(ប៉ៃលិន)៖ ដោយអនុវត្តតាមបទបញ្ជារបស់លោកស្រីបណ្ឌិត បាន ស្រីមុំ អភិបាលខេត្តប៉ៃលិន និងជាប្រធានគណៈបញ្ជាការឯកភាពខេត្ត នៅយប់ថ្ងៃទី១២ ខែមីនា ឆ្នាំ២០២៦ សមត្ថកិច្ចចម្រុះបានបន្តចុះត្រួតពិនិត្យការធ្វើចរាចរណ៍តាមដងផ្លូវ ដោយផ្តោតទៅលើជនបរទេសដែលចូលមករស់នៅខុសច្បាប់ក្នុងខេត្ត ដើម្បីទប់ស្កាត់បទល្មើសនានា ជាពិសេសទប់ស្កាត់ការលួចបង្កប់បទល្មើសបច្ចេកវិទ្យា (Online Scam) ក្នុងគោលបំណងការពារសន្តិសុខ សណ្តាប់ធ្នាប់ ជូនប្រជាពលរដ្ឋ និងអនុវត្តយ៉ាងម៉ឺងម៉ាត់ចំពោះវិធានការរបស់រាជរដ្ឋាភិបាលកម្ពុជា។

ការបន្តយុទ្ធនាការទប់ស្កាត់ និងចុះបង្ក្រាបបទល្មើសនានា ជាពិសេសបទល្មើសបច្ចេកវិទ្យា (Online Scam) របស់គណៈបញ្ជាការឯកភាពរដ្ឋបាលខេត្តប៉ៃលិន គឺក្នុងគោលបំណងរឹតបន្តឹងនៃការអនុវត្តរបបសន្តិសុខសង្គម របៀបរៀបរយ និងសណ្តាប់ធ្នាប់សាធារណៈនៅក្នុងខេត្តទាំងមូល។ ការអនុវត្តនេះស្របតាមវិធានការចាំបាច់របស់រាជរដ្ឋាភិបាល ដោយត្រូវយកចិត្តទុកដាក់ខ្ពស់លើ៖ ការងារគ្រប់គ្រងសុវត្ថិភាព, ការត្រួតពិនិត្យតាមទីតាំងរស់នៅប្រមូលផ្តុំ, ការពិនិត្យការតាំងទីលំនៅរបស់ជនបរទេស, ការត្រួតពិនិត្យទីតាំងកាស៊ីណូ។ ក្នុងគោលបំណងទប់ស្កាត់ជនបរទេសដែលលួចចូលមករស់នៅក្នុងខេត្តដោយខុសច្បាប់ និងទប់ស្កាត់បទល្មើសនានា ជាពិសេសបទល្មើសបច្ចេកវិទ្យា ឱ្យមានប្រសិទ្ធភាពខ្ពស់។

ក្រោមគោលនយោបាយ និងឆន្ទៈដឹកនាំប្រកបដោយភាពម៉ឺងម៉ាត់ និងច្បាស់លាស់របស់រាជរដ្ឋាភិបាល ដែលសម្ដេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី បានកំពុងអនុវត្តច្បាប់លើករណីឆបោកតាមប្រព័ន្ធអនឡាញ ដោយឃាត់ខ្លួនឧក្រិដ្ឋជន និងអ្នកពាក់ព័ន្ធ បញ្ជូនទៅតុលាការ ដើម្បីផ្ដន្ទាទោស និងអនុវត្តនីតិវិធីបណ្ដេញចេញទៅប្រទេសកំណើតជាបន្តបន្ទាប់។ ជាពិសេស ក៏បានសហការផ្ដល់ព័ត៌មានអំពីខ្សែបណ្ដាញមេខ្លោងទៅកាន់ប្រទេសក្នុងតំបន់ និងក្រៅតំបន់ជាច្រើនករណីផងដែរ។

សូមបញ្ជាក់ថា ចំពោះលទ្ធផលតាមគោលដៅត្រួតពិនិត្យ បានរកឃើញរថយន្តចំនួន ១៧គ្រឿង ដែលដឹកជនបរទេសធ្វើដំណើរចូលក្នុងខេត្តប៉ៃលិន ចំនួន ៣៣នាក់ (ស្រី៩នាក់) រួមមាន៖ ជនជាតិចិន ២០នាក់ (ស្រី២នាក់), ជនជាតិវៀតណាម ៤នាក់ (ស្រី៤នាក់), ជនជាតិឡាវ ៣នាក់ (ស្រី៣នាក់), ជនជាតិមីយ៉ាន់ម៉ា ២នាក់, ជនជាតិនេប៉ាល់ ៤នាក់។ប៉ុន្តែ មិនបានរកឃើញជនបរទេសដែលមានការសង្ស័យពាក់ព័ន្ធបទល្មើសខុសច្បាប់ ឬបទល្មើសបច្ចេកវិទ្យា (Online Scam) នោះទេ ដោយមានឯកសារស្របច្បាប់ត្រឹមត្រូវទាំងអស់គ្នា៕