(ភ្នំពេញ)៖ សាកលវិទ្យាល័យវេស្ទើន បានរៀបចំ «វេទិកាស្ត្រី ២០២៦៖ ស្ត្រីក្នុងរបត់ថ្មី» នាចុងសប្ដាហ៍នេះ ដើម្បីអបអរសាទរខួបលើកទី១១៥ នៃទិវាអន្តរជាតិនារី ៨មីនា ក្រោមអធិបតីភាព លោកស្រីបណ្ឌិត គ្រី ណាល់លីស រដ្ឋលេខាធិការនៃក្រសួងកិច្ចការនារី និងលោក តែ ឡូរិន ប្រធានក្រុមប្រឹក្សាភិបាល រួមជាមួយថ្នាក់ដឹកនាំ នៃសាកលវិទ្យាល័យវេស្ទើន ជាពិសេស ក៏មានការចូលរួមពីវាគ្មិនកិត្តិយស ដែលអញ្ជើញមកពីស្ថាប័នរដ្ឋ និងឯកជន ព្រមទាំងមានការចូលរួមពីនិស្សិត សាស្ត្រាចារ្យ យុវជនប្រមាណជាង ៥០០នាក់។

វេទិកានៅឆ្នាំនេះ ត្រូវបានរៀបចំឡើងក្នុងគោលបំណងលើកកម្ពស់សក្ដានុពល និងភាពជាអ្នកដឹកនាំរបស់ស្ត្រីក្នុងសម័យកាលឌីជីថល ដោយផ្ដោតសំខាន់លើសសរស្តម្ភចំនួន៣ គឺ៖ អំណាចនៃចំណេះដឹង, ហិរញ្ញវត្ថុ និងនិរន្តរភាពសង្គម។

លោក តែ ឡូរិន បានថ្លែងថា វេទិកានេះ មិនត្រឹមតែជាការអបអរសាទរពិធីបុណ្យសិទ្ធិនារីប៉ុណ្ណោះទេ ប៉ុន្តែគឺជាការបើកឱកាសឱ្យយុវជនបន្តវេន បានក្រេបជញ្ជក់នូវពុទ្ធិ និងបទពិសោធន៍ជាក់ស្ដែងពីស្ត្រីជួរមុខ ដែលពោរពេញដោយស្នាដៃ និងទេពកោសល្យ ក្នុងការចូលរួមបំពេញបុព្វហេតុអភិវឌ្ឍជាតិមាតុភូមិ។

ក្នុងកិច្ចសន្ទនាដ៏ផុសផុលនេះ វាគ្មិនកិត្តិយសមកពីក្រសួងអប់រំ យុវជន និងកីឡា, គណៈមេធាវី ក្រសួងប្រៃសណីយ៍ និងទូរគមនាគមន៍ ព្រមទាំងថ្នាក់ដឹកនាំមកពីវិស័យធនាគារ និងសហគ្រិនភាព បានចែករំលែកនូវឧត្តមទស្សនវិស័យជុំវិញការបំបែកឧបសគ្គ ការកសាងឯករាជ្យភាពហិរញ្ញវត្ថុ និងការត្រៀមខ្លួនរបស់ស្ត្រីក្នុងរបត់ថ្មីនៃបច្ចេកវិទ្យា។

បើតាមលោក លឹម ខេវិន តំណាងសាកលវិទ្យាល័យ បានឲ្យដឹងថា វត្តមានដ៏ខ្ពង់ខ្ពស់របស់តំណាងក្រសួងពាក់ព័ន្ធ និងដៃគូយុទ្ធសាស្ត្រនានា បានសបញ្ជាក់ឱ្យឃើញ ពីការយកចិត្តទុកដាក់ខ្ពស់លើសមភាពយេនឌ័រ និងការផ្ដល់តម្លៃដល់តួនាទីស្ត្រីដែល «មានសមត្ថភាពលើសពីមាតា» ពោលគឺជាអ្នកដឹកនាំ និងជាអ្នកច្នៃប្រឌិតដ៏មានឥទ្ធិពលក្នុងសង្គម។

គួរបញ្ជាក់ថា កម្មវិធីនេះ បានបញ្ចប់ទៅដោយជោគជ័យយ៉ាងត្រចះត្រចង់ ជាមួយនឹងការប្ដេជ្ញាចិត្តខ្ពស់ ក្នុងការបន្តជំរុញឱ្យមានវេទិកាពិភាក្សាបែបបញ្ញវន្តបែបនេះ ជាបន្តបន្ទាប់ទៀត ដើម្បីជាប្រយោជន៍មហាសាលដល់និស្សិតគ្រប់រូប និងដើម្បីជាការលើកតម្កើនដល់ស្ត្រីគ្រប់រូបយ៉ាងពិតប្រាកដ៕