(សៀមរាប)៖ មន្ទីរព័ត៌មានខេត្តសៀមរាប នៅថ្ងៃទី៣ ខែមេសា ឆ្នាំ២០២៦នេះ បានរៀបចំពិធីសូត្រមន្តចម្រើនព្រះបរិត្ត ប្រោសព្រំលើករាសី និងជួបសំណេះសំណាលជាមួយមន្ត្រីរាជការ ព្រមទាំងមន្ត្រីចូលនិវត្តន៍ ដើម្បីអបអរសាទរពិធីបុណ្យចូលឆ្នាំថ្មី ប្រពៃណីជាតិខ្មែរ ដែលនឹងឈានចូលមកដល់នាពេលឆាប់ៗខាងមុខនេះ។

ក្នុងឱកាសនោះ លោក យឿន ចាន់ អនុប្រធានមន្ទីរព័ត៌មានខេត្តសៀមរាប ទទួលបន្ទុករួម បានសម្ដែងនូវសេចក្ដីសោមនស្សរីករាយ និងថ្លែងអំណរគុណយ៉ាងជ្រាលជ្រៅចំពោះស្មារតីសាមគ្គីភាពយ៉ាងរឹងមាំ រវាងថ្នាក់ដឹកនាំ និងមន្ត្រីរាជការទាំងអស់នៃមន្ទីរព័ត៌មាន។

លោកបានបន្តថា ការរៀបចំពិធីជួបជុំនេះ មិនត្រឹមតែជាការធ្វើបុណ្យរួមគ្នាតាមទំនៀមទម្លាប់សាសនាតែប៉ុណ្ណោះទេ ប៉ុន្តែវាក៏ជាការបង្កើតនូវបរិយាកាសរីករាយ និងស្នាមញញឹមសម្រាប់ទទួលឆ្នាំថ្មី បន្ទាប់ពីមន្ត្រីគ្រប់រូបបានខិតខំប្រឹងប្រែងបំពេញភារកិច្ចយ៉ាងសកម្មក្នុងរយៈពេលមួយឆ្នាំកន្លងមកនេះ។

លោកបន្តថា តាមរយៈការរួមកម្លាំងគ្នាយ៉ាងសកម្ម យើងសម្រេចបាននូវសមិទ្ធផល និងស្នាដៃជាច្រើនសម្រាប់អង្គភាព ក៏ដូចជាការបម្រើសេវាព័ត៌មានជូនដល់ប្រជាពលរដ្ឋបានយ៉ាងមានប្រសិទ្ធភាព។ ជាមួយគ្នានេះ លោកក៏បានថ្លែងនូវការកោតសរសើរ និងវាយតម្លៃខ្ពស់ចំពោះមន្ត្រីរាជការក្រោមឱវាទទាំងអស់ ដែលបានអនុវត្តតួនាទីភារកិច្ចរៀងៗខ្លួនរហូតទទួលបានលទ្ធផលល្អប្រសើរ។

ទន្ទឹមនឹងការអបអរសាទរ លោកក៏បានដាស់តឿន និងលើកទឹកចិត្តឱ្យមន្ត្រីទាំងអស់ បន្តរក្សានូវវិន័យការងារ អនុវត្តភារកិច្ចឱ្យបានខ្ជាប់ខ្ជួន និងបន្តពង្រឹងសមត្ថភាពបន្ថែមទៀត ដើម្បីឆ្លើយតបទៅនឹងការវិវត្តនៃវិស័យព័ត៌មាននៅក្នុងយុគសម័យឌីជីថលនេះ។

ក្នុងឱកាសនោះដែរ លោកក៏បានប្រគល់វត្ថុអនុស្សាវរីយ៍ និងការពិភាក្សាផ្លាស់ប្តូរបទពិសោធន៍រវាងមន្ត្រីជំនាន់ក្រោយ និងមន្ត្រីចូលនិវត្តន៍ ដែលជាការបង្ហាញពីការដឹងគុណចំពោះអ្នកជំនាន់មុន ដែលបានលះបង់កម្លាំងកាយចិត្តជូនអង្គភាពនាពេលកន្លងមកផងដែរ។

តំណាងនិវត្តន៍ជន លោក លីវ សាន្ត បានថ្លែងការកោតសរសើរចំពោះមន្ត្រីមន្ទីរព័ត៌មានជំនាន់ក្រោយទាំងអស់ ដែលបានសហការគ្នាយ៉ាងល្អ ក្នុងការបំពេញភារកិច្ចការងារ ធ្វើឱ្យវិស័យព័ត៌មានក្នុងខេត្តរីកចម្រើនជាបន្តបន្ទាប់។ ពិតណាស់ “អ្នកចាស់ទៅ អ្នកថ្មីបន្តវេន” តែយើងជឿជាក់ថាអ្នកបន្តវេនយើង នឹងកាន់តែមានគុណភាពក្នុងការបម្រើក្នុងវិស័យមួយនេះ។

លោកក៏សូមឱ្យប្អូនៗបន្តវេនទាំងអស់ បន្តភាពខ្លាំងរបស់ក្នុងការចូលរួមក្នុងវិស័យព័ត៌មានជាមួយរដ្ឋបាលខេត្ត និងរាជរដ្ឋាភិបាលឱ្យកាន់តែល្អប្រសើរតទៅមុខទៀត៕