(ភ្នំពេញ)៖ ក្រសួងទេសចរណ៍ សហការជាមួយរដ្ឋបាលខេត្តក្រចេះ រៀបចំព្រឹត្តិការណ៍រត់កម្សាន្តមហាជនចម្ងាយ ៥គីឡូម៉ែត្រ អបអរព្រឹត្តិការណ៍បុណ្យទន្លេលើកទី១០ ឆ្នាំ២០២៦ នៅខេត្តក្រចេះ ក្រោមប្រធានបទ «ទន្លេបៃតង បេតិកភណ្ឌវប្បធម៌ និងធម្មជាតិមហាសាល»។

ក្នុងសេចក្ដីជូនដំណឹងដែលបណ្ដាញព័ត៌មាន Fresh News ទទួលបាន នៅថ្ងៃទី១៨ ខែមីនា ឆ្នាំ២០២៦នេះ បានបញ្ជាក់ថា ក្រសួងទេសចរណ៍ រៀបចំព្រឹត្តិការណ៍រត់កម្សាន្តមហាជនចម្ងាយ៥គីឡូម៉ែត្រ ដែលនឹងប្រព្រឹត្តទៅនៅថ្ងៃទី២៧ ខែមីនា ឆ្នាំ២០២៦ វេលាម៉ោង៦៖០០នាទីព្រឹក ដោយចាប់ផ្តើមចេញដំណើរពីខ្លោងទ្វារព្រឹត្តិការណ៍បុណ្យទន្លេ និងមកបញ្ចប់នៅកន្លែងចេញដំណើរវិញ។

ក្រសួងទេសចរណ៍ បានបញ្ជាក់ថា សម្រាប់អ្នកដែលមានបំណងចូលរួមក្នុងព្រឹត្តិការណ៍ខាងលើ សូមអញ្ជើញចុះឈ្មោះឱ្យបានទាន់ពេលវេលាតាមរយៈ QR Code ខាងក្រោម ចាប់ពីថ្ងៃជូនដំណឹងនេះរហូតដល់ថ្ងៃទី២៤ ខែមីនា ឆ្នាំ២០២៦។

សូមជម្រាបថា ចំពោះការចុះឈ្មោះចូលរួមមិនមានបង់ថវិកាឡើយ។ អ្នកចុះឈ្មោះដំបូងចំនួន ១០០០នាក់ ទទួលបានអាវយឺតចំនួន១ ដោយឡែកចំពោះអ្នកចុះឈ្មោះចាប់ពីលេខរៀងទី១០០១ មិនទទួលបានអាវយឺតទេប៉ុន្តែអាចចូលរួមបាន (ចំពោះអ្នកចូលរួមទទួលបានទឹក ភេសជ្ជៈ និងអាហារសម្រន់ជាផលិតផលអាហារប្រចាំខេត្តក្រចេះ)។

អ្នកចូលរួមរត់ដល់ទីដែលពាក់អាវយឺតព្រឹត្តិការណ៍រត់កម្សាន្ត នឹងទទួលបានការបំពាក់ក្រមាអនុស្សាវរីយ៍ដោយ លោក ហួត ហាក់ រដ្ឋមន្ត្រីក្រសួងទេសចរណ៍ និងលោក វ៉ា ថន អភិបាលខេត្តក្រចេះ។ ក្រុមការងារនឹងរៀបចំផ្ដល់ជូនអាវយឺតព្រឹត្តិការណ៍រត់កម្សាន្តនៅរៀងរាល់ម៉ោងធ្វើការ ដល់ថ្ងៃទី២៦ ខែមីនា ឆ្នាំ២០២៦ នៅសាលាខេត្តក្រចេះ៕