(ភ្នំពែញ)៖ អ្នកនាំពាក្យសាលាដំបូងរាជធានីភ្នំពេញ បានចាត់ការលើសំណុំរឿងព្រហ្មទណ្ឌលេខ ១៦៣២ ចុះថ្ងៃទី២១ ខែមីនា ឆ្នាំ២០២៦ ទាក់ទិននឹងករណីគ្រោះថ្នាក់ចរាចរណ៍បង្កឡើងដោយរថយន្ត ១គ្រឿងម៉ាក DONGFENG FORTHING ពណ៌ស ពាក់ផ្លាកលេខកម្ពុជា P.YEAN.7 បានបើកបរក្នុងស្ថានភាពស្រវឹងដែលមានអត្រាជាតិអាកុល ០.៥២Mg/L ក្នុងល្បឿនលឿន មិនគោរពសិទ្ធិអាទិភាពយានខាងស្តាំ បានបុកម៉ូតូមួយគ្រឿងម៉ាក HONDA TODAY ចំផ្នែកចំហៀងខាងឆ្វេង ជាប់នៅខាងមុខក្រោមរថយន្តអូស ទៅមុខប្រវែង៧៨ម៉ែត្រ ទើបឈប់បណ្តាលឱ្យឈ្មោះ ថា ឧត្តម រងរបួសធ្ងន់។

ជនដែលបើកបររថយន្តឈ្មោះ សុខ ច័ន្ទបូណ៍មី ភេទស្រី អាយុ ២២ឆ្នាំ ត្រូវបានចោទប្រកាន់ពីបទបើកបរបង្កគ្រោះថ្នាក់ចរាចរណ៍បណ្តាលឱ្យមានរបួសដល់អ្នកដទៃ (ស្ថិតក្នុងស្ថានភាពស្រវឹងអត្រាជាតិអាល់កុល ០.៥២ mg/L និងបើកគេចខ្លួនពីកន្លែងកើតហេតុ) ប្រព្រឹត្តនៅចំណុចផ្លូវបេតុង ប្រសព្វផ្លូវលេខ១៧១៧ ភូមិក្រោលគោ សង្កាត់គីឡូម៉ែត្រលេខ៦ ខណ្ឌឫស្សីកែវ រាជធានីភ្នំពេញ កាលពីថ្ងៃទី១៨ ខែមីនា ឆ្នាំ២០២៦។

អ្នកនាំពាក្យសាលាដំបូងរាជធានីភ្នំពេញ សូមបញ្ជាក់ជូនផងដែរថា បន្ទាប់ពីបានសួរចម្លើយជនត្រូវចោទ និងពិនិត្យភស្តុតាង ចៅក្រមស៊ើបសួរបានសម្រេចឃុំខ្លួនបណ្តោះអាសន្នជនត្រូវចោទឈ្មោះ សុខ ច័ន្ទបូណ៍មី ដើម្បីបន្តការស៊ើបសួរ និងពុំមានការសម្រេចដោះលែងជនត្រូវចោទរូបនេះឱ្យនៅក្រៅឃុំ នោះទេ ហើយតុលាការនឹងបន្តនីតិវិធីអនុវត្តច្បាប់ឱ្យបានត្រឹមត្រូវ ម៉ឹងម៉ាត់ និងផ្តល់យុត្តិធម៌ដល់ជនរងគ្រោះ៕