រោងចក្រស្វាយចំនួន២នៅស្រុកភ្នំស្រួច កែលំអប្រព័ន្ធគ្រប់គ្រងសំណល់រាវបានប្រសើរក្រោយក្រសួងបរិស្ថានចុះណែនាំ (Video inside)
13-03-2026 15:51
(កំពង់ស្ពឺ)៖ រោងចក្រធ្វើដំណាប់ស្វាយចំនួនពីរនៅស្រុកភ្នំស្រួច ខេត្តកំពង់ស្ពឺ គឺរោងចក្រ KRR Processing Food និងរោងចក្រគិរីរម្យ ហ៊្វូដ ប្រដាក់សិន បានកែលំអប្រព័ន្ធគ្រប់គ្រងសំណល់រាវក្នុងរោងចក្ររបស់ខ្លួនបានល្អប្រសើរ និងមិនបង្ហូរឱ្យប៉ះពាល់ដល់ទឹកអូរធម្មជាតិទៀតនោះទេ បន្ទាប់ពីក្រសួងបរិស្ថាន បានចុះណែនាំឱ្យកែលំអនាពេលកន្លងទៅ។
រោងចក្រទាំងពីរនេះ ធ្លាប់ត្រូវបានប្រជាពលរដ្ឋរាយការណ៍ពីការបង្ហូរកាកសំណល់រាវចេញពីរោងចក្រចូលទៅក្នុងទឹកអូរធ្វើឱ្យទឹកមានក្លិនស្អុយ និងបង្កើតការពុលក្នុងទឹក។ ក្រោយទទួលសេចក្តីរាយការណ៍ពីប្រជាពលរដ្ឋ មន្ត្រីជំនាញក្រសួងបរិស្ថាន បានចុះពិនិត្យ និងណែនាំឱ្យកែលំអឡើងវិញលើចំណុចខ្វះខាតលើការគ្រប់គ្រងសំណល់រាវនេះ ដើម្បីបញ្ចៀសការបង្កផលប៉ះពាល់ដល់បរិស្ថាន ដល់គុណភាពទឹក និងការរស់នៅរបស់ប្រជាពលរដ្ឋនៅជុំវិញរោងចក្រ។
នៅថ្ងៃទី១១ ខែមីនា ឆ្នាំ២០២៦ ក្រុមការងារអធិការកិច្ចនៃអគ្គនាយកដ្ឋានគាំពារបរិស្ថាន ក្រសួងបរិស្ថាន ដឹកនាំដោយលោក ជូ មុនីដារិន អគ្គនាយករងនៃអគ្គនាយកដ្ឋានគាំពារបរិស្ថាន ដោយមានការអញ្ជើញចូលរួមពីមន្ត្រីមន្ទីរបរិស្ថានខេត្តកំពង់ស្ពឺផងនោះ បានចុះពិនិត្យឡើងវិញនៅរោងចក្រទាំងពីរខាងលើនេះ ដើម្បីផ្ទៀតផ្ទាត់ថា តើរោងចក្របានកែលំអលើប្រព័ន្ធគ្រប់គ្រងសំណល់រាវដូចអ្វីដែលក្រសួងបានណែនាំដែរឬទេ?
ក្នុងដំណើរចុះផ្ទៀតផ្ទាត់នេះ មន្ត្រីជំនាញរបស់ក្រសួងបរិស្ថាន បានចុះពិនិត្យទឹកអូរធម្មជាតិ ដែលធ្លាប់រងការបំពុលនាពេលកន្លងទៅ ហើយក៏បានដើរពិនិត្យអាងប្រព្រឹត្តកម្មទឹក ព្រមទាំងកន្លែងរាំងខ្ទប់ទឹកមិនឱ្យហូរធ្លាយទៅកាន់ទឹកអូរជាដើម។
ក្រោយពីការដើរពិនិត្យឡើងវិញដោយល្អិតល្អន់ហើយនោះ លោក ជូ មុនីដារិន បានមើលឃើញថា ក្រុមហ៊ុនទាំងពីរខាងលើនេះ បានចូលរួមកែលំអបានច្រើនលើការគ្រប់គ្រងកាកសំណល់រាវក្នុងរោងចក្រទៅតាមអ្វីដែលក្រសួងបរិស្ថានធ្លាប់បានណែនាំ។
ទន្ទឹមការពិនិត្យឃើញថារោងចក្រទាំងពីរខាងលើ បានចូលរួមកែលំអបានប្រសើរយ៉ាងណាក្តី តែមិនទាន់បំពេញតាមលក្ខខណ្ឌបច្ចេកទេសគ្រប់គ្រាន់តាមអ្វីដែលក្រសួងបរិស្ថានបានតម្រូវនៅឡើយនោះទេ។ ក្នុងដំណើរចុះពិនិត្យនេះ ក្រុមការងារអធិការកិច្ចនៃអគ្គនាយកដ្ឋានគាំពារបរិស្ថាន ក្រសួងបរិស្ថាន ក៏បានណែនាំបន្ថែមដល់ថ្នាក់រោងចក្រទាំងពីរឱ្យកែលំអបន្ថែមទៀត ដើម្បីធ្វើឱ្យការគ្រប់គ្រងកាកសំណល់រាវក្នុងរោងចក្រកាន់តែល្អប្រសើរ និងកាន់តែមានប្រសិទ្ធភាពខ្ពស់ក្នុងការបង្កផលប៉ះពាល់ដល់បរិស្ថាន និងការរស់នៅរបស់ប្រជាពលរដ្ឋនៅជុំវិញរោងចក្រ ក៏ដូចជាអ្នកបម្រើការងារក្នុងរោងចក្រផងដែរ។
