លោក កែវ រតនៈ៖ ការព្យាករណ៍របស់ពិភពលោក វិបត្តិប្រេងឥន្ធនៈអូសបន្លាយ មិនយូរទេ សូមចូលរួមប្រើប្រាស់ដោយសន្សំសំចៃ (Video inside)
11-03-2026 19:02
(ភ្នំពេញ)៖ ដោយផ្អែកតាមការព្យាករណ៍របស់ពិភពលោក លោក កែវ រតនៈ រដ្ឋមន្ត្រីក្រសួងរ៉ែ និងថាមពល បានឱ្យដឹងថា វិបត្តិប្រេងឥន្ធនៈអូសបន្លាយមិនយូរនោះឡើយ បើទោះបីជាយ៉ាងណាលោករដ្ឋមន្ត្រី បានអំពាវនាវដល់ប្រជាពលរដ្ឋប្រើប្រាស់ប្រេងឥន្ធនៈសន្សំសំចៃឆ្លើយតបទៅនឹងវិបត្តិនាពេលបច្ចុប្បន្ន។
លោក កែវ រតនៈ បានឱ្យដឹងផងដែរថា មកទល់ពេលបច្ចុប្បន្ននេះ កម្ពុជានៅតែរកបានប្រភពប្រេងមកផ្គត់ផ្គង់ការប្រើប្រាស់ គ្រាន់តែប្រែប្រួលតម្លៃ។
ប្រាប់ Fresh News ក្រោយជំនួបជាមួយអ្នកធ្វើធុរកិច្ចរបស់អាមេរិកនៅក្រុមប្រឹក្សាអភិវឌ្ឍន៍កម្ពុជានារសៀលថ្ងៃពុធ ទី១១ ខែមីនា ឆ្នាំ២០២៦នេះ លោក កែវ រតនៈ បានបញ្ជាក់យ៉ាងដូច្នេះ «មកទល់ពេលនេះប្រេងរបស់យើងនៅតែមានការនាំចូលជាបន្តបន្ទាប់។ មានន័យថា ប្រភពនៅតែរកបាន គ្រាន់តែតម្លៃវាកើនឡើង១០ ២០ ៣០ភាគរយជាបន្តបន្ទាប់អ៊ីចឹងទៅ។ ដូច្នេះក្នុងស្ថានភាពនេះ យើងអត់ទាន់ប្រកាសអាសន្នដូចប្រទេសមួយចំនួនទេ»។
បើតាមលោក កែវ រតនៈ ការកើនឡើងតម្លៃប្រេងឥន្ធនៈនេះ ក៏ធ្វើឱ្យប៉ះពាល់ដល់ច្រវាក់តម្លៃនៃការផលិតអគ្គិសនីនៅកម្ពុជាមួយចំនួនផងដែរ។ បើតាមលោក កែវ រតនៈ ការផលិតថាមពលអគ្គិសនីនៅកម្ពុជា មានប្រភពមួយចំនួនបានប្រើប្រាស់ប្រេងឥន្ធនៈ។ បើទោះបីប៉ះពាល់ច្រវាក់តម្លៃនៃការផលិតថាមពលអគ្គិសនី ប៉ុន្តែកម្ពុជា មិនទាន់ដំឡើងថ្លៃអគ្គិសនីនោះឡើយ។
សូមបញ្ជាក់ថា ផ្តើមពីសង្គ្រាមរវាងអាមេរិក-អ៉ីស្រាអែល ជាអ៉ីរ៉ង់ បានធ្វើឱ្យកើតវិបត្តិនៃការចម្រាញ់ ក៏ដូចជាការដឹកជញ្ជូនប្រេងឥន្ធនៈ។ ប្រទេសនៅលើពិភពលោក ជាពិសេសនៅអាស៊ីកំពុងរងផលប៉ះពាល់ខ្លាំង។ នៅកម្ពុជា សម្រាប់ប្រេងសាំងធម្មតាតម្លៃឡើងដល់ ៥,២០០រៀល ក្នុងមួយលីត្រ ប្រេងម៉ាស៊ូត ឡើងដល់ ៦,០៥០រៀលក្នុងមួយលីត្រ៕
