(ភ្នំពេញ)៖ ក្នុងបរិបទអភិវឌ្ឍក្រោយសង្គ្រាម ប្រទេសកម្ពុជាត្រូវបានពិភពលោកស្គាល់ថាជាប្រទេសមួយ ដែលរងផលប៉ះពាល់ធ្ងន់ធ្ងរពីគ្រាប់មីន និងសំណល់អាវុធមិនទាន់ផ្ទុះ។ ទោះបីជាយ៉ាងណា ក្នុងរយៈពេល ២០ឆ្នាំចុងក្រោយនេះ ការប្រារព្ធ «ទិវាអន្តរជាតិយល់ដឹងអំពីមីន» រៀងរាល់ថ្ងៃទី៤ ខែមេសា ក្រោមការផ្តួចផ្តើមរបស់ United Nations បានក្លាយជាវេទិកាយុទ្ធសាស្ត្រសំខាន់សម្រាប់ជំរុញសកម្មភាពដោះមីន និងបំផុសការយល់ដឹងសាធារណៈនៅកម្ពុជា។

បើតាមលោកបណ្ឌិត ជា មុនីឫទ្ធិ ប្រធានសមាគមអ្នកស្រាវជ្រាវវឌ្ឍនភាពកម្ពុជា-ចិន ចាប់ពីឆ្នាំ២០១៨មក «គម្រោងជំនួយចិនលុបបំបាត់គ្រាប់មីននៅកម្ពុជា» រដ្ឋាភិបាលចិន និងសង្គមស៊ីវិលចិន (មូលនិធិ Peaceland) បានរួមចំណែកជាមួយរាជរដ្ឋាភិបាលកម្ពុជា ដែលមាន CMAC ជាសេនាធិការនៅក្នុងទិវាជាតិយល់ដឹងអំពីមីន។ ការចូលរួមនេះបានផ្តោតសកម្មភាពចាប់ពីពិធីរំលឹក ដល់ការគាំទ្រផែនការអភិវឌ្ឍ និងផ្តល់សារអប់រំយល់ដឹងអំពីមីនដល់ប្រជាពលរដ្ឋកម្ពុជាចំនួន ៤,៦០០,០០០នាក់។

ក្នុងជំនួបជាមួយ លោក Wang Wenbin ឯកអគ្គរដ្ឋទូតចិនប្រចាំកម្ពុជា នៅស្ថានទូតចិនប្រចាំរាជធានីភ្នំពេញ នាថ្ងៃទី០១ ខែមេសា ឆ្នាំ២០២៦កន្លងទៅ លោក ហេង រតនា, អគ្គនាយក CMAC, បានថ្លែងថា តាមរយៈជំនួយរបស់មិត្តចិន ចាប់ពីឆ្នាំ២០១៨ ដល់ឆ្នាំ២០២៦, CMAC បាន៖
- រំដោះផ្ទៃដីចម្ការមីន និងចម្ការគ្រាប់យុទ្ធភណ្ឌសង្គ្រាមចំនួន ១៩,០០០ហិកតា
- រកឃើញ និងកម្ទេចចោលគ្រាប់មីន និងយុទ្ធភណ្ឌមិនទាន់ផ្ទុះចំនួន ១០៥,០០០គ្រាប់
- ឆ្លើយតបសំណើសុំអន្ដរាគមន៍បន្ទាន់ជាចំនួនលើស ៥,៩០០ករណី

ជាការគួរកត់សម្គាល់នៅក្នុងចំណោមដៃគូអន្តរជាតិ, មូលនិធិចិន Peaceland បានបង្ហាញពីតួនាទីសំខាន់ក្នុងការគាំទ្រកម្ពុជា ដើម្បីសម្រេចគោលដៅ «គ្មានគ្រាប់មីន»។ ការគាំទ្រនេះមិនត្រឹមតែផ្តល់ធនធានទេ តែក៏បានរួមចំណែកក្នុង៖
១. អនុវត្តកម្មវិធីអប់រំការយល់ដឹងអំពីគ្រោះថ្នាក់មីននៅតំបន់ជនបទ
២. គាំទ្រការបណ្តុះបណ្តាល និងសមត្ថភាពមូលដ្ឋាន
៣. ជំរុញការចូលរួមរបស់យុវជន និងសហគមន៍ក្នុងសកម្មភាពសន្តិភាព
៤. ផ្សព្វផ្សាយសារ «សន្តិភាព និងសុវត្ថិភាពមនុស្ស» តាមសកម្មភាពសង្គម។

ការចូលរួមនេះត្រូវបានលោកបណ្ឌិត ជា មុនីឫទ្ធិ បញ្ជាក់ថា ជាផ្នែកមួយនៃការពង្រឹងទំនាក់ទំនងមិត្តភាព និងការសហការអភិវឌ្ឍរវាងប្រជាជនកម្ពុជា-ចិន ដែលមានមូលដ្ឋានលើ «ប្រជាជនជាមជ្ឈមណ្ឌល», គោលគំនិតស្នូលរបស់បក្សកុម្មុយនិស្តចិន។

ក្នុងនាមជាស្ពានរវាងសង្គមស៊ីវិលចិន និង CMAC, ប្រធានសមាគមអ្នកស្រាវជ្រាវវឌ្ឍនភាពកម្ពុជា-ចិន បានរំលេចថា ការប្រារព្ធ ទិវាយល់ដឹងអំពីមីន រៀងរាល់ឆ្នាំនៅថ្ងៃទី០៤ ខែមេសា បានជួយ លើកកម្ពស់ការយល់ដឹងអំពីគ្រោះថ្នាក់មីន, ជំរុញការចូលរួមពីសហគមន៍ និងដៃគូអន្តរជាតិ, ជាពិសេសមិត្តចិន និង បង្កើនការចូលរួមពីគ្រប់អង្គការពាក់ព័ន្ធក្នុងវិស័យបោសសម្អាតមីននៅកម្ពុជា

សូមជម្រាបថា សង្គមស៊ីវិលទាំងពីរប្រទេសកម្ពុជានិងចិន ដែលបានចូលរួមក្នុងបេសកកម្មរបស់ CMAC សុទ្ធតែយល់ស្របថា ការបំបាត់គ្រាប់មីននៅកម្ពុជាមិនមែនគ្រាន់តែដោះស្រាយកង្វល់មនុស្សប៉ុណ្ណោះទេ ប៉ុន្តែថែមទាំងជាការស្ថាបនាគ្រឹះរឹងមាំសម្រាប់សន្តិភាព និងអនាគតរបស់មនុស្សជំនាន់ក្រោយ៕