(ខេត្តតាកែវ)៖ លោក កង អាណាន់ អភិបាលក្រុងដូនកែវ គ្រោងរៀបចំដំឡើងអំពូលសូឡា ដើរដោយថាមពលព្រះអាទិត្យ (Solar Light) ជាង ៣០០កន្លែង នៅបណ្ដោយផ្លូវឆ្លងកាត់ភូមិសាស្រ្តស្ពានចុងថ្នល់ រហូតដល់វត្តធន់មន់ ដែលមានប្រវែងប្រមាណជិត ៧,០០០ ម៉ែត្រ ស្ថិតនៅក្នុងសង្កាត់បារាយណ៍។

ក្នុងឱកាសចុះពិនិត្យផ្ទាល់ក្រុមបច្ចេកទេស រៀបចំតម្លើងបង្គោលភ្លើងសូឡា នាព្រឹកថ្ងៃចន្ទ ទី០៩ ខែមីនា ឆ្នាំ២០២៦ លោក កង អាណាន់ អភិបាលក្រុងដូនកែវ បានថ្លែងថា លោកបានរៀបចំយុទ្ធនាការ «ផ្ទះ១ សូឡា១» ដោយធ្វើការគៀងគរថវិកា ពីសប្បុរសជនជិតឆ្ងាយ ចូលរួម ដើម្បីឆ្លើយតបទៅនឹងតម្រូវការរបស់ប្រជាពលរដ្ឋ ពិសេសបានដាក់នៅភ្លើងអំពូលសូឡា ក៏ដូចជាការកែលម្អសោភ័ណភាពក្នុងមូលដ្ឋាន។

លោកអភិបាលក្រុងបានបន្តថា ការដំឡើងនេះ មិនត្រឹមតែជួយ ឱ្យភូមិឃុំមានពន្លឺចែងចាំង នៅពេលរាត្រីប៉ុណ្ណោះទេ ប៉ុន្តែវាក៏ជាផ្នែកមួយនៃយុទ្ធសាស្ត្រភូមិ-ឃុំ មានសុវត្ថិភាពផងដែរ។ ការដាក់អំពូលសូឡានេះ គឺដើម្បីកាត់បន្ថយគ្រោះថ្នាក់ ចរាចរណ៍នៅពេលយប់ ដោយសារអ្នកបើកបរមានភាពងាយស្រួល ក្នុងការមើលផ្លូវ និងជួយបង្ការសកម្មភាព មិនប្រក្រតីផ្សេងៗ និងផ្តល់ភាពកក់ក្តៅដល់ប្រជាពលរដ្ឋ ដែលធ្វើដំណើរពេលយប់អាធ្រាត្រ។

តំណាងបងប្អូនប្រជាពលរដ្ឋម្នាក់ បានសម្តែងនូវក្តីសប្បាយរីករាយយ៉ាងខ្លាំង ចំពោះការយកចិត្តទុកដាក់របស់អាជ្ញាធរ រដ្ឋបាលក្រុងដូនកែវ ដោយកាលពីមុនបណ្ដោយផ្លូវនេះ មានភាពងងឹតខ្លាំងដែលបង្កការភ័យខ្លាច ប៉ុន្តែពេលនេះ លោកអភិបាលក្រុង បានរៀបចំយុទ្ធនាការនេះ គឺសូមគាំទ្រពេញទំហឹង៕