(ភ្នំពេញ)៖ វិទ្យាស្ថានតស៊ូមតិ និងគោលនយោបាយ (API) បានរៀបចំនូវព្រឹត្តិការណ៍សម្ពោធយុទ្ឋសាស្រ្តនិងគម្រោង ឆ្នាំ២០២៦ លើប្រធានបទការតភ្ជាប់ភាពជាដៃគូ និងនវានុវត្តន៍ ដើម្បីការអភិវឌ្ឍក្នុងមូលដ្ឋាន ដោយជោគជ័យ នៅរសៀលថ្ងៃទី៣០ ខែមីនា ឆ្នាំ២០២៦ នៅសណ្ឋាគារ Novotel Phnom Penh BKK1 ដោយមានការចូលរួមពីភាគីពាក់ព័ន្ធសំខាន់ៗប្រមាណ ១០០នាក់។

ព្រឹត្តិការណ៍នេះបានប្រមូលផ្តុំតំណាងមកពីស្ថានទូត ដៃគូអភិវឌ្ឍន៍ អង្គការសង្គមស៊ីវិល ក្រុមហ៊ុនឯកជន និងសមាគមធុរកិច្ច បណ្តាញ និងអតីតសិក្ខាកាម Change the Game Academy ព្រមទាំងថ្នាក់ដឹកនាំសាកលវិទ្យាល័យជាច្រើន។ ព្រឹត្តិការណ៍នេះ ជាវេទិកាសម្រាប់ការតភ្ជាប់ ការផ្លាស់ប្តូរយោបល់ និងការកសាងភាពជាដៃគូ និង អភិវឌ្ឍន៍ លើវិស័យសំខាន់ៗជាច្រើននៅកម្ពុជា។

កម្មវិធីត្រូវបានបើកដោយមតិស្វាគមន៍ពី លោក សឿង ច័ន្ទតារា ប្រធានក្រុមប្រឹក្សាភិបាលអង្គការ API បន្ទាប់មកមានការចែករំលែកចំណុចសំខាន់ៗនៃកម្មវិធីដោយ លោក ស៊ូ សុខគង់ ប្រធានកម្មវិធីនៃអង្គការ WaterAid Cambodia ព្រមទាំងការបង្ហាញអំពីគម្រោង IMPACT ដោយ លោក សាន ម៉ុស ប្រធានកម្មវិធីនៃអង្គការ Mission Alliance។

លោក សឿង ច័ន្ទតារា បានលើកឡើងពីគោលដៅសម្រាប់រយៈពេល ពីឆ្នាំ២០២៦ ដល់ឆ្នាំ២០២៨ ដែល API បានកំណត់ថា «នៅឆ្នាំ២០២៨, កម្ពុជាជាសង្គមកាន់តែមានសុខដុមនីយកម្ម និងបរិយាបន្ន ជាមួយនឹងការអភិវឌ្ឍប្រកបដោយចីរភាព តាមរយៈការផ្តល់សិទ្ធិអំណាចសេដ្ឋកិច្ច ការគ្រប់គ្រងហានិភ័យអាកាសធាតុបានល្អប្រសើរ គោលនយោបាយប្រកបដោយបរិយាបន្ន អភិបាលកិច្ចល្អ និងការគោរពគោលការណ៍ប្រជាធិបតេយ្យ សិទ្ធិមនុស្ស និងសមភាពយេនឌ័រ ពិការភាព និងបរិយាបន្នសង្គម (GEDSI)។ ក្រុមប្រឹក្សាភិបាលរបស់ API ក៏បានអំពាវនាវឱ្យមានការគាំទ្រជាបន្ត និងភាពជាដៃគូជាមួយ API និងជាមួយប្រឹក្សាយោបល់អភិវឌ្ឍន៍ API ដើម្បីធានាថាកម្ពុជាសម្រេចបាននូវចក្ខុវិស័យនេះនៃសង្គមដែលកាន់តែមានសុខដុមរមនា និងរួមបញ្ចូលជាមួយនឹងការអភិវឌ្ឍន៍ប្រកបដោយចីរភាព»។

