(ភ្នំពេញ)៖ កាលពីថ្ងៃទី៥ ខែមីនា ឆ្នាំ២០២៦កន្លងទៅនេះ ឃ្លាំងស្តុកអេត​ចាយធំមួយនៅក្នុងភូមិតាំងរបង ឃុំហោងសំណំ ស្រុកឱរ៉ាល់ ខេត្តកំពង់​ស្ពឺ បានរងការឆាបឆេះយ៉ាងសន្ធោសន្ធៅ។ ការឆាបឆេះនោះ បានអូស​បន្លាយរហូតដល់យប់ថ្ងៃទី៦ ខែមីនា មិនទាន់ពន្លត់ឱ្យរលត់ទៅវិញនោះ​ឡើយ បើទោះបីអាជ្ញាធរផ្នែកអគ្គិភ័យបានជួយអន្តរាគមន៍យ៉ាងណាក្តី។

យោងតាមអាជ្ញាធរ បានឱ្យដឹងថា ឃ្លាំងស្តុកអេតចាយនេះ ជាកម្មសិទ្ធិ​របស់​ឈ្មោះ សុខ ហាន ដែលជាអ្នកប្រមូលទិញសំណល់រឹង​សម្រាប់​កែច្នៃ។ ទោះជាយ៉ាងណា មន្ត្រីជំនាញបានរកឃើញថា អាជីវកម្មនេះ ដំណើរ​ការដោយគ្មានលិខិតអនុញ្ញាតពីក្រសួង ឬស្ថាប័នពាក់ព័ន្ធ ជា​ពិសេស​ក្នុងវិស័យបរិស្ថាន។

ការស្រាវជ្រាវដំបូងបង្ហាញថា ភ្លើងបានឆេះសំណល់ជាច្រើនប្រភេទ ដែល​ត្រូវបានស្តុកទុកមិនមានសណ្តាប់ធ្នាប់ រួមមាន ខ្សែអគ្គិសនី​រាប់សិបតោន ខ្សែកាបអគ្គិសនី ម៉ាស៊ីនបោកគក់ចាស់ៗ ម៉ាស៊ីនត្រជាក់ កុងទែនន័រ​ចាស់ ម៉ូតូ ម៉ូតូកង់បី យានយន្តចាស់ សំណល់យន្តហោះខូចមួយគ្រឿង និងលោហធាតុចាស់ជាច្រើនប្រភេទ។ សំណល់ទាំងនេះត្រូវបានស្តុក​លើ​ផ្ទៃ​ដី​ប្រហែល ១.៥ហិកតា។

ហេតុការណ៍អគ្គិភ័យឆេះឃ្លាំងស្តុកអេតចាយនេះ វាជាគ្រោះអកុសល ជា​ការ​ខាតបង់​​សម្រាប់ម្ចាស់ទីតាំង តែវាក៏បានបង្កមហន្តរាយដល់បរិស្ថាន សុខភាពប្រជាពលរដ្ឋយ៉ាងធ្ងន់ធ្ងរផងដែរ។ សំណល់ចម្រុះប្រភេទ ដែល​ជាប្លាស្ទិក និងអេឡិចត្រូនិករងការឆាបឆេះនោះ បានបង្កើតជាផ្សែងខ្មៅ​ខ្មួល​ខ្មាញ់ហ៊ុយទ្រលោមទៅកាន់លំហអាកាស។

មន្ត្រីជំនាញបរិស្ថាន បានអះអាងថា កាកសំណល់ប្លាស្ទិក និងអេឡិចត្រូ​និក មានផលប៉ះពាល់ធ្ងន់ធ្ងរដល់សុខភាព និងបរិស្ថាន បើការទុកដាក់ ឬគ្រប់គ្រងមិនបានត្រឹមត្រូវទេនោះ ហើយការឆាបឆេះបែបនេះ វាបង្ក​មហន្ត​រាយ កាន់តែខ្លាំងថែមទៀតសម្រាប់សុខភាពប្រជាពលរដ្ឋ និង​បរិ​ស្ថាន។

ទីតាំងស្តុកអេតចាយខាងលើនេះ ត្រូវបានរកឃើញថា មិនមានច្បាប់ ហើយទីតាំងទុកដាក់ ក៏មិនបានរៀបចំឱ្យបានត្រឹមត្រូវទៅតាមបទដ្ឋាន​បច្ចេក​​ផងដែរ។ ការធ្វើអាជីវកម្មមិនមានច្បាប់ ការទុកដាក់ ការគ្រប់​គ្រង​សំណល់មិនបានត្រឹមត្រូវតាមបច្ចេកទេស ហើយធ្វេសប្រហែសបង្កឱ្យ​កើតជាអគ្គិភ័យ ម្ចាស់ទីតាំងត្រូវទទួលខុសត្រូវចំពោះមុខច្បាប់ផងដែរ។

យោងតាមក្រមបរិស្ថាន និងធនធានធម្មជាតិ មាត្រា២៧២ ហាមឃាត់​សកម្ម​ភាពស្តុកទុក បញ្ចេញ ដុត កប់ ឬបោះចោលសំណល់គ្រោះថ្នាក់ ដែលអាចបង្កផលប៉ះពាល់ដល់សុខភាពសាធារណៈ បរិស្ថាន ឬទ្រព្យ​សម្បត្តិ។ មាត្រា៨៤៤ កំណត់ថា អ្នកប្រព្រឹត្តអំពើល្មើសបែបនេះ អាច​ប្រឈម​ទោសដាក់ពន្ធនាគារពី ១ ដល់ ៥ឆ្នាំ និងពិន័យជាប្រាក់​រហូត​ដល់ ១០០លានរៀល ក្នុងករណីបន្តប្រព្រឹត្តបទល្មើសដដែល។

ផ្តើមចេញពីហេតុការណ៍ឆេះកន្លែងស្តុកអេតចាយក្នុងខេត្តកំពង់ស្ពឺ ជាមេ​រៀនមួយសម្រាប់អ្នករកស៊ីទិញអេតចាយដើម្បីកែច្នៃ ត្រូវតែស្នើសុំច្បាប់ពី​អាជ្ញាធរពាក់ព័ន្ធ ហើយការរក្សាស្តុកទុកអេតចាយ ត្រូវអនុលោមតាម​បច្ចេកទេសនានា ដើម្បីទប់ស្កាត់ការបង្កផលប៉ះពាល់ផ្នែកបរិស្ថាន និង​បង្ការគ្រោះអគ្គិភ័យ។

អាជ្ញាធររាជធានី ខេត្ត គួរយកចិត្តទុកដាក់ពិនិត្យទីតាំងស្តុកទុកសំណល់​អេត​ចាយពាក់ព័ន្ធនឹងច្បាប់ទម្លាប់ ក៏ដូចជាលក្ខខណ្ឌបច្ចេកទេសនានា ដើម្បីបញ្ចៀសការឆាបឆេះ និងបង្កមហន្តរាយដល់ផ្នែកបរិស្ថាន និងសុខ​ភាពរបស់ប្រជាពលរដ្ឋ៕