(សៀមរាប)៖ អាជ្ញាធរជាតិអប្សរា នៅថ្ងៃទី៣១ ខែមីនា ឆ្នាំ២០២៦នេះ បានចេញសេចក្តីជូនដំណឹង ស្តីពីការដាក់ឱ្យប្រើប្រាស់ផ្លូវចំនួនពីរខ្សែ ក្នុងតំបន់រមណីយដ្ឋានអង្គរ ចាប់ពីថ្ងៃទី១ ខែមេសា ឆ្នាំ២០២៦ តទៅ។

បើតាមសេចក្តីជូនដំណឹង, ដើម្បីសម្រួលការធ្វើចរាចរណ៍នៅបរិវេណមុខប្រាសាទ និងបង្កើនសុវត្ថិភាពជូនភ្ញៀវទេសចរជាតិ-អន្តរជាតិ និងសាធារណជន ក៏ដូចជាចូលរួមចំណែក ឱ្យបទពិសោធន៍ការទស្សនា ក្នុងរមណីយដ្ឋានអង្គរ កាន់តែល្អប្រសើរមួយកម្រិតទៀត អាជ្ញាធរជាតិអប្សរា នឹងដាក់ឱ្យប្រើប្រាស់ផ្លូវចំនួន២ខ្សែ ចាប់ពីថ្ងៃទី១ ខែមេសា ឆ្នាំ២០២៦ តទៅ៖

១៖ ផ្លូវបេតុងពីខាងមុខខ្លោងទ្វារដីឆ្នាំង ទៅជ្រុងខាងជើងឆៀងខាងលិចនៃប្រាសាទព្រះខ័ន ប្រវែង ២,១៨០ ម៉ែត្រ ស្ថិតនៅភូមិនគរក្រៅ សង្កាត់គោកចក ក្រុងសៀមរាប
២៖ ផ្លូវបេតុងពីស្ពានក្រាំងក្រូចទៅភូមិថ្នល់បណ្តោយប្រវែង ៨៣០ ម៉ែត្រ ស្ថិតនៅថ្នល់បណ្តោយ ឃុំព្រះដាក់ ស្រុកបន្ទាយស្រី

សេចក្តីដូចបានជម្រាបជូនខាងលើ សូមក្រសួង ស្ថាប័នជាតិ-អន្តរជាតិ អាជ្ញាធរដែនដី មន្ទីរ-អង្គភាព សមាគមទីភ្នាក់ងារទេសចរណ៍ សមាគមមគ្គុទ្ទេសក៍ទេសចរណ៍ សមាគមដឹកជញ្ជូនភ្ញៀវទេសចរ ក្រុមហ៊ុន ទេសចរណ៍ ភ្ញៀវទេសចរជាតិ-អន្តរជាតិ និងសាធារណជនទាំងអស់មេត្តាជ្រាបជាព័ត៌មាន៕