(កំពង់ស្ពឺ)៖ ដោយមើលឃើញពីការលំបាករបស់ប្រជាពលរដ្ឋ ដែលកំពុងតែខ្វះខាត ដោយរងផលប៉ះពាល់វិបត្តិសង្គ្រាមឈ្លានពាន, លោកបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ និងភរិយា នៅព្រឹកថ្ងៃពុធ ទី០១ ខែមេសា ឆ្នាំ២០២៦នេះ បានចុះសាកសួរសុខទុក្ខ និងចែកអំណោយមនុស្សធម៌ជូនដល់ប្រជាពលរដ្ឋក្រក្រីចំនួន ៦គ្រួសារ និងគ្រួសារសពដែលរស់នៅក្នុងភូមិព្រៃសាឡែង ឃុំទួលអំពិល ស្រុកបសេដ្ឋ ខេត្តកំពង់ស្ពឺ។

លោកបណ្ឌិត ជាម ច័ន្ទសោភ័ណ បានពាំនាំមកនូវការផ្តាំផ្ញើសួរសុខទុក្ខពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនចំពោះគ្រួសារក្រីក្រ និងគ្រួសារងាយរងគ្រោះទាំងអស់ដោយក្តីនឹករឭក។

លោកបណ្ឌិត បានថ្លែងថា កាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន សម្ដេចទាំងទ្វេរតែងតែយកចិត្តទុកដាក់យ៉ាងខ្លាំងចំពោះប្រជាពលរដ្ឋងាយរងគ្រោះ ទោះបីស្ថិតនៅស្ថានភាព បែបណាក៏ដោយ គឺតែងបានផ្តល់ភាពកក់ក្តៅដល់បងប្អូនជានិច្ចក្នុងគ្រាលំបាកនានា ពោលគឺទីណាមានការលំបាក ទីនោះមានកាកក្រហមកម្ពុជា ហើយការជួយគឺធ្វើឡើងដោយមិនប្រកាន់បក្សពួក និន្នាការនយោបាយ និងសាសនាអ្វីឡើយ។

លោកអភិបាលខេត្ត បានបន្តថាអំណោយដែលបានចែកជូនប្រជាពលរដ្ឋក្រីក្រ និងងាយរងគ្រោះ ក្នុងនោះមានគ្រួសារចាស់ជរា គ្មានទីពឹង គ្រួសារសពរងគ្រោះ គ្រួសារកុមារកំព្រា គ្រួសារស្ត្រីមេម៉ាយកូនច្រើន គ្រួសារអ្នកជំងឺរ៉ាំរ៉ៃ និងគ្រួសារដែលក្រីក្រ បំផុតជាដើម។

សូមបញ្ជាក់ថា ប្រជាពលរដ្ឋក្រីក្រ និងងាយរងគ្រោះដែលបានទទួលអំណោយអង្ករ ១០០គីឡូក្រាម, មី ៤កេស, ទឹកត្រី ទឹកសុី អុីវ៤យួរ, ប្រេងឆា៤ដប និងថវិកា ១លានរៀល។

នាឱកាសនោះដែរ លោកបណ្ឌិត និងភរិយាបានអញ្ជើញចុះសួរសុខទុក្ខគ្រួសារសព ចូលរួមជាថវិកាផ្ទាល់ខ្លួន១៥លានរៀល បន្តដំណើរចុះសួរសុខទុក្ខគ្រួសារមានកូនភ្លោះ ៣នាក់ ដែលរស់នៅក្នុងឃុំរលាំងគ្រើល ស្រុកសំរោងទង ខេត្តកំពង់ស្ពឺ បានទទួលអំណោយជាអង្ករ ១០០គីឡូក្រាម ទឹកត្រី អុីវ៤យួរ, ប្រេងឆា ៤ដប និងថវិកា ១លានរៀលបន្ថែម៕