បញ្ហាបរិស្ថាន ត្រូវបានប្រៀបប្រដូចទៅនឹងដង្ហើមជីវិតរបស់មនុស្សសត្វលើភពផែនដី។ បើបរិស្ថានល្អ ដង្ហើមជីវិតមនុស្សសត្វក៏ល្អ តែបើបរិស្ថាន ត្រូវបានបំផ្លាញវាប្រៀបបាននឹងការខ្ទប់ដង្ហើមជីវិតរបស់មនុស្សសត្វដូច្នោះដែរ។ ដូច្នេះការទទួលខុសត្រូវលើបញ្ហាបរិស្ថាន ជាកាតព្វកិច្ចដែលប្រជាពលរដ្ឋគ្រប់រូបត្រូវចូលរួម រួមទាំងម្ចាស់អាជីវកម្មនានាផងដែរ។ អ្នកវិនិយោគទាំងឡាយក្រៅពីការអនុវត្តន៍តាមច្បាប់ដែលកំណត់ដោយរដ្ឋហើយនោះ ពួកគេត្រូវតែមានស្មារតីទទួលខុសត្រូវឱ្យបានខ្ពស់លើបរិស្ថាន និងសហគមន៍នៅជុំវិញរោងចក្រ សហគ្រាស ដើម្បីធានាដល់ចីរភាព និងនរន្តរភាពនៃច្រវាក់ផលិតកម្ម។
គណៈគ្រប់គ្រងរោងចក្រ KRR Processing Food និងរោងចក្រគិរីរម្យ ហ៊្វូដ ប្រដាក់សិន បានបង្ហាញការស្វាគមន៍ និងរីករាយចំពោះចំណាត់ការទាំងឡាយរបស់ក្រសួងបរិស្ថានលើកិច្ចការបរិស្ថាន ហើយបានប្រកាសប្តេជ្ញាចិត្តអនុវត្តឱ្យបានទៅតាមអ្វីដែលជាការណែនាំរបស់ក្រសួងបរិស្ថានលើការគ្រប់គ្រងសំណល់រាវនេះ។ ជាពិសេសបញ្ចៀសផលប៉ះពាល់ដល់ទឹកធម្មជាតិ ដែលធ្វើឱ្យប៉ះពាល់សុខភាពប្រជាពលរដ្ឋ ក៏ដូចជាជីវៈចម្រុះក្នុងទឹក។
ទន្ទឹមនឹងការស្វាគមន៍រាល់ការកែលំអរបស់ក្រសួងបរិស្ថានហើយនោះ លោក សំ អុន គណៈគ្រប់គ្រងក្រុមហ៊ុនគិរីរម្យ ហ៊្វូដ ប្រដាក់សិន ក៏បានបង្ហាញការប្តេជ្ញាចិត្តចូលរួមការពារបិរស្ថាន និងបញ្ចៀសផលប៉ះពាល់ឱ្យបានខ្ពស់សម្រាប់ការរស់នៅរបស់ប្រជាពលរដ្ឋ។
បើទោះបីមានរោងចក្រមួយចំនួនបានកែលំអលើការគ្រប់គ្រងកាកសំណល់រាវយ៉ាងណាក្តី ក៏នៅមានរោងចក្រស្វាយមួយចំនួនទៀតនៅក្នុងខេត្តកំពង់ស្ពឺនេះ មិនទាន់បានកែលំអលើកាកសំណល់រាវនៅក្នុងរោងចក្ររបស់ខ្លួននោះឡើយ។
បើតាមលោក ជូ មុនីដារិន បានឱ្យដឹងថា កាកសំណល់រាវនេះ បើគ្រប់គ្រងមិនបានល្អបង្កផលប៉ះពាល់ធ្ងន់ធ្ងរដល់បរិស្ថាន សុខភាពមនុស្ស និងជីវៈចម្រុះនៅក្នុងទឹកផងដែរ។ លោក មុនីដារិន បានអំពាវនាវដល់ម្ចាស់រោងចក្រ សហគ្រាសនានា យកចិត្តទុកដាក់លើការគ្រប់គ្រងកាកសំណល់រាវនៅក្នុងរោងចក្រ សហគ្រាសរបស់ខ្លួន ហើយអនុលោមឱ្យបានខ្ជាប់ខ្ជួនតាមក្រមបរិស្ថាន និងលក្ខខណ្ឌបច្ចេកទេសនានារបស់ក្រសួងបរិស្ថាន៕
