(សៀមរាប)៖ ក្នុងស្មារតី «ខ្មែរស្រឡាញ់ខ្មែរ» ដោយមិនប្រកាន់ពូជសាសន៍ នៅរសៀលថ្ងៃទី១៧ ខែមីនា ឆ្នាំ២០២៦នេះ លោក យុន លីនណេ អភិបាលរងខេត្តសៀមរាប និងក្រុមការងារ បានអញ្ជើញចូលរួមពិសាអាហារ ស្រាយបួស (ខែរ៉ម៉ាឌន) ជាមួយបងប្អូនសាសនិកឥស្លាម នៅម៉ាស្ជិតជើមៀក នូរ៉ោះ ស៊ូរ៉ែម ក្នុងភូមិតាគង់ សង្កាត់សំបួរ ក្រុងសៀមរាប ខេត្តសៀមរាប។

នេះសបញ្ជាក់ឲ្យឃើញថា «កម្ពុជា» ក្រោមការដឹកនាំរបស់សម្តេចតេជោ ហ៊ុន សែន អតីតជានាយករដ្ឋមន្ត្រី បច្ចុប្បន្នជាប្រធានព្រឺទ្ធសភា និងបន្តមកសម្តេចធិបតី ហ៊ុន ម៉ាណែត ជានាយករដ្ឋមន្ត្រី ក៏នៅតែបន្តរក្សាបាននៅភាព សុខដុមសាសនា ដែលជាសសរស្តម្ភដ៏សំខាន់នៃវឌ្ឍនភាព «សន្តិភាព» របស់កម្ពុជា។

ពិធីនេះដែរមានការចូលរួមពីលោក យុន លីនណេ អភិបាលរងខេត្តសៀមរាប, លោក ភឿន គឹមលី ប្រធានមន្ទីរពាណិជ្ជកម្មខេត្ត, លោកស្រី ឈន សុគន្ធា អភិបាលរងស្រុកអង្គរធំ និងលោក ហ៊ីម ស្លៃម៉ាន ហាកឹមម៉ាស្ជិតជើមៀក នូរ៉ោះ ស៊ូរ៉ែម ព្រមទាំងគណៈកម្មាធិការម៉ាស្ជិត និងបងប្អូនសាសនិឥស្លាមជាច្រើនចូលរួមផងដែរ។

ក្នុងឱកាសនោះ លោក យុន លីនណេ ក៏បានសម្តែងនូវសេចក្តីសប្បាយរីករាយ ដែលបានចូលរួមពិសាអាហារស្រាយបួស (ខែរ៉ម៉ាឌន) ជាមួយបងប្អូនសាសនិកឥស្លាម នៅភូមិតាគង់នេះ និងបានថ្លែងអំណរគុណចំពោះ គណៈកម្មាធិការម៉ាស្ជិតទាំងអស់ ដែលបានរៀបចំម្ហូបអាហារដ៏ឆ្ងាញ់ពិសាផងដែរ។ ក្នុងនោះដែរ លោកក៏បានសួរនាំអំពីរបៀបរបបនៃការបួស និងច្បាប់មួយចំនួន នៅក្នុងសាសនាឥស្លាមផងដែរ។

លោក ហ៊ីម ស្លៃម៉ាន បានថ្លែងអំណរគុណចំពោះលោកអភិបាលរងខេត្ត និងក្រុមការងារ ដែលបានឆ្លៀតពេលសម្រាកពីការងារ អញ្ជើញមកចូលរួមពិសាអាហារស្រាយបួស (ខែរ៉ម៉ាឌន) ដែលជាខែមួយដែលបងប្អូនសាសនិកឥស្លាម តមចំណីអាហារ និងភេសជ្ជៈ ចាប់ពីមុនថ្ងៃរះ រហូតដល់ថ្ងៃលិច ខណៈពេលនេះបងប្អូនសាសនិកឥស្លាម នៅទូទាំងពិភពលោកកំពុងប្រតិបត្តិពីធីនេះ៕