មេបញ្ជាការរាជអាវុធហត្ថខេត្តកំពង់ស្ពឺ ចាត់ក្រុមការងាររៀបចំសម្ភារៈឧបត្ថម្ភដល់វីរកងទ័ពជួរមុខឈរជើងនៅទិសខេត្តព្រះវិហារ
04-04-2026 10:10
(កំពង់ស្ពឺ)៖ លោកឧត្តមសេនីយ៍ត្រី ម៉េង ស្រ៊ុន មេបញ្ជាការកងរាជអាវុធហត្ថខេត្តកំពង់ស្ពឺ បានចាត់ឱ្យក្រុមការងារកងរាជអាវុធហត្ថរៀបចំចាត់ចែងនូវសម្ភារគ្រឿងឧបភោគបរិភោគមួយចំនួនក្នុងការជួយឧបត្ថម្ភទៅដល់បងប្អូនវីរកងទ័ពជួរមុខ អង្គភាពវរសេនាតូច៦១ បញ្ជាការដ្ឋានរថក្រោះ អគ្គបញ្ជាការ ឈរជើងនៅទិសខេត្តព្រះវិហារ។
ជាទឹកចិត្តក្រោមស្មារតីជាតិនិជាតិនិយម លោកឧត្តមសេនីយ៍ត្រី ម៉េង ស្រ៊ុន បានប្រគល់នូវសម្ភារមួយចំនួនរួមមាន៖ ទឹកសុទ្ធចំនួន ១០០កេស និងមី៥០កេសផងដែរ។ សកម្មភាពនេះបានបង្ហាញឱ្យឃើញអំពីការយកចិត្តទុកដាក់ ក្នុងស្មារតីជាតិនិយមរបស់លោកឧត្តមសេនីយ៍ត្រី ម៉េង ស្រ៊ុន ព្រមទាំងក្រុមការងារ និងសប្បុរសជនទាំងអស់ទាំងក្នុង និងក្រៅស្រុក ដែលតែងតែឧបត្ថម្ភនូវសម្ភារៈ គ្រឿងឧបភោគបរិភោផ្សេងៗ របស់របរប្រើប្រាស់ រួមនឹងបរិច្ចាគធនធានផ្ទាល់ខ្លួនក្នុងការចូលរួមចំណែកជាមួយមេបញ្ជាការ កងរាជអាវុធហត្ថខេត្តកំពង់ស្ពឺ បន្តឧបត្ថម្ភជូនទៅដល់បងប្អូនវីរកងទ័ពជួរមុខពេលនេះ និងនាពេលកន្លងមកផងដែរ។
ក្នុងពេលនោះដែរ លោកឧត្តមសេនីយ៍ត្រី ម៉េង ស្រ៊ុន រួមជាមួយក្រុមការងារ ក៏បានជូនពរឱ្យបងប្អូនវីរកងទ័ពជួរមុខទាំងអស់ សូមមានសុខភាពល្អ ព្រមទាំងបានសម្តែងនូវការគោរពដឹងគុណចំពោះវីរកងទ័ពនៅសមរភូមិមុខទាំងអស់ ក្នុងការបំបេញបេសកម្មដ៏ឧត្តុង្គឧត្តម ដើម្បីការពារដែនអធិបតេយ្យភាព និងបូរណភាពទឹកដីពីសត្រូវឈ្លានពាន ដើម្បីការពារជាតិមាតុភូមិ ដើម្បីបុព្វហេតុថែរក្សាសុខសន្តិភាពជូនប្រជាជនកម្ពុជាទាំងមូល៕
