(ភ្នំពេញ)៖ នាយកដ្ឋានស៉ើបអង្កេត និងអនុវត្តនីតិវិធី នៃអគ្គនាយកដ្ឋានអន្ដោប្រវេសន៍ បានឃាត់ខ្លួនជនជាតិប៉ាគីស្ថាន ៣នាក់ និងជនជាតិខ្មែរ ២នាក់ ពាក់ព័ន្ធករណីឆបោក និងធ្វើទិដ្ឋាការស្នាក់នៅក្លែងក្លាយ បញ្ជូនទៅកាន់សាលាដំបូងរាជធានីភ្នំពេញ ដើម្បីចាត់ការតាមផ្លូវច្បាប់។

ការឃាត់ខ្លួននេះដោយអនុវត្តតាមបទបញ្ជារបស់លោកឧត្តមសេនីយ៍ឯក សុខ វាសនា អគ្គនាយក នៃអគ្គនាយកដ្ឋានអន្ដោប្រវេសន៍ និងមានការសម្របសម្រួលពី តំណាងអយ្យការអមសាលាដំបូងរាជធានីភ្នំពេញ និងក្រោយពីសមត្ថកិច្ចឃាត់ខ្លួនជនសង្ស័យម្នាក់ដំបូង ឈ្មោះ MD SAYFUZZAMAN ជនជាតិបង់ក្លាដេស រួចបន្ដធ្វើការស្រាវជ្រាវ។

ជនសង្ស័យទាំង៥នាក់ ដែលឃាត់ខ្លួនពាក់ព័ន្ធនឹងការឆបោក និងធ្វើទិដ្ឋាការស្នាក់នៅក្លែងក្លាយ រួមមាន៖ ១៖ឈ្មោះ KHAN NAEEM (STAVE KHAN) ភេទប្រុស ជនជាតិប៉ាគីស្ថាន, ២៖ឈ្មោះ KHAN MEHDI HASSAN (DAWOOD IBRAHIM) ភេទប្រុស ជនជាតិប៉ាគីស្ថាន, ៣៖ឈ្មោះ SHAHBAZ MUHAMMAD ភេទប្រុស ជនជាតិប៉ាគីស្ថាន, ៤៖ឈ្មោះ អែម រតនៈ ហៅ ខេ ភេទប្រុស ជនជាតិខ្មែរ និង៥៖ឈ្មោះ ជឹម ចាន់កែ ហៅម៉េង ភេទប្រុស ជនជាតិខ្មែរ។

បច្ចុប្បន្ន ជនសង្ស័យទាំង៦នាក់ (ជនជាតិបង់ក្លាដេស១នាក់, ប៉ាគីស្ថាន៣នាក់ និងខ្មែរ២នាក់) ត្រូវឃាត់ខ្លួននៅមណ្ឌលអប់រំកែប្រែទី១ (ម១) រង់ចាំចំណាត់ការបន្ត៕