(ក្រចេះ)៖ អ្នកសារព័ត៌មានជិត ៤០រូប មកពី ១៧ ស្ថាប័ន បានចាប់ផ្ដើមចេញដំណើរពីរាជធានីភ្នំពេញ ទៅកាន់ខេត្តភាគឦសាន ចាប់ពីថ្ងៃទី១៣ ខែមីនា ឆ្នាំ២០២៦ ដើម្បីចូលរួមក្នុងដំណើរផ្សព្វផ្សាយសក្ដានុពលខេត្តរតនគិរី និងខេត្តស្ទឹងត្រែង ដែលរៀបចំដោយ ក្លិបអ្នកកាសែតកម្ពុជា។

ក្នុងឱកាសនៃដំណើរនេះ អភិបាលខេត្តរតនគិរី និងអភិបាលខេត្តស្ទឹងត្រែង នឹងផ្ដល់បទសម្ភាសន៍លម្អិតជូនក្រុមអ្នកសារព័ត៌មាន អំពីទិសដៅអភិវឌ្ឍន៍ និងសក្ដានុពលសេដ្ឋកិច្ចរបស់ខេត្តនីមួយៗ។

សម្រាប់ខេត្តរតនគិរី ក្រុមអ្នកសារព័ត៌មាននឹងមានឱកាសស្វែងយល់អំពីគម្រោងសំខាន់ៗមួយចំនួន ដូចជា គម្រោងសាងសង់វារីអគ្គិសនី និងស្ថានីយថាមពលព្រះអាទិត្យ គម្រោងអភិវឌ្ឍអាកាសយានដ្ឋាន ព្រមទាំងសក្ដានុពលវិស័យទេសចរណ៍ កសិកម្ម កសិ-ឧស្សាហកម្ម និងគម្រោងអភិវឌ្ឍន៍ផ្សេងៗរបស់ខេត្ត។

ដោយឡែក នៅខេត្តស្ទឹងត្រែង ក្រុមអ្នកសារព័ត៌មាននឹងស្វែងយល់អំពីគម្រោងអភិវឌ្ឍវារីអគ្គិសនីសេសានក្រោម២ តំបន់អេកូទេសចរណ៍តាមបណ្ដោយទន្លេសេសាន និងសក្ដានុពលនៃច្រកព្រំដែនអន្តរជាតិត្រពាំងក្រៀល។ ជាមួយគ្នានេះផងដែរ ក្រុមអ្នកសារព័ត៌មាន ក៏ត្រូវបានអញ្ជើញឱ្យចុះទៅសិក្សាស្វែងយល់ និងយកព័ត៌មានអំពីគម្រោងអភិរក្សសត្វព្រៃ និងរមណីយដ្ឋានលំដាប់ខ្ពស់ Siempang Forest Lodge ដែលវិនិយោគដោយវិនិយោគិនក្នុងស្រុកផងដែរ៕