(ស្វាយរៀង)៖ មានករណីអគ្គិភ័យឆាបឆេះតូបលក់ដូរអីវ៉ាន់ចាប់ហួយ និងគ្រឿងក្រអូប របស់អាជីវករផ្សារវាលយន្ត ក្រុងស្វាយរៀង ចំនួន១៨តូប និងខូចខាតសម្ភារៈអស់មួយចំនួនធំ។

ករណីឆាបឆេះតូបរបស់អាជីវករនេះ បានកើតឡើងនៅវេលាម៉ោង៣៖៣០នាទីទៀបភ្លឺ ថ្ងៃទី១៧ ខែមីនា ឆ្នាំ២០២៦ នៅចំណុចផ្សារវាលយន្ត ស្ថិតក្នុងភូមិវាលយន្ត សង្កាត់ស្វាយរៀង ក្រុងស្វាយរៀង។

មន្ត្រីកងរាជអាវុធហត្ថខេត្តស្វាយរៀង បានឲ្យដឹងថា ក្រោយពីទទួលបានព័ត៌មានកម្លាំងកងរាជអាវុធហត្ថខេត្តស្វាយរៀង សហការជាមួយកម្លាំងមូលដ្ឋានកងរាជអាវុធហត្ថក្រុងស្វាយរៀង កម្លាំងនគរបាលខេត្តស្វាយរៀង កម្លាំងនគរបាលក្រុងស្វាយរៀង និងនគរបាលស្រុកស្វាយទាប ចុះអន្តរាគមន៍បាញ់ពន្លត់អគ្គិភ័យ រហូតដល់ម៉ោង ៦៖២៥នាទីព្រឹកទើបរលត់ទាំងស្រុង។ ករណីនេះបណ្តាលឱ្យខូចខាតតូបលក់ដូរគ្រឿងក្រអូប និងតូបលក់ដូរអីវ៉ាន់ចាបហួយ សរុបចំនួន ១៨តូប ស្មើនឹង១៤ម្ចាស់ ចំពោះសំភារៈខូចខាតកម្លាំងជំនាញកំពុងធ្វើការបូកសរុប។

សមត្ថកិច្ចកងរាជអាវុធហត្ថ បានបញ្ជាក់ថា ក្នុងប្រតិបត្តិការពន្លត់អគ្គិភ័យនេះ បានប្រើប្រាស់រថយន្តពន្លត់អគ្គិភ័យចំនួន ៨គ្រឿង ក្នុងនោះរថយន្តស្នងការដ្ឋាននគរបាលខេត្តចំនួន ២គ្រឿង រថយន្តអធិការដ្ឋាននគរបាលស្រុកស្វាយទាប ១គ្រឿង រថយន្តអធិការដ្ឋាននគរបាលក្រុងស្វាយរៀង ១គ្រឿង និងរថយន្តកងរាជអាវុធហត្ថ៤គ្រឿង ប្រើប្រាស់ទឹកអស់ចំនួន២២រថយន្ត មូលហេតុឆ្លងចរន្តអគ្គិសនី៕