(ភ្នំពេញ)៖ បដិមាព្រះវិស្ណុផ្ទុំធ្វើពីសំរឹទ្ធ ដែលធំជាងគេងនៅអាស៉ីអាគ្នេយ៍ និងរកឃើញនៅកម្ពុជា បាននិងកំពុងបង្ហាញព្រះកាយនៅសារមន្ទីរមួយ ក្នុងរដ្ឋធានីវ៉ាស៉ីងតុន សហរដ្ឋអាមេរិក រហូតដល់ខែកញ្ញា ឆ្នាំ២០២៦។ នេះបើតាមការផ្សាយរបស់ស្ថានទូតអាមេរិកប្រចាំកម្ពុជា នៅថ្ងៃទី២៧ ខែមីនា ឆ្នាំ២០២៦។

ស្ថានទូតអាមេរិកប្រចាំកម្ពុជា តាមរយៈហ្វេសប៊ុក បានបញ្ជាក់ថា «ការតាំងពិព័រណ៍បដិមាព្រះវិស្ណុ “Vishnu’s Cosmic Ocean” ចាប់បើកហើយ នៅសារមន្ទីរសិល្បៈអាស៉ី Smithsonian ក្នុងរដ្ឋធានីវ៉ាស៉ីងតុន សហរដ្ឋអាមេរិក។ ពិធីតាំងពិព័រណ៍ដ៏ពិសេសនេះ បានតាំងបង្ហាញពីបដិមាដ៏ធំអស្ចារ្យនៃតំបន់អាស៊ីអាគ្នេយ៍ ដែលជាកម្ចីពីសារមន្ទីរជាតិនៃប្រទេសកម្ពុជា»។

ស្ថានទូតអាមេរិកប្រចាំកម្ពុជា បានបន្ថែមថា ពិធីបើកព្រឹត្តិការណ៍តាំងពិព័រណនេះ មានការចូលរួមពីតំណាងក្រសួងវប្បធម៌ និងវិចិត្រសិល្បៈ ប្រទេសកម្ពុជា។ ស្ថានទូតអាមេរិកប្រចាំកម្ពុជា ក៏បានស្នើមហាជនចូលទស្សនាផងដែរ ដោយលើកឡើងថា ប្រសិនបើលោកអ្នកមានវត្តមាននៅរដ្ឋធានីវ៉ាស៉ីងតុន មុនថ្ងៃទី៧ ខែកញ្ញា ឆ្នាំ ២០២៦ សូមកុំរំលងឱកាសដ៏កម្រនេះ ដែលជាការបញ្ជាក់ពីភាពជាដៃគូរាប់ទសវត្សរ៍រវាងប្រទេសទាំងពីរ។

សូមជម្រាបថា ក្នុងឆ្នាំ១៩៣៦ ការធ្វើកំណាយស្រាវជ្រាវបានរកឃើញបដិមារូបព្រះវិស្ណុផ្ទំមួយកំណាត់ព្រះកាយយ៉ាងធំ ដែលធ្វើពីសំរឹទ្ធនិងស្រោបដោយមាស នៅកណ្ដាលប្រាសាទមេបុណ្យខាងលិច។ បដិមាព្រះវិស្ណុំផ្ទុំដ៏ល្អវិចិត្រនេះ ត្រូវបានរៀបចំគម្រោងជួសជុល ដែលជាគម្រោងសហប្រតិបត្តិការផ្នែកវិទ្យាសាស្រ្ត និងបច្ចេកទេសមួយរវាងបារាំងនិងកម្ពុជា ដែលបានឯកភាពគ្នា ឆ្នាំ២០១៩។

