(ពោធិ៍សាត់)៖ ខណ្ឌរដ្ឋបាលជលផល នៃមន្ទីរកសិកម្ម រុក្ខាប្រមាញ់ និងនេសាទខេត្តពោធិ៍សាត់ នៅថ្ងៃទី២២ ខែមីនា ឆ្នាំ២០២៦ បានព្រលែងត្រីជិតផុតពូជ ៣ក្បាលចូលទៅក្នុងតំបន់អភិរក្សជលផលកំពង់ប្រាក់ ដែលស្ថិតនៅឃុំកំពង់លួង ស្រុកក្រគរ ខេត្តពោធិសាត់។

ពិធីនេះ មានការចូលរួមដោយលោក ភុន សុវណ្ណា នាយខណ្ឌរដ្ឋបាលជលផលពោធិ៍សាត់, រដ្ឋបាលជលផលក្រគរ, សង្កាត់រដ្ឋបាលជលផលកំពង់លួង, ក្រុមការងារវិទ្យាស្ថានស្រាវជ្រាវ និងអភិវឌ្ឍន៍ជលផលទឹកសាប នៃរដ្ឋបាលជលផល, មហាវិទ្យាល័យវិទ្យាសាស្រ្តជលផលនិងវារីវប្បកម្មនៃសាកលវិទ្យាល័យភូមិន្ទកសិកម្ម និងគម្រោងអច្ឆរិយភាពនៃទន្លេមេគង្គ អធិការដ្ឋានរដ្ឋបាលជលផលខាងត្បូងបឹងទន្លេសាប កងកម្លាំងរាជអាវុធហត្ថស្រុកក្រគរ និងសហគមន៍នេសាទអន្លង់រាំង។

សូមជម្រាបថា ប្រភេទត្រីកម្រ និងជិតផុតពូជ ដែលបានព្រលែងចូលទៅក្នុងតំបន់អភិរក្សជលផលកំពង់ប្រាក់ មានដូចជា ត្រីគល់រាំង ទម្ងន់ ៨គីឡូក្រាម មួយក្បាល មានប្រវែងដងខ្លួន ៧៣ស.ម ដែលត្រូវបានប្រគល់ឱ្យដោយប្រជានេសាទឈ្មោះ អ៊ុក នី រស់នៅភូមិទី២ ឃុំកំពង់លួង ស្រុកក្រគរ ខេត្តពោធិ៍សាត់ និងត្រីរាជ ១ក្បាល ទម្ងន់ ៤០គីឡូក្រាម ប្រវែងដងខ្លួន ១៦៣ ស.ម ដែលត្រូវបានប្រគល់ឱ្យដោយប្រជានេសាទឈ្មោះ ហោ ហៀង រស់នៅភូមិអន្លង់រាំង ឃុំកំពង់ពោធិ៍ ស្រុកក្រគរ ខេត្តពោធិ៍សាត់។​

គួររំលឹកផងដែរថា កាលពីថ្ងៃទី១២ ខែកុម្ភៈ ឆ្នាំ២០២៦កន្លងទៅ ត្រីគល់រាំងចំនួន ២ក្បាល មានទម្ងន់ ៧០គីឡូក្រាម ត្រូវបានលែងចូលអាងទឹកខេត្តត្បូងឃ្មុំ ដើម្បីអភិរក្សធនធានជលផល ជាពិសេសប្រភេទត្រីដែលជាអត្តសញ្ញាណជាតិ «មច្ឆាជាតិ» និងកំពុងរងការគំរាមកំហែង។

ដូច្នេះនេះជាលើកទី៣ហើយ សម្រាប់ក្នុងឆ្នាំ២០២៦នេះ ដែលប្រជានេសាទបានប្រគល់ប្រភេទជិតផុតពូជ ដែលសរុបទាំងអស់ចំនួន ០៥ក្បាល (ត្រីគល់រាំងចំនួន ០២ក្បាល និងត្រីរាជចំនួន ០៣ក្បាល)៕