(ភ្នំពេញ)៖ ក្រសួងទេសចរណ៍ នៅថ្ងៃទី៣ ខែមេសា ឆ្នាំ២០២៦ បានចូលរួមអបអរសាទរឧទ្យានជាតិភ្នំគូលែនកម្ពុជា ជាអច្ឆរិយមួយ ក្នុងចំណោមអច្ឆរិយ៧ក្នុងតំបន់អាស៊ាន។ នេះបើយោងតាមការចេញផ្សាយរបស់ Conde Nast Traveler។

Fresh AI បានឲ្យដឹងថា Conde Nast Traveler គឺជាទស្សនាវដ្ដីធ្វើដំណើរដ៏ល្បីល្បាញមួយ ដែលបោះពុម្ពផ្សាយដោយ Condé Nast។។ ទស្សនាវដ្ដីនេះផ្ដោតសំខាន់លើបទពិសោធន៍ធ្វើដំណើរប្រណីត វប្បធម៌ ម្ហូបអាហារ សណ្ឋាគារ និងគោលដៅទេសចរណ៍ផ្សេងៗជុំវិញពិភពលោក ព្រមទាំងមានការវាយតម្លៃ និងផ្ដល់រង្វាន់ដល់សេវាកម្មទេសចរណ៍ល្អបំផុតផងដែរ។

គួរជម្រាបថា ឧទ្យានជាតិ«ភ្នំគូលែន» ត្រូវបានបង្កើតឡើងដោយព្រះរាជក្រឹត្យចុះថ្ងៃទី១ ខែវិច្ឆិកា ឆ្នាំ ១៩៩៣ គ្របដណ្តប់លើផ្ទៃដីទំហំ ៣៧ ៥០០ហិកតា គ្រប់ដណ្តប់លើភ្នំចំនួន៣(ភ្នំហប់ ភ្នំគូលែន និងភ្នំក្បាលស្ពាន) ស្ថិតនៅក្នុងឃុំចំនួន២ គឺ ឃុំខ្នងភ្នំស្ថិតនៅក្នុងស្រុកស្វាយលើ និងឃុំឃុនរាម ស្ថិតនៅក្នុងស្រុកបន្ទាយស្រី ខេត្តសៀមរាប។ «ភ្នំគូលែន» ទទួលបានងារជា «ឧទ្យានជាតិ» តាមរយៈព្រះរាជក្រឹត្យកាលពីឆ្នាំ១៩៦៩ ដែលជា ឧទ្យានជាតិទី២ បន្ទាប់ពីតំបន់អង្គរ ដែលជាឧទ្យានជាតិទី១ កំណត់ដោយព្រះរាជក្រឹត្យនៅឆ្នាំ១៩២៥។

បច្ចុប្បន្ននេះ ឧទ្យានជាតិ«ភ្នំគូលែន» មានផ្ទៃដីទំហំ ៦២ ៨៨៣ហិកតា តាមអនុក្រឹត្យលេខ១៨៨ អនក្រ.បក ចុះថ្ងៃទី១៧ ខែកក្កដា ឆ្នាំ២០២៣ ស្តីពីការកែប្រែឧទ្យានជាតិព្រះជ័យវរ្ម័ន-នរោត្តម «ភ្នំគូលែន» ស្ថិតនៅក្នុងស្រុកចំនួន៥ ឃុំចំនួន១៤ និងភូមិចំនួន៤៥ រួមមានដូចតទៅស្រុកស្វាយលើ (៤ឃុំ និង២០ភូមិ) ស្រុកបន្ទាយស្រី (៣ឃុំ និង១៤ភូមិ) ស្រុកវ៉ារិន (៣ឃុំ និង៧ ភូមិ ) ស្រុកសូទ្រនិគម (៣ឃុំ និង៣ភូមិ) និងស្រុកអង្គជុំ (១ឃុំ និង១ភូមិ)។

ភ្នំគូលែន ត្រូវបានគេចាត់ទុកជាភ្នំដ៏ពិសិដ្ឋ មានតម្លៃអភិរក្សខ្ពស់ និងជាតំបន់ទេសចរណ៍ប្រវត្តិសាស្ត្រ វប្បធម៌ និងធម្មជាតិដ៏ទាក់ទាញមួយ ស្ថិតនៅភាគខាងជើងឈៀងខាងកើតនៃខេត្តសៀមរាប ចម្ងាយ 53 គីឡូម៉ែត្រ។ ភ្នំនេះមានកម្ពស់ 492 ម៉ែត្រ ងាយស្រួលធ្វើដំណើរឡើងតាមរថយន្ត ឬថ្មើរជើង និងមានបុរាណស្ថានចំនួន 155 កន្លែងត្រូវបានរកឃើញ។

ភ្នំគូលែនជាប្រភពទឹកដ៏សំខាន់សម្រាប់ខេត្តសៀមរាប ជាពិសេសក្រុងសៀមរាប និងជាតំបន់មរតកអាងទឹកធម្មជាតិ ដែលមិនអាចកាត់ថ្លៃបាន ព្រោះជាប្រភពទឹកសម្រាប់ការប្រើប្រាស់ ស្រោចស្រពដំណាំ និងរក្សាលំនឹងប្រាសាទបុរាណ៕