សមាគមធនាគារនៅកម្ពុជា នាំយកថវិកា សម្ភារៈប្រើប្រាស់ និងស្បៀងអាហារសម្រាប់ចែកជូនគ្រួសារភៀសសឹក និងវីរកងទ័ពជួរមុខ
09-03-2026 14:51
(កោះកុង)៖ សមាគមធនាគារនៅកម្ពុជា (ABC) ដឹកនាំដោយលោក រ័ត្ន សោភ័ណ ប្រធានសមាគម, លោក តូច ចៅចេក សមាជិកក្រុមប្រឹក្សាភិបាល និងសមាជិកគ្រឹះស្ថានធនាគារ ព្រមទាំង គណៈគ្រប់គ្រងលេខាធិការដ្ឋានសមាគម នាថ្ងៃទី០៧ ខែមីនា ឆ្នាំ២០២៦ បាននាំយកជំនួយសប្បុរសធម៌ រួមមានៈថវិកា ៨លានរៀល ស្បៀងអាហារ និងសម្ភារៈប្រើប្រាស់មួយចំនួនជូនដល់រដ្ឋបាលខេត្តកោះកុង សម្រាប់ចែកជូនដល់ក្រុមគ្រួសារភៀសសឹក និងវីរកងទ័ពជួរមុខ នៅក្នុងភូមិសាស្រ្តខេត្តកោះកុងទាំងមូល។
ក្នុងឱកាសនោះលោកស្រី ឈី វ៉ា អភិបាលខេត្តកោះកុង ព្រមទាំងក្រុមការងាររបស់រដ្ឋបាលខេត្តកោះកុង បានអញ្ជើញទទួល និងសា្វគមន៍ដោយផ្ទាល់ដល់គណៈប្រតិភូពីសមាគមធនាគារនៅកម្ពុជា។
នាឱកាសនោះលោក រ័ត្ន សោភ័ណ បានបញ្ជាក់ថា ការនាំយកជំនួយសប្បុរសធម៌ជូនដល់រដ្ឋបាលខេត្តកោះកុង គឺបង្ហាញពីឆន្ទៈ និងការចូលរួមចំណែករបស់វិស័យធនាគារក្នុងការជួយសម្រាលការលំបាកដល់ប្រជាពលរដ្ឋដែលជាជនភៀសសឹក ក៏ដូចជាវីរកងទ័ពជួរមុខ ដែលកំពុងប្រឈមការលំបាកដោយសារការឈ្លានពីសំណាក់យោធាថៃមកលើកម្ពុជា។ លោកក៏បានថ្លែងអំណរគុណយ៉ាងជ្រាលជ្រៅចំពោះលោកស្រីអភិបាលខេត្តកោះកុង ដែលបានជួយសម្រួលដល់ប្រតិបត្តិការនានារបស់សាខាគ្រឹះស្ថានធនាគារនៅទូទាំងខេត្តកោះកុងផងដែរ។
ជាការឆ្លើយតប លោកស្រី ឈី វ៉ា បានថ្លែងអំណរគុណចំពោះសមាគមធនាគារនៅកម្ពុជា ដែលបានយកចិត្តទុកដាក់ក្នុងការចូលរួមផ្ដល់ជាជំនួយសប្បុរសធម៌នេះសម្រាប់ចែកជូនដល់ក្រុមគ្រួសារពលរដ្ឋភៀសសឹក ដែលកំពុងជួបប្រឈមបញ្ហាដោយសារការឈ្លានពានរបស់ប្រទេសថៃមកលើកម្ពុជា។
ក្នុងឱកាសនោះ លោកប្រធានសមាគមធនាគារ ក៏បានជម្រាបជូនលោកស្រីអភិបាលខេត្តកុះកុងថា នាពេលកន្លងទៅ សមាគមធនាគារនៅកម្ពុជា ធ្លាប់បាននាំយកជំនួយសប្បុរសធម៌ជាថវិកា និងស្បៀងអាហារ ព្រមទាំងសម្ភារៈប្រើប្រាស់ចាំបាច់មួយចំនួន ជូនដល់រដ្ឋបាលខេត្តដែលនៅជាប់ព្រំដែនកម្ពុជា-ថៃ។ លើសពីនេះសមាគមធនាគារនៅកម្ពុជា ធ្លាប់បានចុះចែកជូនជំនួយដោយផ្ទាល់ ជូនដល់ប្រជាពលរដ្ឋជាជនភៀសសឹក និងកងទ័ពជួរមុខផងដែរ។
លោកបន្តថា ជំនួយសប្បុរសធម៌នេះ គឺបន្ថែមទៅលើអ្វីដែលគ្រឹះស្ថានធនាគារបានផ្តល់ជូនប្រជាពលដ្ឋភៀសសឹក និងវីរកងទ័ពជួរមុខ ជាពិសេសការប្តេជ្ញាចិត្តរបស់វិស័យធនាគារក្នុងការអនុវត្តតាមសេចក្តីជូនដំណឹងរបស់ធនាគារជាតិនៃកម្ពុជាចុះថ្ងៃទី១ ខែមករា ឆ្នាំ២០២៦ និងសេចក្តីណែនាំស្តីពី វិធានការជួយសម្រាលបន្ទុកដល់ប្រជាពលរដ្ឋដែលរងផលប៉ះពាល់ពីជម្លោះព្រំដែនកម្ពុជា-ថៃចុះថ្ងៃទី១០ ខែធ្នូ ឆ្នាំ២០២៥ ដោយធ្វើការលើកលែងការទូទាត់ការប្រាក់ ព្រមទាំងពន្យាពេលទូទាត់សងប្រាក់ដើមរហូតដល់ថ្ងៃទី៣១ ខែឧសភា ឆ្នាំ២០២៦ សម្រាប់យោធិនជួរមុខ ដែលធ្វើប្រតិបត្តិការដោយផ្ទាល់នៅក្នុងសមរភូមិប្រយុទ្ធ និងលើកលែងការទូទាត់ការប្រាក់ ព្រមទាំងពន្យាពេលទូទាត់សងប្រាក់ដើមរហូតដល់ថ្ងៃទី៣១ ខែមីនា ឆ្នាំ២០២៦។
សូមបញ្ជាក់ដែរថា កាលពីថ្ងៃទី២៨ ខែកុម្ភៈ និងថ្ងៃទី០១ ខែមីនា ឆ្នាំ២០២៦ សមាគមធនាគារនៅកម្ពុជា ក៏បាននាំយកជំនួយឧបត្ថម្ភរួមមាន ជាស្បៀងអាហារ និងសម្ភារៈប្រើប្រាស់ចាំបាច់ប្រចាំថ្ងៃ ជូនដល់ក្រុមគ្រួសារភៀសសឹកប្រមាណជាង ៨០០គ្រួសារ ដែលកំពុងស្នាក់អាស្រ័យបណ្ដោះអាសន្ន នៅមណ្ឌលសុវត្ថិភាពចំនួន ២ទីតាំងផ្សេងគ្នា ក្នុងខេត្តឧត្ដរមានជ័យ និងខេត្តព្រះវិហារផងដែរ៕
