‎(សៀមរាប)៖ រដ្ឋបាលខេត្តសៀមរាប នៅថ្ងៃទី០៧ ខែមីនា ឆ្នាំ២០២៦នេះ បានរៀបចំពិធីអបអរសាទរខួបលើកទី១១៥ ទិវាអន្តរជាតិនារី ៨មីនា ក្រោមអធិបតីភាព លោកស្រី ម៉ននី រង្សី អភិបាលរងខេត្តសៀមរាប ដោយមានការចូលរួមពីសមាជិកាក្រុមប្រឹក្សាខេត្ត ថ្នាក់ដឹកនាំ និងតំណាងមន្ទីរ-អង្គភាពជុំវិញខេត្តប្រមាណជាង ៣០០នាក់។

ថ្លែងក្នុងឱកាសនោះ លោកស្រី ម៉ននី រង្សី បានលើកឡើងថា ក្រោមការដឹកនាំប្រកបដោយគតិបណ្ឌិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា រាជរដ្ឋាភិបាលនៅតែបន្តកំណត់យកការលើកកម្ពស់សមភាពយេនឌ័រ និងការបង្កើនភាពអង់អាចរបស់ស្ត្រី នៅគ្រប់វិស័យជាអាទិភាពចម្បង។

‎លោកស្រីបានបន្តថា ប្រធានបទ «សន្តិភាព និងសន្តិសុខ សម្រាប់ស្ត្រី និងគ្រួសារ» សម្រាប់ឆ្នាំ២០២៦នេះ គឺជាការរំលឹកដល់គ្រប់មជ្ឈដ្ឋានថា បើគ្មានសន្តិភាព គឺគ្មានការអភិវឌ្ឍ ហើយបើគ្មានសន្តិសុខក្នុងគ្រួសារ ស្ត្រីក៏មិនអាចបញ្ចេញសក្ដានុពលបានពេញលេញនោះដែរ។

‎លោកស្រីបន្តថា សន្តិភាពមិនមែនមានន័យត្រឹមតែការអវត្តមាននៃសង្គ្រាមប៉ុណ្ណោះទេ ប៉ុន្តែវារួមបញ្ចូលទាំងសន្តិសុខ សុវត្ថិភាពពីការរំលោភបំពាន និងភាពសុខដុមរមនាក្នុងគ្រួសារ។ ជាមួយគ្នានេះ ស្ត្រីគឺជាកម្លាំងចលករយ៉ាងសំខាន់ក្នុងការថែរក្សាសន្តិភាព និងសន្តិសុខ ទាំងក្នុងកម្រិតគ្រួសារ និងសង្គមជាតិទាំងមូល។

លោកស្រីក៏បានរំលឹកដោយដឹងគុណយ៉ាងជ្រាលជ្រៅចំពោះ «វីរភាពស្ត្រីកម្ពុជា» ដែលបានលះបង់គ្រប់បែបយ៉ាងក្នុងបុព្វហេតុការពារជាតិ មាតុភូមិ ជាពិសេសក្នុងអំឡុងពេលជម្លោះព្រំដែនកាលពីពេលកន្លងទៅ ដែលក្នុងនោះស្ត្រីបានដើរតួនាទីជាវីរៈកងទ័ព និងនគរបាលការពារព្រំដែន ឈរជើងយ៉ាងរឹងមាំនៅសមរភូមិមុខ។ ស្ត្រីក៏បានផ្តល់សេវាសាធារណៈ និងជួយសង្គ្រោះយុទ្ធជន ជាពិសេសការចូលរួមរៀបចំស្បៀងអាហារ និងសម្ភារៈប្រើប្រាស់ផ្គត់ផ្គង់ដល់កងទ័ព និងប្រជាពលរដ្ឋភៀសសឹកផងដែរ។

‎លោកស្រីបញ្ជាក់ថា ពិធីនេះមិនត្រឹមតែជាការរំលឹកពីប្រវត្តិសមរភូមិតស៊ូទាមទារសិទ្ធិសេរីភាពរបស់ស្ត្រីលើសកលលោកប៉ុណ្ណោះទេ ប៉ុន្តែវាក៏ជាឱកាសសម្រាប់ឆ្លុះបញ្ចាំងពីវឌ្ឍនភាព បញ្ហាប្រឈម និងការដាក់ចេញនូវវិធានការវិជ្ជមាននានា ដើម្បីបន្តជំរុញភាពអង់អាចរបស់ស្ត្រីក្នុងសង្គមទំនើប។

‎ជាមួយនេះដែរ លោកស្រី ម៉ននី រង្សី ក៏បាននាំយកអំណោយដ៏ថ្លៃថ្លារបស់លោក ប្រាក់ សោភ័ណ អភិបាលខេត្តសៀមរាប ចែកជូនដល់អ្នកចូលរួមទាំងជាង ៣០០នាក់ ដោយក្នុងម្នាក់ៗ ទទួលបានសំពត់ស៊ឹងខ្មែរចំនួន១ និងថវិកាចំនួន ១០ម៉ឺនរៀល ដើម្បីជាការលើកទឹកចិត្ត និងអបអរសាទរក្នុងទិវាដ៏មានអត្ថន័យនេះ៕