(ព្រះសីហនុ)៖ អ្នកនាំពាក្យសាលាដំបូងខេត្តព្រះសីហនុ នៅថ្ងៃទី១៣ ខែមីនា ឆ្នាំ២០២៦នេះ បានចេញសេចក្ដីប្រកាសព័ត៌មាន បង្ហាញអំពីដំណើរការនីតិវិធីតាមផ្លូវច្បាប់ ក្នុងសំណុំរឿងឧក្រិដ្ឋជន៩នាក់ ពាក់ព័ន្ធបទល្មើសផលិត ជួញដូរដោយខុសច្បាប់នូវសារធាតុញៀន សម្អាតប្រាក់ និងប្រើប្រាស់អាវុធដោយគ្មានការអនុញ្ញាត បន្ទាប់ពីក្រុមប្រឹក្សាជំនុំជម្រះ នៃសាលាដំបូងខេត្តព្រះសីហនុ បានបើកសវនាការជាសាធារណៈ កាលពីថ្ងៃទី២៣ ខែធ្នូ ឆ្នាំ២០២៥ និងបន្តសវនាការនៅថ្ងៃទី៨ ខែមករា ឆ្នាំ២០២៦ ដើម្បីជំនុំជម្រះលើសំណុំរឿងព្រហ្មទណ្ឌលេខ ៧៨៤ ចុះថ្ងៃទី១៨ ខែមិថុនា ឆ្នាំ២០២៤ ពាក់ព័ន្ធបទល្មើស ផលិត, ជួញដូរដោយខុសច្បាប់នូវសារធាតុញៀន, សម្អាតប្រាក់ និងប្រើប្រាស់អាវុធ ដោយគ្មានលិខិតអនុញ្ញាត ព្រមទាំងបានប្រកាសសាលក្រមលេខ ០៨៤/០៦ ក្រ២ "ជ” ចុះថ្ងៃទី១១ ខែមីនា ឆ្នាំ២០២៦។

ក្នុងសេចក្ដីប្រកាសព័ត៌មានដែលបណ្ដាញព័ត៌មាន Fresh News ទទួលបានបញ្ជាក់ថា តុលាការបានសម្រេចផ្តន្ទាទោសលើជនជាប់ចោទ៖

*ទី១៖ ឈ្មោះ ដូ ធានក្វាង (DO THIEN QUANG)
*ទី២៖ ឈ្មោះ ស៊ាវ ឈីហុង (XIAO QIHONG)
*ទី៣៖ ឈ្មោះ ចាង ឈូយ៉ូ (ZHANG CHU YU)។ សម្រាប់ជនជាប់ចោទទាំង៣នាក់នេះ ត្រូវដាក់ពន្ធនាគារម្នាក់ៗ កំណត់រយៈពេលអស់មួយជីវិត និងពិន័យជាប្រាក់ក្នុងម្នាក់ៗចំនួន ២០០,០០០,០០០រៀល ពីបទផលិត, ជួញដូរដោយខុសច្បាប់នូវសារធាតុញៀន និងសម្អាតប្រាក់ ប្រព្រឹត្តនៅភូមិ២ សង្កាត់ លេខ៣ និងភូមិ៥ សង្កាត់លេខ៤ ក្រុងព្រះសីហនុ ខេត្តព្រះសីហនុ កាលពីថ្ងៃទី១៥ ខែមិថុនា ឆ្នាំ២០២៤ បទល្មើសមានចែង និងបញ្ញត្តិឱ្យផ្តន្ទាទោសតាមមាត្រា៣៩ កថាខណ្ឌទី៥, មាត្រា៤០ កថាខណ្ឌទី៧, មាត្រា៤៧ កថាខណ្ឌទី៤ និងមាត្រា៤៨ កថាខណ្ឌទី៦ នៃច្បាប់ស្តីពីការត្រួតពិនិត្យគ្រឿងញៀន និងមាត្រា៣៨ នៃច្បាប់ស្តីពីការប្រឆាំងការ សម្អាតប្រាក់ និងហិរញ្ញប្បទានភេរវកម្ម។

*ទី៤៖ ឈ្មោះ ថាំង ចាងវ័យ (TANG ZHANG WEI) ដាក់ពន្ធនាគារ កំណត់រយៈពេលអស់មួយជីវិត និងពិន័យជាប្រាក់ចំនួន ២០០,០០០,០០០រៀល ពីបទផលិត, ជួញដូរ ដោយខុសច្បាប់នូវសារធាតុញៀន, សម្អាតប្រាក់ និងប្រើប្រាស់អាវុធដោយគ្មានលិខិតអនុញ្ញាត ប្រព្រឹត្តនៅភូមិ១, ភូមិ២ សង្កាត់លេខ៣ និងភូមិ៥ សង្កាត់លេខ៤ ក្រុងព្រះសីហនុ ខេត្តព្រះសីហនុ កាលពីថ្ងៃទី១៥ ខែមិថុនា ឆ្នាំ២០២៤ បទល្មើសមានចែង និងបញ្ញត្តិឱ្យផ្ដន្ទាទោសតាមមាត្រា៣៩ កថាខណ្ឌទី៥, មាត្រា៤០ កថាខណ្ឌទី៧, មាត្រា៤៧ កថាខណ្ឌទី៤ និងមាត្រា៤៨ កថាខណ្ឌទី៦ នៃច្បាប់ស្តីពីការត្រួតពិនិត្យគ្រឿងញៀន និងមាត្រា៣៨ នៃច្បាប់ស្តីពីការ ប្រឆាំងការសម្អាតប្រាក់ និងហិរញ្ញប្បទានភេរវកម្ម និងមាត្រា២០ នៃច្បាប់ស្តីពីការគ្រប់គ្រងអាវុធជាតិផ្ទុះ និងគ្រាប់រំសេវ និងបទរក្សាទុកដោយខុសច្បាប់នូវសារធាតុញៀន ប្រព្រឹត្តនៅភូមិ២ សង្កាត់លេខ៣ ក្រុងព្រះសីហនុ ខេត្តព្រះសីហនុ កាលពីថ្ងៃទី១៥ ខែមិថុនា ឆ្នាំ២០២៤ បទល្មើសមានចែង និងបញ្ញត្តិឱ្យផ្តន្ទាទោសតាមមាត្រា៤០ កថាឧណ្ហ៨ និង មាត្រា៤៨ កថាខណ្ឌទី៤ នៃច្បាប់ស្ដីពីការត្រួតពិនិត្យគ្រឿងញៀន។

