(ភ្នំពេញ)៖ នៅព្រឹកថ្ងៃទី២១ ខែមីនា ឆ្នាំ​២០២៦នេះ លោក​បណ្ឌិត អូស្មាន​ ហាស្សាន់​ ទេសរដ្ឋមន្ត្រីទទួលបន្ទុកបេសកកម្មពិសេស បានអញ្ជើញអបអរសាទរ​​ និងថ្វាយបង្គំក្នុងឱកាសនៃពិធីបុណ្យរ៉យ៉ាហ្វីទ្រី​ ឬបុណ្យស្រាយបួស​ នៅវិហារធំគីឡូម៉ែត្រ៩​ សង្កាត់ច្រាំងចំរេះ១​ ខណ្ឌឫស្សីកែវ​ រាជធានីភ្នំពេញ​។

ឆ្លៀតឱកាស​សំណេះសំណាល ​ជាមួយសាសនិកឥស្លាម ដែលបានអញ្ជើញចូលរួមថ្វាយបង្គំនៅទីនោះ​ លោកបណ្ឌិត​ អូស្មាន​ ហាស្សាន់​ បានលើកឡើង​ថា សាសនិកឥស្លាមកម្ពុជាទូទាំងប្រទេស មានឱកាសចូលរួមយ៉ាងសប្បាយរីករាយក្នុងពិធីបុណ្យនេះ​ គឺជាចំណែកមួយដែលបានកើតឡើងដោយសារកត្តាសុខសន្តិភាព។

ទេសរដ្ឋមន្ត្រីបានបន្តថា​ កម្ពុជាក្រោមការដឹកនាំរបស់សម្ដេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងសម្តេចធិបតី ហ៊ុន ម៉ាណែត នាយករដ្ឋមន្ត្រី បានដឹកនាំប្រទេសដោយប្រកាន់លើ គោលនយោបាយប្រកាន់លើសច្ចធម៌ សន្តិភាព និងតែងតែរួមសុខរួមទុក្ខជាមួយបងប្អូនប្រជាពលរដ្ឋ ដោយមិនប្រកាន់ពូជសាសន៍ តាំងពីសម័យសង្គ្រាម រហូតដល់កម្ពុជាមានសុខសន្តិភាព និងមានការអភិវឌ្ឍលើគ្រប់វិស័យ។​ លើសពីនោះទៅទៀត រដ្ឋាភិបាលកម្ពុជា តែងតែចូលរួមដោះស្រាយរាល់ទុក្ខកង្វល់ និងតម្រូវការ ជូនដល់សហគមន៍ឥស្លាមកម្ពុជាផងដែរ។

​ទេសរដ្ឋមន្ត្រី អូស្មាន ហាស្សាន់ បានសង្កត់ធ្ងន់ថា ទាំងនេះគឺជាសមិទ្ធផលដែលកើតឡើងដោយកត្តាសុខសន្តិភាព ដែលរកមកដោយលំបាកដោយរាជរដ្ឋាភិបាល ក្រោមការដឹកនាំប្រកបដោយគតិបណ្ឌិតរបស់ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា។ ដូចច្នេះ យើងទាំងអស់គ្នា ត្រូវអរគុណសន្តិភាព ព្រមទាំងបន្តគាំទ្រចំពោះរាជរដ្ឋាភិបាល ដើម្បីបន្តរក្សាបាននូវសុខសន្តិភាពនេះ ឲ្យបានយូរអង្វែងតទៅមុខទៀត។

សូមជម្រាប ពិធីបុណ្យរ៉យ៉ាហ្វីទ្រី​ ឬ​ បុណ្យស្រាយបួស​ គឺជាពិធីបុណ្យដ៏ធំមួយក្នុងសាសនាឥស្លាម ដែលត្រូវប្រារព្ធឡេីងជារៀងរាល់ឆ្នាំ បន្ទាប់ពីបានបញ្ចប់ការបួសតមអាហារ រយៈពេលមួយខែពេញនៃខែរ៉ាម៉ាឌន។ នៅក្នុងពិធីបុណ្យនេះ​ សាសនិកឥស្លាមទាំងប្រុសទាំងស្រី​ ទាំងក្មេងទាំងចាស់​ ត្រូវរៀបចំសម្អិតសម្អាងកាយពីព្រលឹម​ ដោយស្លៀកសម្លៀកបំពាក់ថ្មីៗស្អាតៗ​។

បន្ទាប់ពីបានស្រស់ស្រូបអាហាររួច​ ពួកគាត់ត្រូវទៅចូលរួមថ្វាយបង្គំ​ និងស្តាប់ធម្មទេសនានៅតាមវិហារនានា។​ បន្ទាប់មកគឺជាឱកាសរីករាយដោយពួកគាត់ត្រូវសាកសួរសុខទុក្ខគ្នា​ និងសុំអភ័យទោសពីគ្នាទៅវិញទៅមក​ រវាងសមាជិកគ្រួសារ​ ព្រមទាំងញាតិមិត្តជិតឆ្ងាយ។ ក្នុងឱកាសនោះ​ សាសនាឥស្លាមក៏បានជម្រុញឲ្យសាសនិករបស់ខ្លួនបង្កើនការបរិច្ចាគទាន​ ទៅដល់អ្នកទីទាល់ក្រ​ ចាស់ជរាផងដែរ៕