(ភ្នំពេញ)៖ ប្រធានធនាគារវិនិយោគហេដ្ឋារចនាសម្ព័ន្ធអាស៊ី (AIIB) លោកស្រី Zou Jiayi ប្រកាសប្តេជ្ញាបន្តគាំទ្រគម្រោងអភិវឌ្ឍន៍នានារបស់កម្ពុជា។

ការប្រកាសនេះ បានធ្វើឡើងក្នុងពេលលោកស្រី អញ្ជើញជួបសម្តែងការគួរសម និង​ពិភាក្សាការងារជាមួយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា នា​ព្រឹក​ថ្ងៃទី១ ខែមេសា ឆ្នាំ២០២៦នេះ។

ក្នុងឱកាសនៃជំនួបនោះ លោកស្រីប្រធានធនាគារ AIIB បានកោតសរសើរសមិទ្ធផល និងការរីកចម្រើនយ៉ាងរហ័សនៅកម្ពុជា និងបានវាយតម្លៃខ្ពស់ចំពោះការដាក់​ចេញនូវ​គោល​ដៅអភិវឌ្ឍន៍ជាតិរយៈពេលវែងរបស់រាជរដ្ឋាភិបាល។ លោកស្រី បានថ្លែង​អំណរ​គុណដល់រាជរដ្ឋាភិបាលកម្ពុជា ក៏ដូចជាក្រសួង-ស្ថាប័នពាក់ព័ន្ធ ដែលតែងតែ​ផ្តល់ទំនុក​ចិត្ត និងគាំទ្រដល់ធនាគារ AIIB នាពេលកន្លងមក។

លោកស្រី បានគោរពជម្រាបជូនសម្តេចមហាបវរធិបតី អំពីគោលនយោបាយអាទិភាព ៤ របស់ធនាគារ ដែលរួមមាន៖ ការប្រែប្រួលអាកាសធាតុ និងថាមពលស្អាត, ការតភ្ជាប់​ហេដ្ឋារចនាសម្ព័ន្ធក្នុងតំបន់ និងឆ្លងប្រទេស, ការអភិវឌ្ឍហេដ្ឋារចនា​សម្ព័ន្ធគាំទ្រ​បច្ចេក​វិទ្យា និងការអភិវឌ្ឍវិស័យឯកជន។

លោកស្រី បានសង្កត់ធ្ងន់ថា គោលនយោបាយអាទិភាពទាំងនេះ មានសង្គតិភាពទៅ​នឹង​​ចក្ខុវិស័យអភិវឌ្ឍន៍របស់កម្ពុជា។ លោកស្រី ក៏បានបញ្ជាក់ដែរថា កម្ពុជា គឺជាដៃគូ​យុទ្ធសាស្ត្រដ៏សំខាន់បំផុតមួយ និងប្ដេជ្ញាបន្តពង្រឹងកិច្ចសហប្រតិបត្តិការ និងគាំទ្រដល់​គម្រោងអភិវឌ្ឍន៍នានានៅកម្ពុជា ឱ្យកាន់តែរីកចម្រើនថែមទៀត។

សម្ដេចមហាបវរធិបតី ហ៊ុន ម៉ាណែត បានសម្តែងការស្វាគមន៍ និងអបអរសាទរយ៉ាង​កក់ក្តៅចំពោះលោកស្រី ដែលត្រូវបានតែងតាំងជាប្រធានធនាគារ AIIB។ សម្តេចមហា​បវរ​ធិបតី មានជំនឿយ៉ាងមុតមាំថា ក្រោមការដឹកនាំរបស់លោកស្រី កិច្ចសហប្រតិបត្តិ​ការ​រវាងកម្ពុជា និងធនាគារ AIIB នឹងកាន់តែរឹងមាំ និងមានផ្លែផ្កាបន្ថែមទៀត។

សម្តេចប្រមុខរាជរដ្ឋាភិបាល បានគូសបញ្ជាក់ថា គោលនយោបាយអាទិភាពទាំង៤ របស់​ធនាគារ AIIB ឆ្លើយតបទៅនឹងយុទ្ធសាស្ត្រអភិវឌ្ឍន៍ និងវិស័យអាទិភាព​របស់​កម្ពុជា។ សម្ដេចមហាបវរធិបតី បានបន្ថែមទៀតថា ចំពោះការអភិវឌ្ឍថាមពលស្អាត រាជ​រដ្ឋាភិបាលកម្ពុជា បានដាក់គោលដៅជំរុញការប្រើប្រាស់ថាមពលកកើតឡើងវិញ ឱ្យ​បាន៧០ភាគរយ នៅឆ្នាំ២០៣០ និងបានដាក់ចេញនូវគោលនយោបាយលើកទឹកចិត្ត​ឱ្យ​ប្រើប្រាស់រថយន្តអគ្គិសនី (EV) ដើម្បីរួមចំណែកឈានទៅសម្រេចបាននូវគោលដៅ អព្យាក្រឹតកាបូននាពេលអនាគត។ ជាមួយគ្នានេះ សម្ដេចមហាបវរ​ធិបតី​ ក៏បាន​គូស​បញ្ជាក់ពីការកែសម្រួលវិធានការចាំបាច់មួយចំនួន ក្នុងវិស័យឡូជីស្ទិក និងថាមពល ដើម្បីពង្រឹងសមត្ថភាពប្រកួតប្រជែងរបស់កម្ពុជាក្នុងតំបន់ និងសកលលោក។

សម្ដេចមហាបវរធិបតី បានលើកទឹកចិត្តឱ្យធនាគារ AIIB បន្តពិភាក្សា និងផ្សារភ្ជាប់​ទំនាក់​ទំនងឱ្យកាន់តែជិតស្និទ្ធជាមួយក្រសួង-ស្ថាប័នពាក់ព័ន្ធ ជាពិសេសក្រសួង​សេដ្ឋ​កិច្ច និងហិរញ្ញវត្ថុ ដើម្បីជំរុញការអនុវត្តគម្រោងសហប្រតិបត្តិការជាក់ស្ដែងឱ្យ​សម្រេច​បាន​នូវលទ្ធផលជាអតិបរមាសម្រាប់ប្រជាជនកម្ពុជា៕