(ភ្នំពេញ)៖ កុមារដ្ឋាននៃក្រសួងពាណិជ្ជកម្ម ត្រូវបានរដ្ឋមន្រ្តីក្រសួងពាណិជ្ជកម្ម លោកស្រី​ ចម និម្មល និង រដ្ឋមន្ត្រីក្រសួងកិច្ចការនារី លោកស្រីកិត្តិបណ្ឌិត អ៊ឹង កន្ថាផាវី ​​បើកសម្ពោធដាក់ឱ្យប្រើប្រាស់ នៅថ្ងៃទី២​ ខែ​មេសា ឆ្នាំ២០២៦ ​ដើម្បីផ្តល់ជាសេវាកម្មថែទាំកុមារ ប្រកបដោយសុវត្ថិភាព ការថែរក្សាអនាម័យ​ សម្រាប់កូនៗរបស់ថ្នាក់ដឹកនាំ និងមន្រ្តីរាជការ-មន្រ្តីកិច្ចសន្យា ដែលកំពុងបម្រើការងារនៅក្រសួងពាណិជ្ជកម្ម។

​ពិធីនេះមានការ​ចូលរួមពី ​រដ្ឋលេខាធិការ-អនុរដ្ឋលេខាធិការក្រសួងពាណិជ្ជកម្ម ក្រសួងកិច្ចការនារី លោក លោកស្រី ថ្នាក់ដឹងនាំ និងមន្រ្តីរាជការនៃក្រសួងពាណិជ្ជកម្ម ជាច្រើនរូបផងដែរ។

ការបង្កើត កុមារដ្ឋាន នេះ គឺជាជំហានថ្មីមួយសំខាន់របស់ក្រសួងពាណិជ្ជកម្ម ក្នុងការអនុវត្តគោលនយោបាយរបស់រាជរដ្ឋាភិបាល ស្របតាមយុទ្ធសាស្ត្របញ្ចកោណ ដើម្បីលើកកម្ពស់សមភាពយេនឌ័រ ការពង្រឹងសុខុមាលភាពគ្រួសារ និងការបង្កើនផលិតភាពការងារ ជាពិសេសសម្រាប់មន្រ្តីរាជការជានារី។

កុមារដ្ឋាន ត្រូវបានរៀបចំឡើង ដើម្បីផ្តល់ជាសេវាកម្មថែទាំកុមារ ប្រកបដោយសុវត្ថិភាព ការថែរក្សាអនាម័យ និងបរិយាកាសអភិវឌ្ឍន៍ល្អ សម្រាប់កូនៗរបស់ថ្នាក់ដឹកនាំ និងមន្រ្តីរាជការ-មន្រ្តីកិច្ចសន្យា ដែលកំពុងបម្រើការងារនៅក្រសួងពាណិជ្ជកម្ម។ ការអនុវត្តនេះ ក៏ជាផ្នែកមួយនៃការកសាងបរិយាកាសការងារដែលគាំទ្រដល់គ្រួសារ និងជួយអោយមន្រ្តីអាចផ្តោតលើការងារបានប្រសើរឡើង។ នៅក្នុងថ្ងៃសម្ពោធនេះដែរ កុមារដ្ឋានបានទទួលកុមារសរុបចំនួន ២៨ នាក់ដែលមានអាយុចន្លោះពី ៣ខែ ដល់ ៦ឆ្នាំ៕