គម្រោងនេះ បានជួសជុលអភិរក្ស និងសិក្សាវិភាគសមាសភាពផ្សំលើបតិមាព្រះនារាយណ៍ផ្ទុំ នៅវិទ្យាស្ថាន Centre de recherche et de restoration des musées de France (C2RMF) នៃប្រទេសបារាំង ដើម្បីធ្វើការឈ្វេងយល់បន្ថែមពីបច្ចេកទេសដ៏ប៉ិនប្រសព្វនៃការសិតលោហៈខ្នាតធំមហាសាលក្នុងអារ្យធម៌ខ្មែរនាសម័យអង្គរ។ លទ្ធផលនៃការសិក្សាស្រាវជ្រាវនេះ បោះពុម្ពផ្សាយយ៉ាងទូលំទូលាយ ដើម្បីចែករំលែកពីបទពិសោធន៍ និងទេពកោសល្យក្នុងការសិតលោហៈ នៅក្នុងប្រវត្តិសាស្រ្តមនុស្សជាតិ។ ក្រៅពីការងារវិភាគបច្ចេកទេស ក្រុមជំនាញបានសាកល្បងផ្គុំបំណែកទាំង៣៩ ដែលបានដាច់ចេញពីដងខ្លួនអស់រយៈកាលជិត ១០០០ឆ្នាំមកហើយ និងរៀបចំផ្គុំតម្លើងជា 3D ដើម្បីបានដឹងពីទីតាំងនៃបំណែកទាំងនោះ។

ក្រោយគម្រោងអភិរក្ស និងវិភាគស្រាវជ្រាវនេះបញ្ចប់ បដិមាដ៏វិចិត្រនេះ ធ្លាប់ត្រូវដាក់តាំងបង្ហាញក្នុងពិព័រណ៍មិនអចិន្ត្រៃយ៍នៅសារមន្ទីរសិល្បៈអាស៊ីហ្គីមេ ហើយការដាក់តាំងនេះ ក៏មានបន្ថែមរូបចម្លាក់អំពីសំរឹទ្ធចំនួន១២៦ ផ្សេងទៀត ដែលខ្ចីបន្ថែមពីសារមន្ទីរជាតិកម្ពុជា។ ពិព័រណ៍មិនអចិន្ត្រៃយ៍ស្តីពីសំរឹទ្ធសម័យអង្គរ៖ សិល្បៈនៃអាទិទេព ដែលរៀបចំនៅសារមន្ទីរជាតិហ្គីមេ បង្ហាញពីការវិវឌ្ឍបច្ចេកទេសនៃការសិតលោហៈក្នុងអារ្យធម៌ខ្មែរ រាប់ចាប់ពីសម័យបុរេប្រវត្តិសាស្រ្ត ដល់សម័យក្រោយអង្គរ។ ក្រោយបញ្ចប់ពិព័រណ៍មិនអចិន្ត្រៃយ៍ នៅសារមន្ទីរហ្គីមេ បដិមានេះបាននិងកំពុងបន្តដំណើរទៅដាក់តាំងនៅអាមេរិក ចំនួ ន៣ទីតាំងបន្ថែមទៀត។

ការធ្វើដំណើររបស់បដិមាព្រះនរាយណ៍ផ្ទុំ ដែលជាអាទិទេពព្រហ្មញ្ញសាសនារបស់ខ្មែរនាសម័យអង្គរ ប្រៀបដូចជាការនាំយកនូវទេពកោសល្យល្អឯកនៃបច្ចេកទេសសិតលោហៈដ៏អស្ចារ្យ របស់ជាតិខ្មែរ ចេញទៅផ្សព្វផ្សាយនៅលើឆាកអន្តរជាតិ ដើម្បីជាប្រយោជន៍ឲ្យសាធារណជនបានឈ្វែងយល់បន្ថែម ពីភាពឧត្តុងឧត្តមខ្ពង់ខ្ពស់នៃអារ្យធម៌ខ្មែរនាសម័យបុរាណ។

មិនទាន់មានការបកស្រាយលម្អិតពីរបៀបដែលខ្មែរអាចផលិតបដិមាព្រះវិស្ណុ ដែលធ្វើពីលោហៈសំរឹទ្ធ ហើយស្រោបដោយមាសខ្នាតយក្សបែបនេះទេ។ ប៉ុន្តែបើតាមលោកបណ្ឌិត លី រស្មី រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ នៅសម័យអង្គរ ខ្មែរធ្លាប់មានឡស្លលោហៈធំជាងគេនៅអាស៉ីអាគ្នេយ៍ ដែលគ្មានប្រទេសណាមួយនៅតំបន់នេះ ស្លលោហៈបានល្អដូចខ្មែរទេ ជាពិសេសការស្លសំរឹទ្ធ ដែលប្រើកម្តៅដល់ទៅ ១៣០០អង្សា៕