(ភ្នំពេញ)៖ ទីភ្នាក់ងារបារាំងសម្រាប់ការអភិវឌ្ឍន៍(AFD) បានផ្តល់ហិរញ្ញប្បទាន ជាង២១លានអឺរ៉ូ ដល់រដ្ឋាករទឹកស្វយ័តក្រុងភ្នំពេញ ដើម្បីពង្រីក និងបង្កើនគុណភាពបណ្តាញផ្គត់ផ្គង់ទឹកស្អាតរបស់រដ្ឋាករទឹកស្វយ័តក្រុងភ្នំពេញ ដល់ប្រជាពលរដ្ឋឱ្យកាន់តែប្រសើរឡើង។

ពិធីចុះហត្ថលេខាលើកិច្ចសន្យាសម្រាប់ការផ្គត់ផ្គង់ និងការដឹកជញ្ជូនបំពង់ដែក និងគ្រឿងបរិក្ខារសម្រាប់ប្រព័ន្ធបញ្ជូនបឋម ក្រោមគម្រោងផ្គត់ផ្គង់ទឹកបាខែងដំណាក់កាលទី៣ រវាងរដ្ឋាករទឹកស្វយ័តក្រុងភ្នំពេញ និង SAINT-GOBAIN PAM CANALISATION បានរៀបចំឡើង នៅថ្ងៃទី២៥ ខែមីនា ឆ្នាំ២០២៦នេះ ក្រោមវត្តមាន លោកស្រី Marie BOUSCAIL ទីប្រឹក្សាទីមួយ និងជាភារធារីនៅស្ថានទូតបារាំងប្រចាំនៅកម្ពុជា។

កិច្ចសន្យានេះគឺជាផ្នែកមួយនៃគម្រោងបាខែងជំហានកាលទី៣ ដើម្បីពង្រីក និងបង្កើនគុណភាពបណ្តាញផ្គត់ផ្គង់ទឹករបស់រដ្ឋាករទឹកស្វយ័តក្រុងភ្នំពេញ ហើយក៏នឹងបម្រើជាឆ្អឹងខ្នងដ៏សំខាន់សម្រាប់ប្រព័ន្ធបណ្តាញទឹកដោយបញ្ជូនទឹកពីរោងចក្រប្រព្រឹត្តកម្មទឹកដោយផ្ទាល់ទៅកាន់ប្រជាជន។

កិច្ចសន្យាដែលបានចុះហត្ថលេខានៅថ្ងៃនេះ មានតម្លៃ ជាង២១លានអឺរ៉ូ ត្រូវបានផ្តល់ហិរញ្ញប្បទានដោយ ទីភ្នាក់ងារបារាំងសម្រាប់ការអភិវឌ្ឍន៍ ក្រោមគម្រោងផ្គត់ផ្គង់ទឹកបាខែងដំណាក់កាលទី៣ ហើយរដ្ឋាភិបាលកម្ពុជាបានលើកលែងពន្ធនាំចូល និងពន្ធផ្សេងៗទៀតសម្រាប់គម្រោងនេះ។ តាមរយៈកិច្ចសន្យានេះ រួមបញ្ចូលការផ្គត់ផ្គង់បំពង់ដែក ដែលអាចបត់បែនបានប្រវែង ជាង១៩ គីឡូម៉ែត្រ ដែលមានទំហំចាប់ពី DN100mm រហូតដល់ DN1400mm ទ្រង់ទ្រាយធំ រួមនឹងបរិក្ខាសំខាន់ៗមួយចំនួនទៀត។

លោក អ៊ីន សាកាន អគ្គនាយករដ្ឋាករទឹកស្វយ័តក្រុងភ្នំពេញ បានមានប្រសាសន៍ថា «កិច្ចសន្យាថ្ងៃនេះ គឺជាកញ្ចប់ដ៏សំខាន់បំផុតមួយនៅក្នុងគម្រោងផ្គត់ផ្គង់ទឹកបាខែងដំណាក់កាលទី៣។ បំពង់មេនាំទឹកប្រវែង ជាង១៩ គីឡូម៉ែត្រនេះនឹងបម្រើជាឆ្អឹងខ្នងដ៏សំខាន់សម្រាប់ប្រព័ន្ធបណ្តាញទឹករបស់យើង ដោយបញ្ជូនទឹកស្អាតពីរោងចក្រផលិតទឹកស្អាតដោយផ្ទាល់ទៅកាន់ប្រជាជន»។

លោកបានលើកឡើងថា ការសម្រេចបាននូវគម្រោងផ្គត់ផ្គង់ទឹកបាក់ខែងជំហានទី៣ អាចធ្វើទៅបានដោយសារតែការគាំទ្រពីរដ្ឋាភិបាលបារាំង, AFD, ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍, ក្រសួងសេដ្ឋកិច្ច និងហិរញ្ញវត្ថុ ,ក្រុមប្រឹក្សាភិបាលនៃ PPWSA និងថ្នាក់ដឹកនាំ PPWSA។

លោកបន្តថា ការអភិវឌ្ឍហេដ្ឋារចនាសម្ព័ន្ធយ៉ាងឆាប់រហ័សរបស់រាជធានីភ្នំពេញ ការកើនឡើងនៃការវិនិយោគ និងការកើនឡើងនៃចំនួនប្រជាជនបានបង្កើនតម្រូវការទឹកស្អាតយ៉ាងខ្លាំង។ ជាការឆ្លើយតប PPWSA នៅតែប្តេជ្ញាចិត្តយ៉ាងមុតមាំក្នុងការបង្កើនសមត្ថភាពរបស់ខ្លួនក្នុងការផ្តល់ការផ្គត់ផ្គង់ទឹកដែលអាចទុកចិត្តបាន និងគ្រប់គ្រាន់សម្រាប់ប្រជាពលរដ្ឋទាំងអស់។ ហើយការផ្គត់ផ្គង់នេះ មិនមែនតែសម្រាប់តម្រូវបច្ចុប្បន្ននោះទេ ប៉ុន្តែក៏ស្របនឹងតម្រូវការនាពេលអនាគតផងដែរ៕