បណ្ឌិត សុខ ទូច៖ ថៃបំផ្លាញប្រាសាទខ្មែរ ព្រោះមិនមែនជារបស់ដូនតាខ្លួន (Video inside)
13-03-2026 14:59
(ភ្នំពេញ)៖ លោកបណ្ឌិត្យសភាចារ្យ សុខ ទូច ប្រធានរាជបណ្ឌិត្យសភាកម្ពុជា បានលើកឡើងថា ដូនតារបស់ថៃកើតឡើង មិនទាន់កំណើតនៃការសាងសង់ប្រាសាទខ្មែរ ដែលត្រូវបានពួកគេបំផ្លាញនោះទេ។ លោកបានបន្តថា ថៃបានបំផ្លាញប្រាសាទជាច្រើននោះ ក៏ព្រោះតែប្រាសាទទាំងនេះ មិនមែនជារបស់ដូនតាខ្លួន។
លោកបានលើកឡើងបែបនេះ ក្នុងឱកាសរាជបណ្ឌិត្យសភាកម្ពុជា រៀបចំកិច្ចពិភាក្សាតុមូលស្តីពី «សណ្តាប់ធ្នាប់ពិភពលោកក្នុងបរិបទថ្មី» នាព្រឹកថ្ងៃទី១៣ ខែមីនា ឆ្នាំ២០២៦។
សង្គ្រាមដែលថៃឈ្លានពានកម្ពុជា បានផ្ទុះឡើងពីរលើកក្នុងឆ្នាំ២០២៥ ដោយលើកទី១ នៅថ្ងៃទី២៤ ដល់២៨ ខែកក្កដា និងលើកទី២ នៅថ្ងៃទី៧ដល់២៧ ខែធ្នូ។ សង្គ្រាមដែលបង្កឡើងដោយទាហានថៃនេះ បានធ្វើឱ្យមានការខូចខាតយ៉ាងខ្លាំងដល់ប្រាង្គប្រាសាទបុរាណខ្មែរ ដូចជា ប្រាសាទព្រះវិហារ និងប្រាសាទតាក្របី ជាដើម ព្រមទាំងហេដ្ឋារចនាសម្ព័ន្ធ និងទ្រព្យសម្បត្តិរបស់ប្រជាជនកម្ពុជាផងដែរ។
លោកបណ្ឌិត សុខ ទូច បានថ្លែងថា ថៃហ៊ានបំផ្លាញប្រាសាទខ្មែរ គ្មានការសោកស្តាយ ប្រៀបបីដូចជាពួកញៀនគ្រឿងញៀន ដែលវង្វេងគ្មានដឹងអី។ លោកប្រដូចថា មានតែជាអ្នកញៀនគ្រឿងញៀនទេ ដែលហ៊ានបំផ្លាញទ្រព្យសម្បត្តិអ្នកផ្ទះ ខណៈខ្មែរយើងជាម្ចាស់ប្រាសាទ គឺអត់ហ៊ានប៉ះពាល់ប្រាសាទទាំងនោះឡើយ។
លោកបានបញ្ជាក់យ៉ាងដូច្នេះថា «ពួកថៃ (ប្រាសាទទាំងនេះ) មិនមែនរបស់ម៉ែវា មិនមែនដូនតាវា។ សុខោទ័យ កើតនៅសតវត្សរ៍ទី១៣។ តើប្រាសាទព្រះវិហារ ធ្វើនៅពេលណា? ប្រាសាទតាមាន់ធំ ប្រាសាទតាមាន់តូច ប្រាសាទតាក្របី ធ្វើនៅពេលណា? មុនដូនតាវាកើតទៀត។ មិនមែនជារបស់វាទេ។ អីចឹង កូនខ្មែរ ត្រូវចងចាំទាំងអស់គ្នា»។
គួរបញ្ជាក់ផងដែរថា ក្នុងសង្គ្រាមឈ្លានពានកម្ពុជា ទាហានសៀមបានប្រើយន្តហោះចម្បាំង F16 បាញ់ស្រោចយ៉ាងសន្ធោសន្ធៅក្នុងចេតនាកម្ទេចទីវត្តអារាមសាសនា និងប្រាសាទព្រះវិហារជាសម្បត្តិបេតិកភណ្ឌពិភពលោក។
លោក រ័ត្ន សណ្ដាប់ អ្នកជំនាញអារ្យធម៌ខ្មែរ បានចាត់ទុកទង្វើរបស់កងទ័ពថៃថាជាទ័ពមានបាតដៃប្រឡាក់ឈាមបេតិកភណ្ឌពិភពលោក ដោយសារបានឈ្លានពានយ៉ាងព្រៃផ្សៃមកលើទឹកដីប្រាសាទបុរាណខ្មែរ ហើយលោកក៏បានអំពាវនាវឱ្យមានការថ្កោលទោសចំពោះទង្វើនេះ ពីព្រោះការស្ដារឡើងវិញនូវគុណតម្លៃបេតិកភណ្ឌវប្បធម៌មនុស្សជាតិជាមូលដ្ឋាន គឺជាកាតព្វកិច្ចរបស់មនុស្សទាំងក្នុងសហគមន៍ តំបន់ និងលើពិភពលោក ដើម្បីថែរក្សាការពារ និងអភិរក្ស វប្បធម៌ សម្រាប់មនុស្សជាតិជំនាន់ក្រោយ៕
