(កំពង់ចាម)៖ ក្រោយមានការស្នើសុំអន្តរាគមន៍ដោះស្រាយផលប៉ះពាល់ពីសកម្មភាពរោងចក្រកែច្នៃកម្ទេចឈើ (ម្ចាស់ជាជនជាតិចិន) ស្ថិតនៅភូមិសាមគ្គី ឃុំបុសខ្នុរ ស្រុកចំការលើ, លោក អ៊ុន ចាន់ដា អភិបាលខេត្តកំពង់ចាម បានចាត់ឲ្យនាយខណ្ឌរដ្ឋបាលព្រៃឈើកំពង់ចាមត្រើយឆ្វេង ដឹកនាំមន្ត្រីសង្កាត់រដ្ឋបាលព្រៃឈើចំការលើ សហការជាមួយអាជ្ញាធរឃុំបុសខ្នុរ ចុះពិនិត្យរោងចក្រកែច្នៃកំទេចឈើមួយកន្លែង ស្ថិតនៅភូមិ១០មករា ឃុំបុសខ្នុរ ស្រុកចំការលើ។

បន្ទាប់ពីបានពិនិត្យជាក់ស្តែងក្នុងបរិវេណក្នុងរោងចក្រកែច្នៃកំទេចឈើ ជាលទ្ធផលមន្ត្រីជំនាញបានឃើញមានកំទេចអាចម៌រណា សំបកឈើ និងបណ្តូលឈើកែច្នៃរួចគរជាគំនរ ដែលជាវត្ថុធាតុដើមសម្រាប់កែច្នៃធ្វើជាធ្យូងអនាម័យ (តូចៗល្អិត) និងមានគ្រឿងចក្រ (សាសឺរ) ២គ្រឿង រថយន្ត១គ្រឿង ខ្សែច្រវាក់ផលិតកម្ម និងម៉ាស៊ីនសម្លុត សម្រាប់ដំណើរការផលិតធ្យូងអនាម័យ។

តាមការសាកសួរលោក វូ ឈីងឡាំង (WU QINGLIANG) ជាអ្នកគ្រប់គ្រងរោងចក្រកែច្នៃធ្យូងនេះ បានប្រាប់ថា រោងចក្រនេះពុំទាន់មានច្បាប់អនុញ្ញាតនៅឡើយទេ មានតែលិខិតទទួលស្គាល់កិច្ចសន្យាការពារបរិស្ថាន និងការកាត់បន្ថយផលប៉ះពាល់បរិស្ថានចេញដោយមន្ទីរបរិស្ថានខេត្តកំពង់ចាម។

ក្រោយមានបណ្តឹងពីប្រជាពលរដ្ឋដែលរស់នៅជុំវិញរោងចក្រពីផលប៉ះពាល់ការរំខានដោយសំលេង និងបំពុលខ្យល់, កន្លងមកអាជ្ញាធរឃុំ ធ្លាប់បានចុះមកធ្វើកិច្ចសន្យាកាលពីថ្ងៃទី៣០ ខែធ្នូ ឆ្នាំ២០២៥ ដោយឲ្យអ្នក គ្រប់គ្រងធ្វើយ៉ាងណាកុំឱ្យមានការផលប៉ះពាល់ដែលបង្កឡើងពីលំអងធូលីចេញពីកំទេចឈើហុយ និងសំលេងរំខានដល់ការរស់នៅរបស់ប្រជាពលរដ្ឋរស់នៅក្បែរខាង ដោយទុករយៈពេលរហូត ដល់ដំណាច់ខែកុម្ភៈ ឆ្នាំ២០២៦។

ក្រោយពេលចុះពិនិត្យជាក់ស្តែង អាជ្ញាធរមូលដ្ឋានឃុំ និងសមត្ថកិច្ចរដ្ឋបាលព្រៃឈើ បានឃើញថា នៅតែមានផលប៉ះពាល់ដល់ប្រជាពលរដ្ឋដដែល។ តាមការបញ្ជាក់ពីលោកមេភូមិ១០ មករា និងលោកអនុភូមិសាមគ្គី បានប្រាប់ថា រាល់ថ្ងៃនេះប្រជាពលរដ្ឋរស់នៅជិតនេះ មានការលំបាកក្នុងរស់នៅដោយប៉ះពាល់ដល់សុខភាព និងដំណាំកសិកម្មរបស់ពួកគាត់។ ក្នុងនោះភូមិ១០ មករា បានប៉ះពាល់ដល់ប្រជាពលរដ្ឋប្រមាណ ១៥០គ្រួសារ និងភូមិសាមគ្គីប្រមាណ ២០០គ្រួសារ។

អាជ្ញាធរមូលដ្ឋាន និងសមត្ថកិច្ច បានសម្រេចឱ្យអ្នកគ្រប់គ្រងផ្អាកសកម្មភាពកែច្នៃជាបណ្ដោះអាសន្នសិន រង់ចាំធ្វើការកែលម្អខ្សែច្រវ៉ាក់ផលិតកម្មរបស់គាត់ កុំឱ្យមានផលប៉ះពាល់ដល់ប្រជាពលរដ្ឋ និងមានច្បាប់អនុញ្ញាតត្រឹមត្រូវ ទើបឱ្យដំណើរការបន្តទៀត៕