(ភ្នំពេញ)៖ ចាប់ពីថ្ងៃទី៣១ ខែមីនា ដល់ថ្ងៃទី២ ខែមេសា ឆ្នាំ២០២៦ នៅទីក្រុងសេអ៊ូល សាធារណៈរដ្ឋកូរ៉េ គណៈប្រតិភូនៃអគ្គនាយកដ្ឋានគយ និងរដ្ឋាករកម្ពុជា ដឹកនាំដោយលោកបណ្ឌិត គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា បានចូលរួមសន្និសីទស្តីពីគោលនយោបាយកិច្ចសម្រួលពាណិជ្ជកម្ម ឆ្នាំ២០២៦ ក្រោមប្រធានបទ «ការលើកកម្ពស់កិច្ចសម្រួលពាណិជ្ជកម្មតាមរយៈការកែលម្អបរិយាកាសគយសកល» ដោយមាន ការចូលរួមពីបណ្តាអគ្គនាយក នៃរដ្ឋបាលគយ នៃប្រទេសមកពីតំបន់អាស៊ាន និងអាស៊ីកណ្តាល។

គោលបំណងសំខាន់ នៃអង្គសន្និសីទនេះ គឺដើម្បីធ្វើការចែករំលែកនូវសមិទ្ធផលសំខាន់ៗ នៃរដ្ឋបាលគយ ក្នុងតំបន់អាស៊ាន និងអាស៊ីកណ្តាល និងបន្តពង្រឹងកិច្ចសហប្រតិបត្តិការគ្នារវាងរដ្ឋបាលគយ ស្របពេលដែលកត្តាភូមិសាស្រ្តនយោបាយសកលមានការប្រែប្រួលមិនច្បាស់លាស់។

អង្គសន្និសីទបានកត់សម្គាល់ថា តំបន់អាស៊ាន និងអាស៊ីកណ្តាលត្រូវបានចាត់ទុកថា ជាចំណុចយុទ្ធសាស្ត្រ ដ៏សំខាន់សម្រាប់ការពង្រីកទីផ្សារ ជាពិសេស អាស៊ីកណ្តាលដែលត្រូវបានគេវាយតម្លៃថាជាទីផ្សារដែលកំពុងរីកចម្រើន ដែលមានសក្តានុពលខ្ពស់ដោយផ្អែកលើ ធនធានថាមពល និងរ៉ែ។

សន្និសីទនេះ បានដំណើរការតាមរបៀបវារៈចំនួន ៥រួមមាន៖ ១៖ កិច្ចសម្រួលពាណិជ្ជកម្មតាមរយៈការបង្កើតបរិយាកាសគយឌីជីថល, ២៖ ការបង្កើតបរិយាកាសពាណិជ្ជកម្មដែលមិនប្រើក្រដាសស្នាម, ៣៖ ការកែលម្អបរិយាកាសគយផ្អែកលើបច្ចេកវិទ្យាថ្មីៗ, ៤៖ ការបង្កើនប្រសិទ្ធភាពគយសម្រាប់ពាណិជ្ជកម្មតាមប្រព័ន្ធអេឡិចត្រូនិក និង៥៖ ដំណើរទស្សនកិច្ចសិក្សា។

ឆ្លៀតឱកាសនៃកម្មវិធីសន្និសីទ លោកបណ្ឌិត គុណ ញឹម បានជួបប្រជុំទ្វេភាគីជាបន្តបន្ទាប់ ជាមួយរដ្ឋបាលគយកូរ៉េ ក្នុងគោលបំណងបន្តលើកកម្ពស់កិច្ចសហប្រតិបត្តិការរវាងរដ្ឋបាលគយ នៃប្រទេសទាំងពីរ ដោយភាគីទាំងពីរបានកោតសរសើរលើការខិតខំប្រឹងប្រែងលើការងារកិច្ចសម្រួលពាណិជ្ជកម្ម ការអនុវត្តកិច្ចព្រមព្រៀងពាណិជ្ជកម្មសេរី និងលទ្ធផល នៃការអនុវត្តប្រតិបត្តិការរួមគ្នាប្រយុទ្ធប្រឆាំងគ្រឿងញៀនខុសច្បាប់ កាលពីខែកុម្ភៈ ឆ្នាំ២០២៦កន្លងមក ព្រមទាំងបានចុះហត្ថលេខាលើឯកសារសហប្រតិបត្តិការរួមគ្នារវាង រដ្ឋបាលគយកម្ពុជា និងរដ្ឋបាលគយកូរ៉េ ស្តីពីការការពារកម្មសិទ្ធិបញ្ញា ឆ្នាំ២០២៦ និងបានជួបប្រជុំទ្វេភាគីជាមួយរដ្ឋបាលគយហុងកុង ក្នុងគោលបំណងជំរុញពន្លឿនការរៀបចំចុះហត្ថលេខាលើឯកសារ ស្តីពីការទទួលស្គាល់គ្នាទៅវិញទៅមកនូវកម្មវិធីប្រតិបត្តិករសេដ្ឋកិច្ច បានទទួលការអនុញ្ញាតរវាងរដ្ឋបាលគយទាំងពីរ និងជំរុញយន្តការទប់ស្កាត់ការរត់គេចពន្ធបារី និងថ្នាំជក់ខុសច្បាប់ ព្រមទាំងជំរុញកិច្ចសម្រួលពាណិជ្ជកម្មរវាងប្រទេសទាំងពីរ។

ដោយឡែកនារសៀលថ្ងៃទី៣១ ខែមីនា ឆ្នាំ២០២៦ លោកបណ្ឌិត គុណ ញឹម និងគណៈប្រតិភូ បានអញ្ជើញផ្តល់កិត្តិយសជួបសំណេះសំណាល និងសួរសុខទុក្ខមន្ត្រី និងបុគ្គលិកស្ថានទូត នៅស្ថានទូតកម្ពុជា ប្រចាំសាធារណរដ្ឋកូរ៉េផងដែរ៕