(ព្រៃវែង)៖ ដើម្បីអបអរសាទរពិធីបុណ្យចូលឆ្នាំថ្មី ប្រពៃណីជាតិខ្មែរ ឆ្នាំមមី អដ្ឋស័ក ព.ស.២៥៦៩ គ.ស.២០២៦ រដ្ឋបាលស្រុកពារាំង ខេត្តព្រៃវែង បានរៀបចំកម្មវិធីសង្ក្រាន្តចំនួន ៣កន្លែង ដើម្បីបង្កើនបរិយាកាសរីករាយ សាមគ្គីភាព និងអភិរក្សប្រពៃណីវប្បធម៌ជាតិ។

តាមការបញ្ជាក់ កម្មវិធីសង្ក្រាន្តទាំង ៣កន្លែង នឹងប្រព្រឹត្តទៅដូចខាងក្រោម៖

*ទី១៖ ថ្ងៃទី៥ ខែមេសា ឆ្នាំ២០២៦ ប្រារព្ធនៅខាងមុខវិទ្យាល័យព្រៃព្នៅ
*ទី២៖ ថ្ងៃទី៧ ខែមេសា ឆ្នាំ២០២៦ ប្រារព្ធនៅបរិវេណវិទ្យាល័យ សម្តេចតេជោ ហ៊ុន សែន ពារាំង
*ទី៣៖ ថ្ងៃទី៨ ខែមេសា ឆ្នាំ២០២៦ ប្រារព្ធនៅបរិវេណវិទ្យាល័យ ហ៊ុន សែន កំពង់ពពិល។ ក្នុងកម្មវិធីសង្ក្រាន្តនីមួយៗ មានរៀបចំសកម្មភាពបែបប្រពៃណីជាច្រើន រួមមាន ការតាំងបង្ហាញផលិតផលក្នុងស្រុក ការលេងល្បែងប្រជាប្រិយ ការសម្តែងសិល្បៈ និងកម្មវិធីរាំលេងកម្សាន្តយ៉ាងសម្បូរបែប។

ជាពិសេស សម្រាប់សង្ក្រាន្តសហគមន៍ព្រៃព្នៅ ក៏មានការផ្តល់ជូនពងទាស្ងោរចំនួន ១០,០០០គ្រាប់ ជូនប្រជាពលរដ្ឋ និងភ្ញៀវទេសចរណ៍ពិសារដោយឥតគិតថ្លៃផងដែរ។

រដ្ឋបាលស្រុកពារាំង សូមអំពាវនាវដល់ប្រជាពលរដ្ឋ និងភ្ញៀវទេសចរណ៍ទាំងអស់ ចូលរួមក្នុងកម្មវិធីសង្ក្រាន្តនេះឲ្យបានច្រើនកុះករ ដើម្បីរួមគ្នាអបអរសាទរ និងលើកស្ទួយតម្លៃវប្បធម៌ប្រពៃណីជាតិខ្មែរ៕