(ភ្នំពេញ)៖ ក្រសួងសេដ្ឋកិច្ច និង ហិរញ្ញវត្ថុ នឹងរៀបចំកិច្ចប្រជុំពិភាក្សាស្តីពីការចូលរួមរបស់ភាគីពាក់ព័ន្ធ ដើម្បីគាំទ្រយន្តការអនុវត្ត «គោលនយោបាយអភិវឌ្ឍន៍លំនៅឋានសង្គម និង លំនៅឋានតម្លៃសមរម្យ» ដែលប្រព្រឹត្តទៅនៅថ្ងៃទី ៣០ ខែមីនា ឆ្នាំ២០២៦ វេលាម៉ោង ៨៖៣០ នាទីព្រឹក នៅសណ្ឋាគារ ហៃយ៉ាត់ រីជិនស៊ី ភ្នំពេញ ក្រោមអធិបតីភាពលោក រស់ សីលវ៉ា រដ្ឋលេខាធិការ នៃក្រសួងសេដ្ឋកិច្ច និង ហិរញ្ញវត្ថុ ជាតំណាងដ៏ខ្ពង់ខ្ពស់របស់ អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និង ហិរញ្ញវត្ថុ និង ជាប្រធានគណៈកម្មាធិការអន្តរក្រសួងសម្រាប់គម្រោងអភិវឌ្ឍន៍លំនៅឋានសង្គម និង លំនៅឋានតម្លៃសមរម្យ (គ.អ.ល.)។

កិច្ចពិភាក្សានេះ នឹងរៀបចំក្រោមកិច្ចសម្របសម្រួលរបស់អគ្គនាយកដ្ឋានភាពជាដៃគូរវាងរដ្ឋ និង ឯកជន នៃក្រសួងសេដ្ឋកិច្ច និង ហិរញ្ញវត្ថុ ដែលជាលេខាធិការដ្ឋាននៃ គ.អ.ល. ដោយមានការចូលរួមពីតំណាងក្រសួង ស្ថាប័នថ្នាក់ជាតិ និង ថ្នាក់ក្រោមជាតិ; ដៃគូអភិវឌ្ឍ; អង្គការជាតិ និង អន្តរជាតិ; និង ក្រុមហ៊ុនអភិវឌ្ឍលំនៅឋាន។

កិច្ចពិភាក្សានេះ រៀបចំឡើងក្នុងគោលបំណង៖

(១) ផ្សព្វផ្សាយអំពីឯកសារ «គោលនយោបាយអភិវឌ្ឍន៍លំនៅឋានសង្គម និង លំនៅឋានតម្លៃសមរម្យ» ដើម្បីបញ្រ្ជាបការយល់ដឹងអំពីខ្លឹមសារនៃឯកសារនេះ និង ជំរុញការផ្គត់ផ្គង់លំនៅឋានសង្គម; លំនៅឋានតម្លៃសមរម្យកម្មសិទ្ធិ; និង លំនៅឋានតម្លៃសមរម្យសម្រាប់ជួល និង

(២) កំណត់យន្តការគាំទ្រជាក់លាក់ពីភាគីពាក់ព័ន្ធ ដើម្បីអនុវត្ត «គោលនយោបាយអភិវឌ្ឍន៍លំនៅឋានសង្គម និង លំនៅឋានតម្លៃសមរម្យ»។

ទន្ទឹមនេះ, កិច្ចពិភាក្សានឹងមានរៀបចំការធ្វើបទបង្ហាញស្តីពីទិដ្ឋភាពទូទៅ និង បញ្ហាប្រឈមក្នុងវិស័យលំនៅឋាន; ក្របខណ្ឌនៃ «គោលនយោបាយអភិវឌ្ឍន៍លំនៅឋានសង្គម និង លំនៅឋានតម្លៃសមរម្យ» និង ម៉ូឌែលនៃប្រភេទគម្រោងលំនៅឋានតម្លៃសមរម្យសម្រាប់ជួល; លំនៅឋានតម្លៃសមរម្យកម្មសិទ្ធិ; និង លំនៅឋានសង្គម ដើម្បីជាមូលដ្ឋានសម្រាប់កិច្ចពិភាក្សា ក្នុងការកំណត់យន្តការគាំទ្រសម្រាប់អនុវត្តគោលនយោបាយ ផងដែរ៕