(ព្រះវិហារ)៖ កម្មវិធីពិនិត្យ ព្យាបាល និងវះកាត់ជំងឺភ្នែក ព្រមទាំងផ្ដល់វ៉ែនតាដោយឥតគិតថ្លៃ ត្រូវបានរៀបចំឡើងចាប់ពីថ្ងៃទី០៩ ដល់ថ្ងៃទី១៣ ខែមីនា ឆ្នាំ២០២៦ នៅមណ្ឌលសុខភាពកំពង់ស្រឡៅ ស្ថិតក្នុងឃុំកំពង់ស្រឡៅ១ ស្រុកឆែប ខេត្តព្រះវិហារ ជាប់ព្រំដែនឡាវ ដើម្បីផ្តល់សេវាសុខភាពភ្នែកជូនប្រជាពលរដ្ឋដោយឥតគិតថ្លៃ។

ពិធីនេះបានធ្វើឡើងក្រោមវត្តមាន លោកសាស្រ្តាចារ្យ ងី ម៉េង ទីប្រឹក្សាក្រសួងសុខាភិបាល ជានាយកមន្ទីរពេទ្យមិត្តភាពខ្មែរ–សូវៀត និងជាប្រធានកម្មវិធីជាតិសុខភាពភ្នែក រួមជាមួយ លោកវេជ្ជបណ្ឌិត គួង ឡូ ទីប្រឹក្សាក្រសួងសុខាភិបាល និងជាប្រធានមន្ទីរសុខាភិបាលខេត្តព្រះវិហារ និង លោក ឃិត សុធារ៉ា អភិបាលស្រុកឆែប ព្រមទាំងមន្ត្រីពាក់ព័ន្ធ និងប្រជាពលរដ្ឋជាច្រើនរូបបានចូលរួមផងដែរ។

កម្មវិធីនេះត្រូវបានរៀបចំឡើងក្នុងគោលបំណងផ្តល់សេវាពិនិត្យ ព្យាបាល និងវះកាត់ជំងឺភ្នែកជូនប្រជាពលរដ្ឋនៅតំបន់ជនបទ និងតំបន់ឆ្ងាយដាច់ស្រយាល ដើម្បីជួយកាត់បន្ថយបញ្ហាពិការភ្នែក និងជំងឺភ្នែកផ្សេងៗ ព្រមទាំងលើកកម្ពស់សុខភាពភ្នែករបស់ប្រជាពលរដ្ឋឱ្យកាន់តែប្រសើរឡើង។

កម្មវិធីនេះទទួលបានការឧបត្ថម្ភគាំទ្រថវិកាពី អង្គការ Eye Care Foundation និងការឧបត្ថម្ភវ៉ែនតាពី អង្គការ Fred Hollows Foundation ខណៈដែលផ្នែកបច្ចេកទេសត្រូវបានគាំទ្រដោយកម្មវិធីជាតិសុខភាពភ្នែក និងមន្ទីរសុខាភិបាល នៃរដ្ឋបាលខេត្តព្រះវិហារ។

តាមការគ្រោងទុក ក្រុមគ្រូពេទ្យជំនាញនឹងផ្តល់សេវាពិនិត្យ ព្យាបាល វះកាត់ជំងឺភ្នែក និងផ្តល់វ៉ែនតាជូនប្រជាពលរដ្ឋដោយឥតគិតថ្លៃ ក្នុងរយៈពេល៥ថ្ងៃ ដើម្បីឱ្យប្រជាពលរដ្ឋដែលមានបញ្ហាភ្នែកទទួលបានការថែទាំសុខភាពភ្នែកបានទាន់ពេលវេលា និងមានប្រសិទ្ធភាព៕