(ភ្នំពេញ)៖ លោក ណុះ ស្លេះ រដ្ឋលេខាធិការក្រសួងអប់រំ យុវជន និងកីឡា បានថ្លែងថា កម្មវិធីអក្ខរកម្ម ជួយប្រជាពលរដ្ឋឱ្យទទួលការអប់រំ ភាសា វិទ្យាសាស្រ្ត វប្បធម៌ និងសេដ្ឋកិច្ច ដើម្បីឆ្លើយតបទៅនឹងទីផ្សារការងារ ឈានឆ្ពោះទៅរកការកសាងបាននូវមូលធនបញ្ញា និងមូលធនសង្គម។

ក្នុងពិធីបើកដំណើរការថ្នាក់អក្ខរកម្ម តាមរោងចក្រ នាថ្ងៃទី២៦ ខែមីនា ឆ្នាំ២០២៦ លោក ណុះ ស្លេះ បានឱ្យដឹងថា ដោយមានការយកចិត្តទុកដាក់ ពីរាជរដ្ឋាភិបាលកម្ពុជា ការអភិវឌ្ឍមូលធនមនុស្ស ដើរតួនាទីយ៉ាងសំខាន់ ក្នុងរបៀបវារៈ នៃការអភិវឌ្ឍជាតិ តាមរយៈការអភិវឌ្ឍវិស័យអប់រំ វិទ្យាសាស្ត្រ បច្ចេកទេស និងបណ្ដុះបណ្តាលមុខជំនាញវិជ្ជាជីវៈប្រកបដោយគុណភាព សមធម៌ និងបរិយាបន្ន ព្រមទាំងការបង្កើនឱកាស ទទួលបានការសិក្សាពេញមួយជីវិត សម្រាប់ទាំងអស់គ្នា។

លោករដ្ឋលេខាធិការ បានគូសបញ្ជាក់ថា ក្រសួងបានសហការ ជាមួយអង្គការ យូណេស្កូ អង្គការ ILO (BFC), CGTI ផ្សព្វផ្សាយ និងបញ្ជ្រាបកម្មវិធីអក្ខរកម្មនៅកន្លែងធ្វើការ ក្នុងក្របខ័ណ្ឌជាតិស្តីពីការអភិវឌ្ឍជំនាញ និងគោលនយោបាយពាក់ព័ន្ធនឹងទំនួលខុសត្រូវសង្គមសាជីវកម្ម (CSR) ស្របជាមួយនឹងយុទ្ធសាស្ត្រអប់រំជាតិ កម្លាំងពលកម្ម និងអភិវឌ្ឍន៍ឧស្សាហកម្ម។

លើកទឹកចិត្តដល់កិច្ចសហប្រតិបត្តិការរយៈពេលវែងរវាងរដ្ឋាភិបាល រោងចក្រ សហគ្រាស និងដៃគូអភិវឌ្ឍនានាក្នុងការអនុវត្ត និងពង្រីកវិសាលភាពកម្មវិធីអក្ខរកម្មតាមរោងចក្រ ដើម្បីលើកកម្ពស់កម្មវិធីអក្ខរកម្ម ដែលជាមូលដ្ឋានគ្រឹះដ៏រឹងមាំ សម្រាប់អភិវឌ្ឍសមត្ថភាពរបស់ យុវជនធ្វើពលកម្ម នៅក្រៅសាលា កម្មករ កម្មការិនីរោងចក្រ ប្រកបដោយថាមពល គុណភាព និងភាពជាពលរដ្ឋសកល ក្នុងការរួមចំណែក បង្កើនល្បឿននៃកំណើនសេដ្ឋកិច្ច ការបង្កើតការងារ ការប្រកួតប្រជែងក្នុងសហគ្រាស ការកាត់បន្ថយភាពក្រីក្រ បរិយាបន្នសង្គម។

នាឱកាសនោះ លោក Flavio Bonetti តំណាងអង្គការយូណេស្កូ ប្រចាំកម្ពុជា បានលើកឡើងថា ការជួបជុំនៅថ្ងៃនេះ ឆ្លុះបញ្ចាំងពីការប្តេជ្ញាចិត្តរួមគ្នា ដ៏មានឥទ្ធិពលមួយ ផ្តល់អំណាចដល់កម្លាំងពលកម្ម របស់ប្រទេសកម្ពុជា តាមរយៈការអប់រំ និងការអភិវឌ្ឍជំនាញ។ អក្ខរកម្ម គឺច្រើនជាងសមត្ថភាព ក្នុងការអាន និងសរសេរ។ វាគឺជាមូលដ្ឋានគ្រឹះ នៃសេចក្តីថ្លៃថ្នូររបស់មនុស្ស និងជាកត្តាជំរុញដ៏សំខាន់ នៃការអភិវឌ្ឍន៍ប្រកបដោយចីរភាព។

ទន្ទឹមនឹងនេះ លោក Choi Jean Huah អគ្គនាយករងរោងចក្រ Olive Apparel ក៏បានថ្លែងអរគុណ និងធ្វើការប្តេជ្ញាចិត្តយ៉ាងមុតមាំ ចំពោះកិច្ចសហការ និងគំនិតផ្តូចផ្តើមឱ្យមានកម្មវិធីអក្ខរកម្ម តាមរោងចក្រ របស់ក្រសួងអប់រំ យុវជន និងកីឡា និងអង្គការដៃគូ ដើម្បីផ្តល់ឱកាសដល់កម្មករ កម្មការិនីទទួលបានការសិក្សារៀនសូត្រ៕