(ភ្នំពេញ)៖ តុលាការ​ខេត្តបាត់ដំបងសម្រេចឃុំខ្លួន កូនប្រុសស្នងការរងខេត្តបន្ទាយមានជ័យ ដែលបើករថយន្តបង្កគ្រោះថ្នាក់ចរាចរណ៍បុកស្លាប់មនុស្ស ៦នាក់ នៅស្រុកមោងឫស្សី។ នេះបើតាមសេចក្តីប្រកាសព័ត៌មាន របស់អ្នកនាំពាក្យសាលាដំបូងខេត្តបាត់ដំបង នៅយប់ថ្ងៃទី២ ខែមេសា ឆ្នាំ២០២៦នេះ។

តាមរយៈសេចក្តីប្រកាសព័ត៌មាន អ្នកនាំពាក្យសាលាដំបូងខេត្តបាត់ដំបង បានបញ្ជាក់យ៉ាងដូច្នេះថា «បច្ចុប្បន្ននេះជនត្រូវចោទឈ្មោះ ស៊ីវ ជ័យសិដ្ឋ ត្រូវបានឃុំខ្លួនបណ្តោះអាសន្ន តាមដីកាបង្គាប់ឱ្យឃុំខ្លួនលេខ ៥០៧ តព្រ ចុះថ្ងៃទី ២ ខែមេសា ឆ្នាំ ២០២៦ និង ដីកាបង្គាប់ឱ្យឃុំខ្លួន លេខ៥០៨ ត.ព្រ ចុះថ្ងៃទី២ ខែមេសា ឆ្នាំ ២០២៦ នៅពន្ធនាគារខេត្តបាត់ដំបង»។

សូមជម្រាបថា កូនស្នងការរងខេត្តបន្ទាយមានជ័យ ដែលបើកឡានបុកស្លាប់មនុស្ស៦នាក់ នៅបាត់ដំបង ត្រូវបានចោទប្រកាន់ ២សំណុំរឿង ស្មើចំនួន៣បទល្មើស៖
បទល្មើសទី១៖ បើកបរដោយធ្វេសប្រហែស ខ្ជីខ្ជា មិនប្រុងប្រយ័ត្ន បណ្តាលឱ្យស្លាប់ (ច្រើននាក់)
បទល្មើសទី២៖ បើកបរដោយធ្វេសប្រហែស ខ្ជីខ្ជា មិនប្រុងប្រយ័ត្ន បណ្តាលឱ្យរបួសដល់អ្នកដទៃ
បទល្មើសទី៣៖ រត់គេចខ្លួន៕