*ទី៥៖ ឈ្មោះ ហេង រិទ្ធិថា អាយុ៣៨ឆ្នាំ ដាក់ពន្ធនាគារកំណត់រយៈ២០ឆ្នាំ និងពិន័យជាប្រាក់ចំនួន ១០០,០០០,០០០រៀល ពីបទសមគំនិតក្នុងអំពើផលិត, ជួញដូរដោយ ខុសច្បាប់នូវសារធាតុញៀន, សម្អាតប្រាក់ ប្រព្រឹត្តនៅភូមិ១ និងភូមិ២ សង្កាត់លេខ៣ ក្រុងព្រះសីហនុ ខេត្តព្រះសីហនុ និងភូមិ៥ សង្កាត់លេខ៤ ក្រុងព្រះសីហនុ ខេត្តព្រះសីហនុ កាលពីថ្ងៃទី១៥ ខែមិថុនា ឆ្នាំ២០២៤ បទល្មើសមានចែង និងបញ្ញត្តិឱ្យផ្តន្ទាទោសតាមមាត្រា២៩ នៃក្រមព្រហ្មទណ្ឌ, មាត្រា៣៩ កថាខណ្ឌទី៥, មាត្រា៤០ កថាខណ្ឌទី៧, មាត្រា៤៧ កថាខណ្ឌទី៤ និងមាត្រា៤៨ កថាខណ្ឌទី៦ នៃច្បាប់ស្ដីពីការត្រួតពិនិត្យគ្រឿងញៀន និង មាត្រា៣៨ នៃ ច្បាប់ស្តីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម។

*ទី៦៖ ឈ្មោះ ជូ ស៊ាវឡុង (ZHU XIAO LONG)
*ទី៧៖ ឈ្មោះ ឡេ ជីអាញ់ហុង (LE THIANH HONG)
*ទី៨៖ ឈ្មោះ ថាំង ចាន់តឹង (TANG ZHANG BING)
*ទី៩៖ ឈ្មោះ យ៉ាង ឈិនស្យុង (YANG CHEN XIONG) អាយុ៥៣ឆ្នាំ។ សម្រាប់ជនជាប់ចោទទាំង៤នាក់ ដាក់ពន្ធនាគារម្នាក់ៗកំណត់រយៈពេល ២ (ពីរ) ឆ្នាំ ពីបទ សមគំនិតក្នុងអំពើរក្សាទុកដោយខុសច្បាប់នូវសារធាតុ ញៀន ប្រព្រឹត្តនៅភូមិ២ សង្កាត់លេខ៣ ក្រុងព្រះសីហនុ ខេត្តព្រះសីហនុ បទល្មើសមានចែង និងបញ្ញត្តិឱ្យផ្តន្ទាទោស តាមមាត្រា២៩ នៃក្រមព្រហ្មទណ្ឌ, មាត្រា៤០ កថាខណ្ឌទី៤ និងមាត្រា៤៨ កថាខណ្ឌទី៤ នៃច្បាប់ស្តីពីការត្រួតពិនិត្យ គ្រឿងញៀន។

ក្នុងនោះ ហាមឃាត់ជនជាប់ចោទ (ជនជាតិចិន និងជនជាតិវៀតណាម) ចំពោះការចូល និងស្នាក់នៅក្នុងដែនដីព្រះរាជាណាចក្រកម្ពុជា ជាស្ថាពរចំពោះជនជាប់ចោទដែលត្រូវបានផ្តន្ទាទោសដាក់ពន្ធនាគារអស់មួយជីវិត។ ចំពោះ ជនជាប់ចោទផ្សេងទៀត ត្រូវបានហាមឃាត់ចំពោះការចូល និងការស្នាក់នៅក្នុងដែនដីនៃព្រះរាជាណាចក្រកម្ពុជាផងដែរ។

ដោយឡែក វត្ថុតាងពាក់ព័ន្ធនឹងបទល្មើសខាងលើ ត្រូវបានសម្រេចរឹបអូស តាមបញ្ញត្តិមាត្រា៩៣, មាត្រា៩៤ នៃច្បាប់ ស្ដីពីការត្រួតពិនិត្យគ្រឿងញៀន និងមាត្រា៦២ នៃក្រមព្រហ្មទណ្ឌ៕