងឃុំកំពង់ចិនជើង ស្រុកស្ទោង ខេត្តកំពង់ធំ ដែលក្នុង១គ្រួសារទទួលបានថវិកាចំនួន ៤លានរៀលផងដែរ៕