(ភ្នំពេញ)៖ តំណាងប្រជាពលរដ្ឋខ្មែរ រស់នៅរដ្ឋម៉ាសាឈូសេត សហរដ្ឋអាមេរិក ចំនួន ៩០គ្រួសារ បានដាក់ញត្តិស្តីពីទង្វើឈ្លានពានរបស់ថៃមកលើកម្ពុជា ជូនទៅសមាជិក ព្រឹទ្ធសភានិងរដ្ឋសភានៃសហរដ្ឋអាមេរិក ដើម្បីលើកយកបញ្ហានេះទៅក្នុងការប្រជុំសភារបស់សហរដ្ឋអាមេរិក។ តំណាងពលរដ្ឋខ្មែរ មានលោក យោគ សុវណ្ណារ៉ា និងលោក ជា សារុន បានដាក់ញត្តិ នៅថ្ងៃទី៣ ខែមេសា ឆ្នាំ២០២៦។

ញត្តិនេះបានផ្ញើជូន លោក Edward John Markey តាមរយៈលោក Innocent Wozufia មន្ត្រីនៃការិយាល័យរបស់លោកសមាជិកព្រឹទ្ធសភា និងផ្ញើជូនលោកស្រី Elizabeth Ann Warren មន្ត្រីនៃការិយាល័យលោកស្រីសមាជិកព្រឹទ្ធសភា តាមរយៈលោកស្រី Nicole Lockhart-Rios ព្រមទាំងផ្ញើលោកស្រី Lori Ann Trahan សាមាជិករដ្ឋសភានៃសហរដ្ឋអាមេរិក តាមរយៈលោក Oscar Burgos Pimente lមន្ត្រីនៃការិយាល័យលោកស្រីសមាជិករដ្ឋសភាផងដែរ។

នៅក្នុងញត្តិបានឲ្យរៀបរាប់ថា កងកម្លាំងយោធាថៃ បានធ្វើសកម្មភាពឈ្លានពាននិងរំលោភបំពានកាន់កាប់បូរណភាពទឹកដីរបស់កម្ពុជា ដែលអន្តរជាតិទទួលស្គាល់ រួមទាំងបានបំផ្លាញផ្ទះសម្បែងរបស់ប្រជាជនស៊ីវិល ដំឡើងរបាំង និងបន្ទាយទាហាន ព្រមទាំងបន្តកាន់កាប់តំបន់ហួសពីតំបន់ជម្លោះ។ សកម្មភាពទាំងនោះបានបណ្តាលឱ្យមានវិបត្តិមនុស្សធម៌ ដោយមានប្រជាជនស៊ីវិលកម្ពុជារាប់សែននាក់ ត្រូវបានផ្លាស់ទីលំនៅ និងមនុស្សជាច្រើនមិនអាចវិលត្រឡប់មក ផ្ទះវិញដោយសុវត្ថិភាព។

ប្រជាពលរដ្ឋខ្មែរ រស់នៅរដ្ឋម៉ាសាឈូសេត បានរៀបរាប់ទៀតថា «ទង្វើទាំងនេះបានបង្កើនការព្រួយបារម្ភយ៉ាងខ្លាំង ស្តីអំពីការរំលោភច្បាប់អន្តរជាតិការគំរាមកំហែងដល់សន្តិភាព ក្នុងតំបន់និងការរាំងយន្តការដោះស្រាយព្រំដែនដោយសន្តិវិធីក្នុងនាមយើងខ្ញុំទាំងអស់គ្នា សូមអំពាវនាវដល់ ឯកឧត្តមនិងលោកជំទាវជាសមាជិកព្រឹទ្ធសភា-រដ្ឋសភាមេត្តាអនុវត្តគោលនយោបាយការបរទេសរបស់សហរដ្ឋ អាមេរិក ដើម្បីឲ្យប្រទេសថៃអនុវត្តបញ្ឈប់ជាបន្ទាន់នូវសកម្មភាពឈ្លានពានការកាន់កាប់ដោយខុសច្បាប់បូរណភាពទឹកដីនិងអធិបតេយ្យភាពរបស់កម្ពុជាទាំងស្រុង ដកកម្លាំងយោធា និងរុះរើបន្ទាយទាហានទាំងអស់នៅក្នុងទឹកដីកម្ពុជា ធានាការវិលត្រឡប់របស់ប្រជាជនស៊ីវិលកម្ពុជា ដែលត្រូវបានផ្លាស់ទីលំនៅ ដើម្បីបានទៅកាន់ផ្ទះរបស់ ប្រជាជនស៊ីវិលវិញដោយសុវត្ថិភាព និងដោយគ្មានការរារាំង បន្តនិងគាំទ្រដំណើរការរបស់គណៈកម្មការព្រំដែនរួម ស្របតាមច្បាប់អន្តរជាតិ និងកិច្ចព្រមព្រៀងទ្វេភាគី។ លើសសពីនេះ យើងខ្ញុំចង់បង្ហាញនិងបញ្ជាក់ពីផលប៉ះពាល់ផ្លូវចិត្តយ៉ាងជ្រាលជ្រៅ ដែលស្ថានភាពនេះមានទៅលើ សហគមន៍ខ្មែរ-អាមេរិកនៅក្នុងរដ្ឋម៉ាសាឈូសេត»។

ក្នុងញត្តិដដែលបានបន្តថា ប្រជាពលរដ្ឋដែលមានវ័យចំណាស់ភាគច្រើននៃសហគមន៍របស់យើង គឺជាអ្នកដែលបានរស់រានមានជីវិតសល់ពីសង្រ្គាមដែលជាកន្លែងដែលពួកគេបានរងទុក្ខវេទនា ការរំលោភបំពាន ការបាត់បង់មនុស្សជាទីស្រលាញ់ និងការផ្លាស់ទីលំនៅ ដែលបណ្តាលមពីសកម្មភាពរបស់យោធាថៃក្នុងអំឡុង ពេលដែលគាត់នៅក្នុងជំរំជនភៀសខ្លួននៅក្នុងប្រទេសថៃ។ ស្ថានភាពតាមបណ្តោយព្រំដែនកម្ពុជា-ថៃកំពុងបើករបួសអតីតកាលឡើងវិញ ដែលរួមចំណែកដល់ការភ័យខ្លាចបារម្ភ និងភាពតានតឹងផ្លូវចិត្តឡើងវិញ ព្រមទាំងប៉ះពាល់ភាពអវិជ្ជមានដល់សុខុមាលភាពផ្លូវចិត្ត និងរាងកាយរបស់ប្រជាពលរដ្ឋដែលរស់នៅក្នុងសហគមន៍យើង។

«សូមឯកឧត្តម និងលោកជំទាវជាសមាជិកព្រឹទ្ធសភា-រដ្ឋសភា ដែលជាតំណាងរាស្ត្រដែលត្រូវបានជ្រើសតាំងរបស់យើងខ្ញុំទាំងអស់គ្នា សម្លេងមតិនិងយោបល់របស់អ្នក គឺមានសារៈសំខាន់ណាស់ក្នុងការលើកកម្ពស់សន្តិភាពការការពារសិទ្ធិមនុស្ស និងការគាំទ្រដល់សហគមន៍ដែលរងផលប៉ះពាល់ទាំងនៅបរទេស និងនៅក្នុងទឹកដីកំណើតរបស់យើងខ្ញុំ»។ នេះជាការអំពាវនាវរបស់ប្រជាពលរដ្ឋខ្មែរ រស់នៅរដ្ឋម៉ាសាឈូសេត៕