ជំហានថ្មីនៃវិស័យអប់រំឌីជីថល នៅសាលាបឋមសិក្សាបុសខ្នុរ ស្រុកចំការលើ ខេត្តកំពង់ចាម
07-03-2026 12:15
(កំពង់ចាម)៖ នាព្រឹកថ្ងៃទី៧ ខែមីនា ឆ្នាំ២០២៦នេះ លោកបណ្ឌិត ងួន វិទូ អនុប្រធានក្រុមការងាររាជរដ្ឋាភិបាលចុះមូលដ្ឋានឃុំបុសខ្នុរ តំណាងលោក ឌួង ឧត្តម អនុប្រធានក្រុមការងាររាជរដ្ឋាភិបាលចុះមូលដ្ឋានស្រុកចំការលើ និងជាប្រធានក្រុមការងារចុះមូលដ្ឋានឃុំបុសខ្នុរ បានអញ្ជើញជាអធិបតីក្នុងពិធីបំពាក់ទូរទស្សន៍ស្មាតធីវី (Smart TV) ចំនួន១៤គ្រឿង ជូនដល់សាលាបឋមសិក្សាបុសខ្នុរ ដើម្បីលើកកម្ពស់គុណភាពបង្រៀន សម្រាប់ឆ្នាំសិក្សា២០២៥-២០២៦។
ក្នុងឱកាសនេះដែរ លោកបណ្ឌិត ងួន វិទូ បានថ្លែងថា ការបំពាក់ស្មាតធីវីនេះ មិនមែនគ្រាន់តែជាការផ្តល់សម្ភារៈប៉ុណ្ណោះទេ ប៉ុន្តែជាការនាំយកបច្ចេកវិទ្យាទំនើបមកជួយឱ្យការរៀនសូត្ររបស់ក្មួយៗកាន់តែមានភាពរស់រវើក និងទាន់សម័យ។ សកម្មភាពនេះឆ្លើយតបយ៉ាងជិតស្និទ្ធទៅនឹង «និយាមការសាលារៀនគំរូ» និងគោលនយោបាយ «ការអប់រំឌីជីថល» របស់ក្រសួងអប់រំ យុវជន និងកីឡា។
លោកបណ្ឌិត បានវាយតម្លៃខ្ពស់ចំពោះការរួមចំណែកពីសំណាក់លោកគ្រូ អ្នកគ្រូ អាណាព្យាបាល និងសប្បុរសជន ដែលជាកម្លាំងចលករយ៉ាងសំខាន់ក្នុងការកសាងបរិយាកាសសិក្សាដ៏ល្អប្រសើរ។
លោកបណ្ឌិត ងួន វិទូ បានផ្ដាំផ្ញើដល់លោកគ្រូ អ្នកគ្រូ សូមជួយថែរក្សាសម្ភារៈទាំងនេះឱ្យបានល្អ ដើម្បីប្រើប្រាស់ជាប្រយោជន៍យូរអង្វែង និងលើកទឹកចិត្តឱ្យក្មួយៗសិស្សានុសិស្សខិតខំរៀនសូត្រ ឱ្យក្លាយជាទំពាំងស្នងឫស្សីដ៏ល្អសម្រាប់ឃុំបុសខ្នុរ និងប្រទេសជាតិទាំងមូល៕
