(ភ្នំពេញ)៖ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ លោក ឃឹម ហ្វីណង់ បានប្រាប់អង្គភាពព័ត៌មាន Fresh News ថា ពាក់ព័ន្ធនឹងបញ្ហាផ្គត់ផ្គង់ប្រេងឥន្ធនៈ ក្រសួងកសិកម្ម លើកទឹកចិត្តប្រជាកសិករ បន្តតាមដាន និងអនុវត្តតាមការណែនាំរបស់ក្រសួងរ៉ែ និងថាមពល និងក្រសួងពាណិជ្ជកម្ម។

លោក ឃឹម ហ្វីណង់ បានបញ្ជាក់ថា ក្រសួងកសិកម្មកំពុងតាមដានយ៉ាងយកចិត្តទុកដាក់ ចំពោះក្តីកង្វល់របស់បងប្អូនកសិករ ពាក់ព័ន្ធនឹងបញ្ហាផ្គត់ផ្គង់ប្រេងឥន្ធនៈ។

អ្នកនាំពាក្យរូបនេះ បានបន្ថែមថា ក្រសួងកសិកម្ម បាននិងកំពុងពិភាក្សាករណីនេះជាមួយក្រសួងពាក់ព័ន្ធ ដើម្បីសម្របសម្រួលបញ្ហាប្រឈមលើការខ្វះខាតប្រេងម៉ាស៊ូតសម្រាប់កសិករប្រើប្រាស់។

លោក បានមានប្រសាសន៍ដូច្នេះថា៖ «ក្រសួងកសិកម្មកំពុងតាមដានយ៉ាងយកចិត្តទុកដាក់ ចំពោះក្តីកង្វល់របស់ពុកម៉ែមាមីងបងប្អូនកសិករ ពាក់ព័ន្ធនឹងបញ្ហាផ្គត់ផ្គង់ប្រេងឥន្ធនៈ ហើយឯកឧត្តមរដ្ឋមន្ត្រីក៏បានពិភាក្សាពីករណីនេះជាមួយឯកឧត្តមរដ្ឋមន្ត្រីក្រសួងរ៉ែ និងថាមពល និងលោកជំទាវរដ្ឋមន្ត្រីក្រសួងពាណិជ្ជកម្មផងដែរ»។

«ក្នុងអំឡុងពេលនេះ ក្រសួងសូមលើកទឹកចិត្តដល់បងប្អូនប្រជាកសិករទាំងអស់ឱ្យបន្តតាមដានព័ត៌មាន និងអនុវត្តតាមការណែនាំរបស់ក្រសួងជំនាញទាំងពីរឱ្យបានខ្ជាប់ខ្ជួន»។ នេះបើតាមការបញ្ជាក់បន្ថែមរបស់ លោក ឃឹម ហ្វីណង់ ក្រោយសង្គ្រាមនៅមជ្ឃិមបូព៌ាបានផ្ទុះឡើង បញ្ហាតម្លៃប្រេងនៅលើសកលលោកមានការប្រែប្រួល រួមទាំងកម្ពុជាផងដែរ។ មានសេចក្តីរាយការណ៍ថា បញ្ហាថ្លៃប្រេង បានធ្វើឱ្យតាមបណ្ដាស្ថានីយ៍សាំងមួយចំនួនផ្អាកការលក់ជាកាដុង ឬឈានដល់ការផ្អាកការផ្គត់ផ្គង់ប្រេងតែម្ដង ដែលធ្វើឱ្យមានការលំបាកដល់កសិករ ក្នុងការធ្វើកសិកម្ម។

ទោះជាយ៉ាងនេះក្តី លោក កែវ រតនៈ រដ្ឋមន្ត្រីក្រសួងរ៉ែ និងថាមពល កាលពីថ្ងៃទី៨ ខែមីនា ឆ្នាំ២០២៦ បានថ្លែងថា បើទោះបីសង្គ្រាមនៅមជ្ឈឹមបូព៌ា កម្ពុជាមិនទាន់មានស្ថានភាពខ្វះប្រេងបម្រុងនោះទេ សន្និធិបម្រុងរបស់កម្ពុជាអាចឈរជើងបាន២១ថ្ងៃ មានន័យថា បើក្រុមហ៊ុនប្រេងមិនអាចនាំចូលប្រេងពីពិភពលោកបាន គឺយើងអាចឈរជើងបាន២១ថ្ងៃ។

ក្រសួងពាណិជ្ជកម្ម កាលពីម្សិលមិញដដែល បានចេញប្រកាសអំពីតម្លៃប្រេងកើនឡើង សម្រាប់ថ្ងៃទី៨ ដល់ទី១០ ខែមីនា ឆ្នាំ២០២៦ ក្នុងនោះ សាំង = ៤,៤០០រៀល និង ម៉ាស៊ូត = ៥,១៥០រៀល៕