(ត្បូងឃ្មុំ)៖ លោក ប៉ែន កុសល្យ អភិបាលខេត្តត្បូងឃ្មុំ បានអញ្ជើញជាអធិបតីភាព ក្នុងពិធីជួសំណេះសំណាលជាមួយបេក្ខភាពជ័យលាភី សិស្សពូកែថ្នាក់ខេត្តពីថ្នាក់ទី៧ ដល់ថ្នាក់ទី១២ ផ្នែកអក្សរសិល្ប៍ខ្មែរ គណិតវិទ្យា រូបវិទ្យា ឆ្នាំ២០២៦ នៅសាលប្រជុំអាគារបូព៌ា សហភាពសហព័ន្ធយុវជនកម្ពុជាខេត្តត្បូងឃ្មុំ នារសៀលថ្ងៃទី២៥ ខែមីនា ឆ្នាំ២០២៦។

លោក ផាត សុខសាន្ត ប្រធានមន្ទីរអប់រំ យុវជន និងកីឡាខេត្តត្បូងឃ្មុំ បាឲ្យដឹងថា សម្រាប់ឆ្នាំសិក្សា២០២៦-២០២៧នេះ មានបេក្ខជនដាក់ពាក្យប្រកួតប្រជែងសិស្សពូកែថ្នាក់ខេត្តសរុបចំនួន ១៣៥៤នាក់ ស្រី៩៣១នាក់។

លោក បន្តថា ឆ្លងកាត់ការប្រកួតប្រជែងសម្រិតសម្រាំងដោយការប្រឡងជម្រុះ សិស្សពូកែពីថ្នាក់ទី៧ ដល់ថ្នាក់ទី១២ យើងទទួលបានបេក្ខភាពជ័យលាភី ចំនួន១៨០នាក់ ស្រី១០០នាក់ មកពីបណ្តាសាលាអនុវិទ្យាល័យ-វិទ្យាល័យរដ្ឋ និងឯកជនចំនួន៩០ ទូទាំងខេត្តត្បូងឃ្មុំផងដែរ ដោយជ័យលាភីដែលបានកំណត់គឺយកពីលេខ១ ដល់លេខ១០ តាមលំដាប់ពិន្ទុនៃមុខវិជ្ជានីមួយៗគ្រប់កម្រិតថ្នាក់ផងដែរ។

ក្នុងឱកាសនោះ លោក ប៉ែន កុសល្យ អភិបាលខេត្ត បានមានប្រសាសន៍សាទរ និងកោតសរសើរចំពោះការយកចិត្តរបស់មន្ទីរអប់រំយុវជន និងកីឡាខេត្ត ជាពិសេសលោកគ្រូ អ្នកគ្រូ តាមបណ្តាអនុវិទ្យាល័យ-វិទ្យាល័យរដ្ឋ និងឯកជន ដែលបានខិតខំបង្ហាត់បង្រៀនប្អូនៗជាយុវជន សិស្សានុសិស្ស ឱ្យក្លាយជាសិស្សឆ្នើម ពូកែសម្រាប់ខេត្តត្បូងឃ្មុំយើង។

លោកអភិបាលខេត្តក៏បានក៏បានសង្កត់ធ្ងន់ផងដែរថា ការអប់រំ គឺជាកត្តាគន្លឺះសំខាន់ក្នុងការអភិវឌ្ឍន៍ធនធានមនុស្ស ប្រកបដោយសមត្ថភាព គុណវុឌ្ឍិ និងជាសសរទ្រូងដ៏រឹងមាំសម្រាប់សង្គមជាតិកម្ពុជាយើងទាំងមូល។

លោក ប៉ែន កុសល្យ បញ្ជាក់ថាការជាប់សិស្សពូកែថ្នាក់ខេត្តនេះ ជាផ្លូវសម្រាប់ប្អូនៗ ប៉ុន្តែសូមកុំគិតថា ត្រឹមតែពូកែក្នុងថ្នាក់រៀន និងសាលាគឺគ្រប់គ្រាន់ ប្អូនៗត្រូវរៀនសូត្រអ្វីដែលថ្មីៗ ដើម្បីធ្វើយ៉ាងណាពង្រឹងសម្ថភាពឱ្យកាន់តែខ្លាំង ស្របតាមយុគសម័យឌីជីថល។

លោកក៏បានផ្តាំផ្ញើដល់សិស្សានុសិស្សទាំងអស់ត្រូវខិតខំប្រឹងប្រែងរៀនសូត្របន្ថែមទៀត ដើម្បីឆ្ពោះទៅការប្រកួតប្រជែងសិស្សពូកែថ្នាក់ជាតិ។

ឆ្លៀតក្នុងឱកាសនោះ លោក ប៉ែន កុសល្យ អភិបាលខេត្តបានចែកជូននៅប័ណ្ណសរសើរ និងមេដៃដល់សិស្សឆ្នើមទាំង១៨០រូប និងថតរូបអនុស្សាវរីយ៍ផងដែរ៕