(ភ្នំពេញ)៖ លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី២ ខែមេសា ឆ្នាំ២០២៦ បានមានប្រសាសន៍ថា ការផ្គូរផ្គងធនធានមនុស្សស្របទៅតាមជំនាញ និងសមត្ថភាព ជាមួយរចនាសម្ព័ន្ធថ្មី គឺដើម្បីប្រសិទ្ធភាពការងារខ្ពស់ជាងមុន។

ការថ្លែងរបស់លោក បានធ្វើឡើងក្នុងពិធីប្រកាសចូលកាន់តំណែងមន្ត្រីរាជការនៃក្រសួងកសិកម្ម រុក្ខាប្រមាញ់ និងនេសាទ ដែលបានរៀបចំនៅទីស្ដីការក្រសួង។

បើតាមប្រសាសន៍របស់លោករដ្ឋមន្ត្រី, ការកែទម្រង់រដ្ឋបាលសារធារណៈ គឺជាកិច្ចការអាទិភាពមួយរបស់រាជរដ្ឋាភិបាលក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត។

លោក បានបន្តថា ក្រសួងកសិកម្ម រុក្ខាប្រមាញ់ និងនេសាទ បានធ្វើការវាយតម្លៃមុខងារយ៉ាងលម្អិត និងរៀបចំការកែទម្រង់ ដើម្បីបង្កើនប្រសិទ្ធភាពការផ្ដល់សេវាសាធារណៈជូនពុកម៉ែបងប្អូនប្រជាកសិករ ស្របតាមអភិក្រម «ពង្រឹងជាជាងពង្រីក»។

ក្នុងន័យនេះ រដ្ឋមន្ត្រីក្រសួងកសិកម្ម បានបញ្ជាក់ថា ក្រសួងបានកែសម្រួលរចនាសម្ព័ន្ធថ្មីនិង សម្រួចតួនាទី និងភារកិច្ចនៃអង្គភាពក្រោមឱវាទ ហើយក៏បានធ្វើការប្រមូលផ្ដុំមុខងារស្រាវជ្រាវ ដែលធ្លាប់នៅដាច់ៗគ្នា ឱ្យមកនៅក្រោមដំបូលតែមួយនៃ រាជបណ្ឌិតសភាវិទ្យាសាស្ត្រកសិកម្ម (CASA) ដើម្បីបង្កើនប្រសិទ្ធភាពនៃការស្រាវជ្រាវកសិកម្មជាពិសេសការស្រាវជ្រាវពហុជំនាញ និងប្រសិទ្ធភាពនៃការប្រើប្រាស់ធនធានសាធារណៈ។

ជាមួយគ្នានេះដែរ លោករដ្ឋមន្ត្រី បានថ្លែងថា «ជាជំហានបន្តសម្រាប់ការបង្កើនប្រសិទ្ធភាពនៃកំណែទម្រង់នេះ យើងក៏បាននិងកំពុងសម្របសម្រួលការផ្គូផ្គងធនធានមនុស្សទៅតាមជំនាញ និងសមត្ថភាព ឱ្យស្របជាមួយរចនាសម្ព័ន្ធថ្មីផងដែរ»៕