លោកបានបន្តថា «នៅពេលដែលយើងឈានទៅដល់ឆ្នាំ២០២៦-២៨ ការផ្តោតលើការរក្សាស្ថិរភាព និងការពង្រឹងការងារស្នូលរបស់យើងក្នុងផែនការយុទ្ធសាស្ត្រថ្មីរបស់យើង ដោយភាពប្រាកដនិយមនិងគណនេយ្យភាព តាមរយៈការប្រកាសដាក់ឱ្យប្រើប្រាស់ជាផ្លូវការនូវ ផែនការយុទ្ធសាស្ត្រ API 2025–2028 ដែលឆ្លុះបញ្ចាំងនិងមានការចូលរួមពីបុគ្គលិក ដៃគូ តំណាងរាជរដ្ឋាភិបាល សហគមន៍ និងភាគីពាក់ព័ន្ធនៅមូលដ្ឋាន។ API ក៏បានសម្ពោធ API Development Consulting ជាផ្លូវការផងដែរ ដែលគម្រោងនេះជាសហគ្រាសសង្គម សម្រាប់ផ្តល់សេវាប្រឹក្សា ការបណ្តុះបណ្តាល និងការគាំទ្រវិជ្ជាជីវៈផ្សេងៗ»។

លើសពីនេះ ព្រឹត្តិការណ៍នេះបានដើរតួនាទីជាវេទិកាយុទ្ធសាស្ត្រសម្រាប់ API ក្នុងការបង្ហាញគម្រោង សេវាកម្ម និងនវានុវត្តន៍ឌីជីថលជាច្រើន ដែលបើកជាឱកាសសម្រាប់កិច្ចសហការ។ ដែលរួមមាន Change the Game Academy, Pidor Facebook Chatbot, GenSEA Climate Academy, Citizen Budget App, Online M&E System និង រកស៊ីឆាតបុតរួមជាមួយគំនិតផ្តួចផ្តើមដែលទទួលបានការគាំទ្រពីដៃគូក្នុងវិស័យទឹកស្អាត និង អនាម័យ(WASH) ការចូលរួមរបស់ប្រជាពលរដ្ឋ ការប្រែប្រួលអាកាសធាតុ ការតាមដាន និងវាយតម្លៃ និងការគាំទ្រអាជីវកម្មក្រៅប្រព័ន្ធ។ ការបង្ហាញទាំងនេះ បានបង្ហាញពីវិធីសាស្ត្រផ្សេងៗដែលភាគីពាក់ព័ន្ធអាចធ្វើការជាមួយ API តាមរយៈការអនុវត្តកម្មវិធីរួម កិច្ចសហប្រតិបត្តិការបច្ចេកទេស ការស្រាវជ្រាវ ការបណ្តុះបណ្តាល នវានុវត្តន៍ ការប្រើប្រាស់សេវាកម្ម និងភាពជាដៃគូអាជីវកម្ម។

ព្រឹត្តិការណ៍នេះ បានបញ្ជាក់ឡើងវិញពីការប្តេជ្ញាចិត្តរបស់ API ក្នុងការធ្វើការជាមួយដៃគូ ដើម្បីជំរុញការអភិវឌ្ឍប្រកបដោយបរិយាបន្ន ពង្រឹងការចូលរួមរបស់ប្រជាពលរដ្ឋ និងបង្កើតដំណោះស្រាយជាក់ស្តែងឆ្លើយតបទៅនឹងតម្រូវការដែលកំពុងវិវត្តរបស់កម្ពុជា។ វាក៏បានបង្កើតឱកាសសម្រាប់កិច្ចសន្ទនាថ្មីៗ និងកិច្ចសហការនាពេលអនាគតក្នុងចំណោមភាគីពាក់ព័ន្ធពីវិស័យអភិវឌ្ឍន៍ វិស័យអប់រំ អង្គការសង្គមស៊ីវិល និងវិស័យឯកជនផងដែរ។

ព្រឹត្តិការណ៍នេះត្រូវបានរៀបចំឡើងដោយ វិទ្យាស្ថានតស៊ូមតិ និងគោលនយោបាយ (API) និង API Development Consulting ដោយមានការគាំទ្រពីសហភាពអឺរ៉ុប, Oxfam, Sida, WaterAid, Mission Alliance, Wilde Ganzen និង Change the Game Academy។ ខណៈដែល API បន្តឆ្ពោះទៅមុខតាមទិសដៅយុទ្ធសាស្ត្រថ្មីរបស់ខ្លួន អង្គការនេះទន្ទឹងរង់ចាំការពង្រឹងភាពជាដៃគូ និងការពង្រីកកិច្ចសហការ ដើម្បីការអភិវឌ្ឍនៅទូទាំងប្រទេសកម្ពុជា។

លោក សឿង ច័ន្ទតារា បានអរគុណចំពោះភាពជាដៃគូ ការជឿទុកចិត្ត និងការជឿជាក់របស់អ្នកលើតម្លៃនៃសង្គមស៊ីវិលដ៏រឹងមាំ៕