(ភ្នំពេញ)៖ លោក នេត្រ ភក្ត្រា រដ្ឋមន្ត្រីក្រសួងព័ត៌មាន នៅថ្ងៃទី៣ ខែមេសា ឆ្នាំ២០២៦នេះ បានអនុញ្ញាតឱ្យលោកស្រី Ülkü Kocaefe ឯកអគ្គរដ្ឋទូតនៃសាធារណរដ្ឋតួកគីយ៉េ ទើបបញ្ចប់អាណត្តិបេសកកម្មការទូតនៅកម្ពុជា ចូលជួបសម្តែងការគួរសម និងជម្រាបលា។

នាឱកាសនោះលោករដ្ឋមន្ត្រី នេត្រ ភក្ត្រា បានថ្លែងកោតសរសើរ និងសម្តែងនូវអំណរគុណចំពោះលោកស្រីឯកអគ្គរដ្ឋទូត ចំពោះកិច្ចសហការនាពេលកន្លងមកជាមួយនឹងក្រសួងព័ត៌មាន ជាពិសេសកិច្ចខិតខំប្រឹងប្រែង ក្នុងការលើកស្ទួយទំនាក់ទំនងក្នុងវិស័យព័ត៌មាន តាមរយៈការចុះកិច្ចព្រមព្រៀងអនុស្សារណៈនៃការយោគយល់រវាងទីភ្នាក់ងារសារព័ត៌មានកម្ពុជា (AKP) ជាមួយទីភ្នាក់ងារសារការព័ត៌មានតួកគី Anadolu Ajansi (AA) និងការចុះកិច្ចព្រមព្រៀងអនុស្សរណៈនៃការយោគយល់គ្នារវាងក្រសួងព័ត៌មានកម្ពុជា ជាមួយនាយកដ្ឋានទំនាក់ទំនងរបស់ប្រធានាធិបតីនៃសាធារណរដ្ឋតួកគីយ៉េ ស្តីពីកិច្ចសហប្រតិបត្តិការក្នុងវិស័យប្រព័ន្ធផ្សព្វផ្សាយ និងទំនាក់ទំនងសាធារណៈ កាលពីឆ្នាំ២០២៤។

បន្ថែមលើនេះ លោករដ្ឋមន្រ្តី នេត្រ ភក្ត្រា ក៏បានគូសបញ្ជាក់អំពីការគាំទ្រសំណាក់ទីភ្នាក់ងារសហប្រតិបត្តិការ និងសម្របសម្រួលតួកគីយ៉េ (TIKA) ដែលបានផ្តួចផ្តើមរួមគ្នារៀបចំឱ្យមានវគ្គបណ្តុះបណ្តាលស្តីពី «ការរាយការណ៍ព័ត៌មានតាមបណ្តាញទំនាក់ទំនងសង្គម និងប្រព័ន្ធផ្សព្វផ្សាយឌីជីថល» កាលពីឆ្នាំ២០២៥ កន្លងទៅ។

នៅចំពោះលោករដ្ឋមន្ត្រី នេត្រ ភក្ត្រា លោកស្រីឯកអគ្គរាជទូតតួកគីយ៉េ បានកត់សម្គាល់ និងថ្លែងនូវការកោតសរសើរចំពោះការដឹកនាំរបស់រដ្ឋមន្ត្រី ក្នុងការអភិវឌ្ឍវិស័យព័ត៌មាន ដែលកំពុងដើរតួនាទីយ៉ាងសំខាន់ នៅក្នុងផ្តល់នូវព័ត៌មានពិតជូនប្រជាពលរដ្ឋ។

លោកស្រីបានបន្ថែមទៀតថា ប្រទេសតួកគីយ៉េ នឹងបន្តកិច្ចសហការ និងគាំទ្រចំពោះក្រសួងព័ត៌មាន សំដៅជំរុញអភិវឌ្ឍ និងលើកស្ទួយទំនាក់ទំនង និងដើម្បីផលប្រយោជន៍នៃប្រជាជននៃប្រទេសទាំងពីរ។

ឆ្លៀតក្នុងឱកាសនេះ លោករដ្ឋមន្ត្រី នេត្រ ភក្ត្រា ក៏បានជូនពរលោកស្រីឯកអគ្គរដ្ឋទូតតួគីយ៉េ ចប់អាណត្តិ ទទួលបានជោគជ័យ ក្នុងបេសកកម្មនានានៅពេលខាងមុខបន្ដទៀត៕