(ភ្នំពេញ)៖ លោក ម៉ម ប៊ុននាង ប្រធានគណៈកម្មការ គណៈកម្មការអង្កេត បោសសម្អាត និងប្រឆាំងអំពើពុករលួយនៃព្រឹទ្ធសភា (គណៈកម្មការទី១០) បានអនុញ្ញាតឱ្យ លោក ឈន ឈុនឡេង ជំនួយការសម្តេចតេជោ ហ៊ុន សែន ប្រធានព្រឹទ្ធសភា ព្រមទាំងជាស្ថាបនិក និងជានាយកវិទ្យាស្ថានបញ្ញាឌីជីថលកម្ពុជា និងគណៈប្រតិភូ ចូលជួបសម្តែងការគួរសម និងពិភាក្សាការងារ នៅសាលប្រជុំពិសេស៣ វិមានព្រឹទ្ធសភា។

ជំនួបដ៏មានសារ-សំខាន់នេះ ប្រព្រឹត្តទៅដោយមានការអញ្ជើញចូលរួមពីលោក ម៉ាន់ ឈឿន តំណាងគណៈកម្មការទី៧ ព្រឹទ្ធសភា លោក សុខ សំណាង ជំនួយការសម្តេចតេជោ ហ៊ុន សែន ប្រធានព្រឹទ្ធសភា ព្រមទាំងមន្ត្រីជំនាញនៃអគ្គលេខាធិការដ្ឋានព្រឹទ្ធសភាជាច្រើនរូបទៀត។

ក្នុងជំនួបនោះ ប្រធានគណៈកម្មការទី១០ព្រឹទ្ធសភា បានស្វាគមន៍យ៉ាងកក់ក្តៅចំពោះ លោក ឈន ឈុនឡេង និងគណៈប្រតិភូ និងបានចាត់ទុកជំនួបពិភាក្សាការងារនាពេលនេះ គឺជាការចាប់ផ្តើមនៃភាពជាដៃគូដ៏ល្អ ក្នុងការចូលរួមលើកកម្ពស់សមត្ថភាព គុណភាព ប្រសិទ្ធភាព ជីវភាពរបស់ប្រជាជនកម្ពុជា ជាពិសេសយុវជនឱ្យកាន់តែប្រសើរឡើង តាមរយៈការបង្រៀនតាមបែបឌីជីថល។

ជាមួយគ្នានោះ លោក ឈន ឈុនឡេង បានថ្លែងអំណរគុណដល់គណៈកម្មការទី១០ ព្រឹទ្ធសភា ជាពិសេស លោក ម៉ម ប៊ុននាង ដែលបានឆ្លៀតពេលដ៏មមាញឹកទទួលជួបពិភាក្សាការងារជាមួយគណៈប្រតិភូវិទ្យាស្ថានបញ្ញាឌីជីថលកម្ពុជានាពេលនេះ។

ក្នុងឱកាសនោះ លោកនាយកវិទ្យាស្ថាន បានធ្វើបទបង្ហាញអំពីដំណើរការប្រព្រឹត្តទៅរបស់ក្រុមហ៊ុន E-School Cambodia និងវិទ្យាស្ថានបញ្ញាឌីជីថលកម្ពុជាថា E-School Cambodia គឺជាកម្មវិធីសិក្សាតាមប្រព័ន្ធឌីជីថល ដែលឈានមុខគេក្នុងប្រទេសកម្ពុជា បានបង្កើតឡើងនៅឆ្នាំ២០១៧ មកទល់នឹងពេលនេះ មានអ្នកប្រើប្រាស់ប្រមាណជាង មួយលាននាក់។ E-School Cambodia មានបង្រៀនពីថ្នាក់ មត្តេយ្យដល់ថ្នាក់ទី១២ ថ្នាក់ត្រៀមប្រឡងសិស្សពូកែ ឬមហាវិទ្យាល័យ ថ្នាក់ភាសាបរទេស ដោយគ្រូជំនាញច្បាស់លាស់ ធានាបានគុណភាពអប់រំតាមស្តង់ដាកំរិតខ្ពស់។

