(ស្ទឹងត្រែង)៖ លោក សរ សុពុត្រា អភិបាលខេត្តស្ទឹងត្រែង នារសៀលថ្ងៃទី៣ ខែមេសា ឆ្នាំ២០២៦ បានអញ្ជើញសម្ពោធដាក់ឱ្យប្រើប្រាស់ជាផ្លូវការនូវផ្លូវបេតុងចំនួន ៣ខ្សែ មានប្រវែងសរុប ៤៧០ម៉ែត្រ ស្មើនឹង ២៧៩០ម៉ែត្រការ៉េ ដែលជាការឧបត្ថម្ភរបស់សប្បុរសជននានា។

យោងតាមរបាយការណ៍របស់លោកចៅសង្កាត់ស្ទឹងត្រែងបានបង្ហាញថា ផ្លូវបេតុងទាំង ៣ខ្សែនេះរួមមាន៖ ខ្សែទី១ ប្រវែង ១៥៨ម៉ែត្រ ទទឹង ៩ម៉ែត្រ ស្មើនឹង ១៤២២ ម៉ែត្រការ៉េ ស្ថិតនៅភូមិត្រពាំងព្រីង (មុខសាលាខេត្ត), ខ្សែទី២ ប្រវែង ១៩១ម៉ែត្រ ទទឹង ៤ម៉ែត្រ ស្មើនឹង ៧៦៤ ម៉ែត្រការ៉េ ស្ថិតនៅភូមិព្រែក (ចំណុចជុំវិញមន្ទីរធនធានទឹក និងឧតុនិយមខេត្ត) និងខ្សែទី៣ ប្រវែង ១២០ម៉ែត្រ មានទទឹងពី ៤ម៉ែត្រ-៥ម៉ែត្រ និង៧ម៉ែត្រ ស្ថិតនៅភូមិព្រែក (ចំណុចកែងមន្ទីរសុខាភិបាលខេត្តស្ទឹងត្រែង)។

ក្នុងឱកាសនោះ លោក លី មីណា អភិបាលក្រុងស្ទឹងត្រែង បានលើកឡើងថា នេះជាសមិទ្ធផលថ្មីបន្ថែមទៀត ដែលសង្កាត់ស្ទឹងត្រែង ក្រុងស្ទឹងត្រែង ទទួលបានក្រោមការដឹកនាំរបស់លោក សរ សុពុត្រា អភិបាលខេត្ត ដើម្បីចូលរួមគាំទ្រ និងដោះស្រាយនូវបញ្ហាប្រឈមនឹងរបស់ប្រជាពលរដ្ឋ។

លោកអភិបាលក្រុងបានបន្តថា តាមរយៈការចុះជួបផ្ទាល់ជាមួយប្រពលរដ្ឋ ពួកគាត់ពិតជាមានសេចក្តីត្រឹកអរជាពន់ពេក ដែលថ្នាក់ដឹកនាំបានគិតគូរៀបចំស្ថាបនាផ្លូវទាំងនេះ ដែលកន្លងមកប្រជាពលរដ្ឋស្ទើរតែពុំជឿថានឹងអាចមានផ្លូវបេតុងល្អប្រើប្រាស់ឡើយ។

ជាមួយគ្នានេះ លោក លី មីណា ក៏បានបង្ហាញពីចក្ខុវិស័យដែលកំពុងសិក្សា និងអនុវត្តផែនការត្រៀមសម្រាប់ភូមិមួយចំនួនក្នុងក្រុងស្ទឹងត្រែង ដើម្បីបញ្ចប់ទាំងការប្រើប្រាស់ផ្លូវក្រាលគ្រួសក្រហម និងផ្លូវដីស ដោយប្រើប្រាស់ផ្លូវបេតុងជំនួសវិញ នៅចន្លោះឆ្នាំ២០២៦ និង២០២៧។

ថ្លែងសំណេះសំណាលទៅកាន់ប្រជាពលរដ្ឋដែលចូលរួមអបអរសាទរសមិទ្ធផលថ្មីនេះ, លោក សរ សុពុត្រា បានបញ្ជាក់ថា កន្លងមកទីតាំងដែលកំពុងសម្ពោធនេះជាកន្លែងភក់ជ្រាំ និងសំណង់អាណាធិបតេយ្យ ប៉ុន្តែដោយសារតម្រូវការរបស់ប្រជាពលរដ្ឋ ដើម្បីឱ្យក្រុងស្ទឹងត្រែង មានសោភ័ណភាព និងផាសុកភាព ទើបបានធ្វើការដោះស្រាយ និងស្ថាបនាជាផ្លូវបេតុងជូនប្រជាពលរដ្ឋប្រើប្រាស់ដោយមានការចូលរួមឧបត្ថម្ភពីសប្បុរសជន។

ទន្ទឹមនឹងការបង្ហាញនូវសេចក្តីត្រេកអរ និងអបអរសាទរជាមួយប្រជាពលរដ្ឋ លោកអភិបាលខេត្តក៏បានអំពាវនាវដល់ប្រជាពលរដ្ឋគ្រប់រូបត្រូវបង្កើនស្មារតីសាមគ្គីភាពគ្នា ក្នុងកាលៈទេសៈប្រទេសជាតិកំពុងរងការឈ្លានពានពីប្រទេសថៃ ដោយត្រូវពហិការប្រើប្រាស់ផលិតផលសៀម និងជឿជាក់លើរាជរដ្ឋាភិបាលកម្ពុជា ក្នុងការដោះស្រាយបញ្ហា និងការការពារអធិបតេយ្យភាពជាតិ បូរណភាពទឹកដីឱ្យបានគង់វង្ស៕