មន្ត្រីជំនាញ ក.ប.ប ខេត្តកោះកុង ត្រួតពិនិត្យគុណភាពសុវត្ថិភាពទំនិញ និងការដាក់លក់នៅតាមលំនៅដ្ឋាន ក្នុងក្រុងខេមរភូមិន្ទ
02-04-2026 14:07
(កោះកុង)៖ លោក ជា នី អនុប្រធានសាខា នៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) ខេត្តកោះកុង សហការជាមួយមន្ទីរពាណិជ្ជកម្មខេត្ត នៅថ្ងៃទី២ ខែមេសា ឆ្នាំ២០២៦នេះ ចុះត្រួតពិនិត្យគុណភាព សុវត្ថិភាពទំនិញដែលអាជីវករដាក់តាំងលក់ដូរនៅតាមលំនៅដ្ឋាន និងទីតាំងចែកចាយមួយចំនួន នៅក្នុងក្រុងខេមរភូមិន្ទ ខេត្តកោះកុង មុនបុណ្យចូលឆ្នាំប្រពៃណីខ្មែរ ដែលជិតឈានចូលមកដល់។
លោក ជា នី បានឲ្យដឹងថា ការចុះពិនិត្យសុវត្ថិភាពទំនិញនៅតាមលំនៅឋាន និងម្ហូបអាហារនៅក្នុងក្រុងខេមរភូមិន្ទ គឺមន្ត្រីជំនាញបានពិនិត្យដើម្បីស្វែងរកសារធាតុហាមឃាត់ Formalin ពុំបានរកឃើញទំនិញហួសកាលបរិច្ឆេទឡើយនៅក្នុងមុខទំនិញចំណីអាហារ និងពិនិត្យមើលថ្ងៃខែឆ្នាំផលិតរបស់ក្រុមហ៊ុនទំនិញគ្រប់មុខ មុនធ្វើការចែកចាយក និងលក់ដូរឲ្យអ្នកដែលទិញយកទៅប្រើប្រាស់ និងបរិភោគ និងធ្វើការចែកចាយក្នុងនៅតាមទីផ្សារ។
លោកបានបញ្ជាក់ថា ក្រោយពីមានការចុះត្រួតពិនិត្យទំនិញគ្រប់មុខនៅតាមលំនៅដ្ឋាន និងទីតាំងចែកចាយរបស់អាជីវករសមត្ថកិច្ចជំនាញមន្ត្រី ក.ប.ប ខេត្ត មិនបានរកឃើញមុខទំនិញណាមួយ ហួសកាលបរិច្ឆេទថ្ងៃខែឆ្នាំផលិតឡើយ។ ម៉្យាងទំនិញទាំងនោះ គឺជាសម្ធិផលរបស់ខ្មែរភាគច្រើន និងផលិតផលមកពីប្រទេសចិន។ ក្នុងពេលនោះ លោករួមទាំងមន្ត្រីបានធ្វើការផ្សព្វផ្សាយយ៉ាងទូលំទូលាយ សូមឲ្យអាជីវករ និងអ្នកនាំទំនិញមកធ្វើការចែកចាយ ត្រូវត្រួតពិនិត្យមើលថ្ងៃខែឆ្នាំផលិតឲ្យបានត្រឹមត្រូវ មុននឹងធ្វើការចែកចាយ ឬលក់ដូរ ដើម្បីសុវត្ថិភាពសុខភាពរបស់ប្រជាពលរដ្ឋ។
អាជីវករលក់ដូរនៅតាមលំនៅដ្ឋាន បានអះអាងថា ពួកគាត់លក់តែទំនិញដែលមានគុណភាពខ្ពស់ និងត្រួតពិនិត្យមើលថ្ងៃខែឆ្នាំផលិត យ៉ាងយកចិត្តទុកដាក់ ជាពិសេសនោះទំនិញរបស់ពួកគាត់ សុទ្ធតែជាទំនិញផលិតនៅក្នុងស្រុក មិនបានយកទំនិញពីប្រទេសថៃចូលឡើយ។ ទំនិញថៃយកមកលក់ក៏ប្រជាពលរដ្ឋខ្មែរធ្វើពហិកាមិនទិញដែរមិនថាក្មេង ឬចាស់ឡើយ។ មុននឹងទិញពួកគាត់បានពិនិត្យមើលយ៉ាងយកចិត្តទុកដាក់ និងមានទំនុកចិត្តខ្ពស់ទើប អាចទិញយកទៅប្រើប្រាស់ ឬហូបនៅក្នុងលក្ខណៈគ្រួសារ ហើយពួកគាត់ ក៏បានប្តេជ្ញាធ្វើពហិកាមិនទិញទំនិញផលិតនៅប្រទេសថៃ យកមកលក់ដូរដែរ៕