លោកបន្តថា ភាគជោគជ័យរបស់ E-School Cambodia និងដោយមានការគាំទ្រពីបណ្តាក្រសួង ស្ថាប័នពាក់ព័ន្ធ គណៈគ្រប់គ្រងសាលាបានបង្កើតឱ្យមានថ្នាក់សិក្សាកម្រិតឧត្តម ដែលមានឈ្មោះថា វិទ្យាស្ថានបញ្ញាឌីជីថលកម្ពុជា។ វិទ្យាស្ថានបញ្ញាឌីជីថលកម្ពុជា ធ្វើការបណ្តុះបណ្តាលជំនាញបច្ចេកទេស និងវិជ្ជជីវៈ ចាប់ពីកម្រិតវិញ្ញាបនបត្រវិជ្ជាជីវៈ ដល់កម្រិតសញ្ញាបត្រជាន់ខ្ពស់បច្ចេកទេស លើ១០មុខជំនាញ។ វិទ្យាស្ថាន នឹងផ្តល់ឱកាសការងារដល់និស្សិតក្នុងពេលសិក្សា និងក្រោយពេលបញ្ចប់ការសិក្សា ។ ទន្ទឹមនោះ និស្សិតវិទ្យាស្ថានបញ្ញាឌីជីថលកម្ពុជា អាចបន្តការសិក្សាជាមួយសកលវិទ្យាល័យនៅសហរដ្ឋអាមេរិក និងនៅប្រទេសអូស្ត្រាលី។

វិទ្យាស្ថានបញ្ញាឌីជីថលកម្ពុជា មានទិសដៅជួយបណ្តុះបណ្តាលដល់យុវជននៅតាមមូលដ្ឋាន ឱ្យមានឱកាសទទួលបានការបណ្តុះបណ្តាលជំនាញ មានលទ្ធភាពរកការងារធ្វើ មានចំណូលសមរម្យស្មើមុខនឹងយុវជននៅទីក្រុង ដោយការផ្តល់អាហារូបករណ៍១០០ភាគរយ និងការយកថ្លៃសិក្សាក្នុងកម្រិតទាប តាមរយៈក្រុមប្រឹក្សាឃុំ សង្កាត់។

បន្ថែមពីលើនេះ លោក ម៉ម ប៊ុននាង បានសម្ដែងនូវការពេញចិត្ត និងវាយតម្លៃខ្ពស់ ចំពោះសន្ទុះរីកចម្រើនគួរឱ្យកត់សម្គាល់ ជាពិសេសមិទ្ធផលជាច្រើន របស់ក្រុមហ៊ុន E-School Cambodia និងវិទ្យាស្ថានបញ្ញាឌីជីថលកម្ពុជា ដែលបានរួមចំណែកយ៉ាងសំខាន់ដល់ការលើកកម្ពស់គុណភាពអប់រំនៅកម្ពុជា ឱ្យកាន់តែល្អប្រសើរឡើង តាមរយៈប្រព័ន្ធឌីជីថល ស្របនឹងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា ហើយស្របនឹងតម្រូវរបស់យុវជនដែលមានជីវភាពខ្វះខាត់ ឬនៅតាមមូលដ្ឋានឆ្ងាយៗ។

លោកប្រធានគណៈកម្មការទី១០ ព្រឹទ្ធសភា បានលើកទឹកចិត្ត និងចូលរួមគាំទ្រដល់ វិទ្យាស្ថានបញ្ញាឌីជីថលកម្ពុជា ក្នុងការលើកកម្ពស់វិស័យអប់រំ លើថ្នាលឌីជីថលដល់យុវជនកម្ពុជាឱ្យកាន់តែប្រសើរ និងទូលំទូលាយថែមទៀត៕