(រតនគិរី)៖ នៅរសៀលថ្ងៃទី២៧ ខែមីនា ឆ្នាំ២០២៦ សាខាបេឡាជាតិសន្តិសុខសង្គម (ប.ស.ស) ខេត្តរតនគិរី បានបើកសិក្ខាសាលាស្តីពីគោលការណ៍ បទបញ្ញាតិច្បាប់ និងអត្ថប្រយោជន៍របបសន្តិសុខសង្គម ជូនម្ចាស់សហគ្រាស គ្រឹះស្ថានក្នុងខេត្ត។

សិក្ខាសាលានេះ បានរៀបចំធ្វើឡើងនាសាលប្រជុំសាខាបេឡាជាតិសន្តិសុខសង្គម (ប.ស.ស)ខេត្ត ក្រោមអធិបតីភាព លោក ថោង សំអាត ប្រធានសាខាបេឡាជាតិសន្តិសុខសង្គម (ប.ស.ស) ខេត្តរតនគិរី តំណាងលោក ម៉េង ហុង ប្រតិភូរាជរដ្ឋាភិបាលទទួលបន្ទុក ជាអគ្គនាយក ប.ស.ស នៃក្រសួងការងារ និងបណ្ដុះបណ្ដាលវិជ្ជាជីវៈ និងមានការចូលរួមពី តំណាងម្ចាស់ក្រុមហ៊ុន រោងចក្រ សហគ្រាស ក្នុងខេត្ត សរុប១៥០រូប។

ថ្លែងក្នុងឱកាសនេះលោក ថោង សំអាត បានលើកឡើងថា សិក្ខាសាលានេះរៀបចំឡើងក្នុងគោលបំណងដើម្បីបង្កើនការ យល់ដឹងទៅលើការអនុវត្តច្បាប់ស្តីពីរបបសន្តិសុខសង្គមជូនទៅ លោក លោកស្រី ដែលម្ចាស់សហគ្រាសគ្រឹះស្ថាន ភោជនីយដ្ឋាន អាហារដ្ឋាន និងក្រុមបុគ្គល ដែលមានប្រើប្រាស់កម្មករនិយោជិតចាប់ពី ១នាក់ឡើងទៅ។

លើសពីនេះទៅទៀត សាខា ប.ស.ស. ខេត្តរតនគិរី ក៏មានបំណងឱ្យ លោក លោកស្រី បានយល់ដឹងពីអត្ថប្រយោជន៍ជាច្រើនដែល ប.ស.ស. បានផ្តល់ជូនកម្មករនិយោជិតផងដែរ។លោក ថោង សំអាត បានអំពាវនាវទៅដល់ថៅកែ ឬម្ចាស់សហគ្រាស គ្រឹះស្ថានទាំងអស់ ជាពិសេសបងប្អូនកម្មករនិយោជិត ត្រូវយកចិត្តទុកដាក់ក្នុងការអនុវត្តកាតព្វកិច្ច របស់ខ្លួន ដើម្បីទទួលបានអត្ថប្រយោជន៍របបសន្តិសុខសង្គម និងរួមចំណែកក្នុងការអនុវត្តគោលនយោបាយរបស់រាជរដ្ឋាភិបាលឆ្ពោះទៅការគ្របដណ្ដប់សុខភាពជាសកល។

សូមបញ្ជាក់ជូនថា ក្នុងអង្គសិក្ខាសាលានេះ មន្រ្តីជំនាញ ប.ស.ស បានធ្វើបទបង្ហាញចែករំលែកចំណេះដឹងស្តីពីការអនុវត្តរបបសន្តិសុខសង្គម ជាពិសេសសិទ្ធិក្នុងការទទួលបានអត្ថប្រយោជន៍របបសន្តិសុខសង្គមរួមមាន ផ្នែកហានិភ័យការងារ ផ្នែកថែទាំសុខភាព ផ្នែកប្រាក់សោធន ព្រមទាំងអត្ថប្រយោជន៍ផ្សេងៗ ស្របទៅតាមការកំណត់ ដូចមានចែងក្នុងបទប្បញ្ញត្តិ នៃច្បាប់ស្ដីពីរបបសន្តិសុខសង្គម ជូនទៅដល់អ្នកចូលរួមទាំងអស់៕