(សៀមរាប)៖ លោក លី សារី អភិបាលរងខេត្តសៀមរាប បានអំពាវនាវដល់អ្នកធ្វើដំណើរ និងប្រជាពលរដ្ឋទាំងអស់ សូមចូលរួមគោរពច្បាប់ចរាចរណ៍ឲ្យបានខ្ជាប់ខ្ជួន និងសូមកុំបើកបរ ឬបញ្ឈប់យានយន្តជាន់លើគំនូសសញ្ញាថ្មើរជើង ដែលនាំឲ្យរាំងស្ទះដល់អ្នកឆ្លងកាត់ផ្លូវ។

លោកបន្តថា ជាពិសេសត្រូវបង្កើនការប្រុងប្រយ័ត្នខ្ពស់ នៅពេលបើកបរឆ្លងកាត់ចំណុចប្រសព្វ និងស្តុបនានា និងចូលរួមថែរក្សាសមិទ្ធផលសាធារណៈ និងគោរពសិទ្ធិអាទិភាពរបស់អ្នកដទៃ ដើម្បីបង្កើតនូវវប្បធម៌ នៃការធ្វើដំណើរប្រកបដោយសុវត្ថិភាព និងភាពថ្លៃថ្នូរនៅក្នុងទីក្រុងទេសចរណ៍ ឲ្យសក្ដិសមជាទីក្រុងទេសចរណ៍គំរូ។

ការអំពាវនាវយ៉ាងដូច្នេះរបស់លោក លី សារី នៅក្នុងឱកាសដែលចុះពិនិត្យ និងរៀបចំគំនូសសញ្ញាចរាចរណ៍ថ្មី (គំនូសថ្មើរជើង) របស់ក្រុមការងារបច្ចេកទេសនៃមន្ទីរសាធារណការ និងដឹកជញ្ជូនខេត្ត នៅចំណុចស្តុបចុងកៅស៊ូ សង្កាត់ស្លក្រាម ក្រុងសៀមរាប នារសៀលថ្ងៃទី២៦ ខែមីនានេះ ដើម្បីបង្កើនសុវត្ថិភាព និងសណ្ដាប់ធ្នាប់សាធារណៈនៅក្នុងក្រុងសៀមរាប ជំរុញការកែលម្អហេដ្ឋារចនាសម្ព័ន្ធផ្លូវថ្នល់ ជាពិសេសការរៀបចំគំនូសសញ្ញាចរាចរណ៍ឲ្យបានច្បាស់លាស់ សម្រាប់បម្រើដល់ការធ្វើដំណើររបស់ប្រជាពលរដ្ឋ។

លោកបានបន្តថា ការកែលម្អគំនូសសញ្ញាចរាចរណ៍នេះ មិនត្រឹមតែជួយឲ្យសោភ័ណភាពដងផ្លូវមានភាពស្រស់ស្អាតប៉ុណ្ណោះទេ ប៉ុន្តែថែមទាំងផ្តល់អត្ថប្រយោជន៍សំខាន់ៗជាច្រើន ដូចជា៖ ការបង្កើនសុវត្ថិភាពដល់អ្នកថ្មើរជើង តាមរយៈការផ្តល់អាទិភាព និងភាពងាយស្រួលដល់ពលរដ្ឋ ក្នុងការឆ្លងកាត់ផ្លូវដោយសុវត្ថិភាព និងកាត់បន្ថយហានិភ័យនៃគ្រោះថ្នាក់ចរាចរណ៍ជាយថាហេតុ។

លោកបន្ថែមថា ការរៀបចំនេះ នឹងជួយឲ្យអ្នកបើកបរយានយន្តគ្រប់ប្រភេទ ងាយស្រួលចំណាំ និងបញ្ឈប់យានយន្តបានត្រឹមត្រូវតាមបច្ចេកទេសច្បាប់។ ជាពិសេសកាត់បន្ថយការកកស្ទះ ព្រោះនៅពេលដែលគំនូសសញ្ញាច្បាស់លាស់ ចរាចរណ៍នឹងមានភាពរលូន និងមានរបៀបរៀបរយជាងមុនផងដែរ។

ជាមួយគ្នានេះ លោក លី សារី បានណែនាំឲ្យក្រុមការងារបច្ចេកទេសប្រើប្រាស់ថ្នាំលាប ដែលមានគុណភាពខ្ពស់ ដែលមានសមត្ថភាពចំណាំងផ្លាតបានល្អនៅពេលយប់ និងធន់នឹងការសឹកកកិត។ ទន្ទឹមនឹងការកែលម្អហេដ្ឋារចនាសម្ព័ន្ធនេះ លោកក៏បានជំរុញដល់ប្រជាពលរដ្ឋទាំងអស់ត្រូវចាំថា «ការចូលរួមគោរពច្បាប់ចរាចរណ៍របស់បងប្អូននៅថ្ងៃនេះ គឺជាការការពារអាយុជីវិតខ្លួនឯង និងអ្នកដទៃឲ្យជៀសផុតពីគ្រោះថ្នាក់»៕